Maakɩ 4
4
Faradɛ wʋrʋ dʋɔ diduu
Matiyo 13:1-23; Luka 8:4-15
1Sɛ Yesu ti bɔrɛ ju Galaliya lɩɩ gaa nʋɔ sɛ wʋ fara wʋ a kalaa-kalaa bakpa. Bakpa fɔɩ baa dʋɔ, wʋ jʋʋ cha buori naŋ ju wʋ asanaŋ chonii, yela bakpa sɩmɩɛɩ lɩɩ gaa nʋɔ 2Sɛ wʋ mʋ aduuna kalaa ba wɩɛ fɔɩ, sɛ wʋ tawɩ ba sɛ, 3<<N nyii! Farɩdɛ wʋrʋ n ju na wʋ a ŋmati adiya bie. 4Gʋ wʋ a ŋmati na, ŋarɛ sala gbɩɛ laraŋ sɛ jimbisi kɔŋ gaa tɔɔsɩ ŋɩ kpiniŋ di. 5Sɛ ŋarɛ sala bʋɛ dʋɔ diele gaa tɩɛra taŋ fɔɩ na. Bie ŋii tu bileŋ akala takɩɛ tɩɛra fɔɩ taŋ bʋɛ ŋii dʋɔ ɔ, 6dɩmʋŋ dʋɔ, wiita lɩɩ na ŋɩ ŋɩɛwʋ, akala takɩɛ ŋɩ tana lira a. 7Sɛ ŋarɛ dʋɔ sala sɔba tibi dʋɔ. Sɛ sɔba na adiya bie ŋii tu bʋga ama sɔba ŋii bɩɩ ŋɩrɛ ŋɛ, dɩmʋŋ dʋɔ ŋɩ n dɩlɛ si bie e. 8Dɩmʋŋ sɛ ŋarɛ dʋɔ sala tibi bam dʋɔ, sɛ ŋɩ tu bɩɩ sɛ ŋɩ si bie. Ŋarɛ si bie nkuo na sala, ŋarɛ dʋɔ ŋitoro, sɛ ŋarɛ dʋɔ gafie.>>
9Sɛ Yesu tawɩ ba sɛ, <<Wʋŋ wʋ wɩɛna dɩla na, wʋ n nyii.>>
Kpɩnɩdɩ dʋɔ sɛ Yesu a tawɩ aduuna naŋ
Matiyo 13:10-17; Luka 8:9-10
10Gʋ dɩka Yesu nyiŋeŋ na, wʋ kpirida gifi bala baa na baa ba kpi ba dʋɔ na kɔŋ gaa tasɛ ɩ sɛ, wʋ n kalaa ba diduu gaa tie. 11Sɛ Yesu tawɩ ba sɛ amɩɛ bɩrɛ, Ɩsʋɔ yela sɛ ɩ nyii wʋ juori asiri wɩɛ ŋii tie, ama baa ba n kpi amɩɛ dʋɔ na bɩrɛ, aduuna naŋ sɛ wʋ a tawɩ wʋ a fa ba. 12Dɩmʋŋ dʋɔ,
<<<Baa kɩɛ bɩrɛ, ama baa na a.
Baa nyii bɩrɛ, ama baa nyii tie e.
Naa dɩmʋŋ na, nafʋɔ baa yela dɩsʋbʋ yɩɛ na
baa kɔŋ Ɩsʋɔ jaŋ
na wʋ a mʋ ba dɩsʋbʋ chɩɛ ba.>#Yis 6:9-10.>>
13Sɛ Yesu tasɛ wʋ wʋrʋgbɩɛtina sɛ, <<Ɩŋ nyii diduu gana tie? Aja yɩɛ sɩnɛ na ɩ nyii aduuna ŋii ŋɩ kakaa na tie? 14Farɩdɛ wʋŋ adiya bie ŋii wʋ duu na n nyina Ɩsʋɔ wɩɛ ŋii. 15Adiya bie ŋii ŋɩ sala gbɩɛ laraŋ n nyina bakpa baa ba nyii Ɩsʋɔ wɩɛ na, gabʋanaŋ sɛ Sɩtanɩ a gaa lɩsɛ lɩɩ ba tɩba. 16Bie ŋii ŋɩ sala bʋɛ tibi dʋɔ na n nyina bakpa baa ba nyii Ɩsʋɔ wɩɛ na, gabʋanaŋ sɛ baa mʋ asadi mʋ wɩɛ ŋii. 17Ama gʋ wɩɛ ŋii n pɩsɛ ba agela naŋ dʋɔ, baa dɩlɛ baa sɩŋ ba lɩɛdi naŋ taŋgɩlɛ ɛ. Sɛ awʋrʋfʋɔ yaa wʋsɛ chaŋ kɔŋ ba dʋɔ lɩɩ Ɩsʋɔ wɩɛ dʋɔ na, sɛ baa yela ba lɩɛdi naŋ. 18Bie ŋii ŋɩ sala sɔba tibi dʋɔ na n nyina bakpa baa ba nyii Ɩsʋɔ wɩɛ, 19ama ba yela sɛ chawʋ naŋ wɩɛ bisi, aterembie dɩsɛchɩbɛ na dulunya abʋrɩ jawʋ a nyala ba. Ŋina dʋɔ a gaa Ɩsʋɔ wɩɛ ŋii gbɩɛ ŋɩ yela sɛ ŋii dɩlɛ ŋii si bie ɩ. 20Bie ŋii ŋɩ sala tibi bam dʋɔ na n nyina bakpa baa ba nyii wɩɛ ŋii na, baa lɩɛ ŋɛ na baa si bie. Barɛ si nkuo na sala, barɛ dʋɔ ŋitoro sɛ barɛ dʋɔ gafie kii ŋii ba ŋmati na.>>
Fetila dʋɔ diduu
Luka 8:16-18
21Sɛ Yesu ti bɔrɛ jɔ diduu sɛ, <<Wʋrʋ baa tʋ fitila na wʋ a mʋ dinyiŋkpa fu ga dʋɔ yaa wʋ a mʋ dʋ mpa tie e. Baa tʋ fitila mʋ jaga fitila dɩjagatɩŋ bɛ. 22Akala takɩɛ bʋrʋkʋma gaa ga wɩsaɩ na, gaa lɩɩ na baa na. Dɩmʋŋ sɛ bʋrʋkʋma gaa ba fu ga dʋɔ na, gaa fulu dʋɔ na baa na. 23Wʋkʋma wʋŋ wʋ wɩɛna dɩla na, wʋ n nyii.>>
24Sɛ Yesu ju dʋɔ tawɩ sɛ, <<N kɩɛ na dieli wɩɛ ŋii ɩ nyii na dʋɔ. Mudu gaa ɩ mʋ kalaa bʋrʋ darɛ fa wʋrʋ na, gaa sɛ Ɩsʋɔ gba aja wʋ a mʋ kalaa fa amɩɛ, na wʋ a mʋ ŋarɛ kpi amɩɛ. 25Akala takɩɛ, wʋkʋma wʋŋ wʋ wɩɛna bʋrʋ garɛ na, Ɩsʋɔ aja mʋ ŋarɛ kpi wʋ dʋɔ. Ama wʋkʋma wʋŋ wʋ tana na, pii ŋii wʋ wɩɛna ŋɛ na, Ɩsʋɔ aja lɩɛ lɩɩ wʋ jaŋ.>>
Bie ŋarɛ dʋɔ diduu
26Sɛ Yesu ju dʋɔ tawɩ sɛ, <<Ɩsʋɔ Juori gaa kɩɛna bɛ takɩɛ farɩdɛ wʋrʋ wʋŋ wʋ ŋmati bie wʋ fʋɔ naŋ. 27Wʋ duo kʋlʋ saŋa kʋma na, wʋ a na gʋ bie ŋii a tu sɛ ŋii bɩɩ, ama gbɩɛ gaa ŋii mʋna dʋɔ sɛ ŋii bɩɩ na, wʋ ba jiŋ ŋ. 28Tibi gaa aaŋ yela sɛ gamɩsɛ ŋii a bɩɩ sɛ ŋii si bie. Ŋii chɩŋkpɩɛ tu, ŋii nɔgʋ na ŋii lʋrʋ pɔɩ sɛ ŋii bɩɩ. 29Ŋɩ bɩɩ na, farɩdɛ wʋŋ a mʋ luoji ju ga kara gamɩsɛ ŋii, akala takɩɛ ŋɩ karɩŋ saŋa talɛ.>>
Kpeli daŋ bi dʋɔ diduu
Matiyo 13:31-32; Luka 13:18-19
30Yesu tasɛ ba sɛ, <<Be bʋrʋ dʋɔ sɛ dɩɩ mʋ Ɩsʋɔ Juori gaa mʋ kɩɛsɩna yaa diduu gamʋɔ sɛ dɩ mʋ lɩsɛ tie? 31Ga kɩɛna takɩɛ kpeli daŋ bi gaa ga yɩɛ gapii daŋ bie ŋii baa duu na kpiniŋ naŋ. 32Gʋ ba duu ga na, gaa bɩɩ sɛ gaa yɩɛ daŋ janɛ dasɛ kpiniŋ naŋ sɛ gaa yɩɛ gayabɩsɛ na fʋagɩɛ, sɛ jimbisi a gaa yɩɛ gasɩsasɛ ga tɩba.>>
33Sɛ Yesu mʋ aduuna fɔɩ mʋ tawɩ Ɩsʋɔ wɩɛ kalaa ba ganaŋkʋ baa nyii tie. 34Wʋ n tawɩ wɩɛ ŋarɛ fa ba sɛ wʋ n jɔ diduu u. Ama dɩka wʋ na wʋ kpalɛnarɛ nyiŋeŋ na, wʋ a lɩsɛ aduuna ŋii tie wʋ a kalaa ba.
Yesu yela sɛ feliŋ janɛ cha kuruŋ
Matiyo 8:23-27; Luka 8:22-25
35Dɩmʋŋ wɩɩ gana bʋyanɔ, Yesu tawɩ wʋ kpalɛnara baa sɛ, <<N yela dɩ tɩɛsɛ ju gatɩɛsa.>> 36Sɛ wʋ kpalɛnara baa kʋlʋ yela bakpa fɔɩ baa jʋʋ cha buori gaa Yesu chaɩ ga tɩba na sɛ ba tɩɛsɛ ju gatɩɛsa. Bakpa barɛ gba wɩɛ buori garɛ naŋ ba kpamɩna ba. 37Gʋ baa ju na, sɛ feliŋ janɛ jɔ lɩɩ gaa dʋɔ sɛ dɩ jɔ apaa dʋ buori gaa naŋ hali ga ja gaa muru. 38Ama Yesu bɩrɛ, wʋ duo gaputu dʋɔ buori gaa wʋrʋgbɩɛ. Sɛ wʋ kpalɛnara baa feŋsi ɩ sɛ ba tawɩ ɩ sɛ, <<Wʋkalaasa, gʋ dɩ ja dɩ muru na, ŋɩ n tiri nyaŋ?>>
39Dɩmaŋ na sɛ Yesu kʋlʋ sɛ wʋ fʋba feliŋ ŋii dʋɔ sɛ wʋ tawɩ apaa ŋii sɛ, <<Chakuruŋ.>> Sɛ ŋɩ chakuruŋ.
40Sɛ Yesu tasɛ wʋ kpalɛnara baa sɛ, <<Be n yɩɛ sɛ nyɩŋtɩɛ chamɩna amɩɛ? Ɩ saŋ ɩɩ lɩɛdi bɛ?>>
41Gʋ ba na ŋii ŋɩ ju dʋɔ na, sɛ nyɩŋtɩɛ chaŋ ba sɛ ba tasɛ dɔŋa sɛ, <<Wʋkpa wʋ Mmʋɔ gba mɩnaŋ sɛ apaa na lɩŋ a nyii wʋ jaŋ nna?>>
Currently Selected:
Maakɩ 4: CLL
Highlight
Share
Compare
Copy
Want to have your highlights saved across all your devices? Sign up or sign in
2025 Ghana Institute of Linguistics Literacy amp Bible Translation
