Maakɩ 5
5
Yesu gɩŋ feliŋ sʋbʋ lɩɩ baalɛ wʋrʋ tɩba
1Yesu na wʋ kpalɛnara baa tɩɛsɛ Galaliya lɩɩ ju gatɩɛsa gaa ga wɩɛ Gerasa tibi dʋɔ. 2Gʋ Yesu lɩɩ buori gaa naŋ na, baalɛ wʋrʋ feliŋ sʋbʋ wɩɛ wʋ tɩba pala lɩɩ diwuutiŋ kɔŋ gaa jaŋi na ɩ. 3Diwuutiŋ dɩmaŋ sɛ wʋ chaɩ. Wʋrʋ taŋ wʋ a dɩlɛ mʋ dɩgbaraŋgbaraŋ gba pɔgʋ ɩ ɩ. 4Saŋa kʋma gaa ba mʋ dɩgbaraŋgbaraŋ pɔgʋ wʋ pamɩɛ na wʋ nafara na wʋ a ja ɩ ŋɛ. Wʋ doŋ dʋɔ, wʋrʋ taŋ wʋ a dɩlɛ pɔgʋ ɩ. 5Tɩɛ naa na ga tam kʋma, wʋ dɔŋ diwuutiŋ na bʋrɔŋ biesi dʋɔ wʋ a kuusi yela wʋ chamɩna bʋɛ wʋ a karɩɛ wʋ wʋsɛ.
6Gʋ wʋ na Yesu taŋasɛ na, wʋ se gaa luuŋ wʋ dʋna dʋɔ wʋ asanaŋ 7sɛ wʋ kuusi na doŋ sɛ, <<Yesu, Ɩsʋɔ Wʋjanɛ Bu. Be sɛ maŋ na nyaŋ wɩɛna dɩ yɩɛ? Maa sʋlʋ nyaŋ Ɩsʋɔ yɩrɛ naŋ sɛ n baa nyala maŋ.>> 8Wʋ tawɩ dɩmʋŋ, akala takɩɛ Yesu cha tawɩ feliŋ sʋbʋ wʋŋ sɛ, <<Nyaŋ feliŋ sʋbʋ lɩɩ baalɛ wʋŋ tɩba.>>
9Sɛ Yesu tasɛ ɩ sɛ, <<Sɩnɛ sɛ baa yagɛ nyaŋ?>> Sɛ wʋ lɩsɛ nʋɔ sɛ, <<Baa yagɛ maŋ sɛ Bɔlɩŋ, akala takɩɛ dɩ bɔlɩɛɩ.>>
10Sɛ wʋ sʋlʋ Yesu sɛ, <<N baa geŋ daa lɩɩ tibi gana dʋɔ.>>
11Na ɔvaaba dikpeŋ barɛ wɩɛ bʋrɔŋ garɛ jaŋ baa di. 12Sɛ feliŋ sʋbʋ wʋŋ sʋlʋ Yesu sɛ, <<Gɩŋ daa na dɩ ga jʋʋ ɔvaaba dikpeŋ baa tɩba.>> 13Sɛ Yesu fa ba gbɩɛ sɛ ba lɩɩ baalɛ wʋŋ tɩba ga jʋʋ ɔvaaba baa tɩba. Ɔvaaba baa bɔlɩŋ aja yɩɛ kɔrʋɔsɛ ala (2,000) se ga jʋʋ lɩɩ gaa naŋ sɛ ba sɩŋ.
14Gʋ ɔvaaba baa kɩɛra na ŋii ŋɩ tibi na, ba se ju dɩɛ gaa naŋ na fʋɔsɛ naŋ ga tawɩ wɩɛ ŋii fa bakpa. Dɩmʋŋ dʋɔ, bakapa ju ga kɩɛ ŋii ŋɩ tibi na. 15Gʋ ba kɔŋ Yesu jaŋ na, ba na baalɛ wʋŋ feliŋ sʋbʋ bɔlɩŋ cha ba wɩɛ wʋ tɩba na kparɛ wʋ fuona gagba wʋ chaɩ Yesu jaŋ, sɛ nyɩŋtɩɛ chaŋ ba. 16Baa ba na ŋii ŋɩ tibi na, ba kalaa fa baa ba kɔŋ dɩmaŋ na ganaŋkʋ baalɛ wʋŋ feliŋ sʋbʋ cha ba wɩɛ wʋ tɩba na kparɛ na ɔvaaba baa wɩɛ. 17Sɛ ba sʋlʋ Yesu sɛ wʋ n lɩɩ ba tibi dʋɔ.
18Gʋ Yesu bɔrɛ wʋ a ga jʋʋ buori gaa naŋ na, baalɛ wʋŋ Yesu gɩŋ feliŋ sʋbʋ wʋ tɩba na, sʋlʋ ɩ sɛ wʋŋ yela na wʋ na ɩ baa jʋʋ. 19Ama Yesu n kpa a sɛ wʋ tawɩ ɩ sɛ, <<Bɔrɛ ju n dɩɛ naŋ na nyaa ga tawɩ ŋii Ɩsʋɔ yɩɛ fa nyaŋ, na ganaŋkʋ wʋ wɩɩ n gɩyɔŋ na fa n lʋŋtina.>> 20Dɩmʋŋ dʋɔ, baalɛ wʋŋ ti bɔrɛ ju Dekapolisi#5:20 Dekapolisi tie akala sɛ dɩɛsɛ gifi tibi kpiniŋ dʋɔ ga tawɩ ŋii Yesu yɩɛ fa ɩ na. Sɛ dɩ yɩɛ wʋkʋma wina doba.
Yariyosi bu na alʋ wʋŋ wʋ tapʋ Yesu gagba na
Matiyo 9:18-26; Luka 8:41-56
21Gʋ Yesu na wʋ kpalɛnara baa ti bɔrɛ jʋʋ buori naŋ tɩɛsɛ ju gatɩɛsa na. Wʋ wɩɛ dɩmaŋ, sɛ bakpa fɔɩ gaa sila logo ɩ. 22Yudatina tʋm danɛ naŋ bɩnɩɛ baa tɩba wʋrʋ baa yagɛ ɩ sɛ Yariyosi kɔŋ dɩmaŋ. Gʋ wʋ na Yesu na, sɛ wʋ luuŋ wʋ nafara tie. 23Sɛ wʋ chɩdɩsɛ sʋlʋ ɩ sɛ, <<Mabu galibie a kili wʋ a ja wʋ a sɩŋ. Maa sʋlʋ nyaŋ, yela na dɩɩ ju na nyaa ga mʋ n pam jaga wʋ dʋɔ na wʋ a yu lʋm chʋɔ na wʋ a ju dʋɔ cha nkpa naŋ.>> 24Gʋ wʋ na Yesu mʋ gbɩɛ baa ju na, yela bakpa fɔɩ kpamɩna ba fuwei wʋ dʋɔ.
25Alʋ wʋrʋ asima ajɔyɩ bɩŋsɛ gifi ala cha wʋ wɩɛ bakpa fɔɩ baa tɩba. 26Wʋŋ wʋ warɩɛ wʋ aterembie kpiniŋ lʋmɩɛ Chɔra jaŋ sɛ nafʋɔ wʋ n yu alaŋfiya, ama dɩtɩɛna sɛ lʋm gaa nʋɔ yɩɛ doŋ. 27Gʋ alʋ wʋŋ nyii Yesu dʋɔ na, wʋ lɩɩ bakpa fɔɩ baa naŋ lɩɩna wʋ wʋrʋgbɩɛ sɛ wʋ mʋ wʋ pam ga tapʋ wʋ adugbe gagba, 28akala takɩɛ, wʋ tawɩ wʋ nyinaŋ sɛ, <<Ma dɩlɛ mʋ ma pam chaŋ wʋ adugbe gagba na, maa yu lʋm chʋɔ.>> 29Sɛ wʋ chaŋ Yesu gagba gaa naŋ, gabʋanaŋ sɛ asima ŋii ŋii jɔ ɩ na kena yela. Sɛ wʋ na wʋ wʋsɛ naŋ gʋ wʋ yu lʋm chʋɔ.
30Gabʋanaŋ sɛ Yesu jiŋ wʋ wʋsɛ naŋ gʋ doŋ ŋarɛ lɩɩ wʋ tɩba. Wʋ kɩɛ bakpa bɔlɩŋ baa naŋ logo sɛ wʋ tasɛ sɛ, <<Mmʋɔ n tapʋ ma adugbe gagba?>>
31Sɛ Yesu kpalɛnara baa lɩsɛ nʋɔ sɛ, <<Nyaŋ gba nya na gʋ bakpa fuwei n dʋɔ. Be n yɩɛ sɛ nya tasɛ sɛ Mmʋɔ n tapʋ nyaŋ?>>
32Ama Yesu a kɩɛ wʋ a logo wʋ a ja wʋŋ wʋ yɩɛ dɩmʋŋ na. 33Alʋ wʋŋ na gʋ asima ŋii karɛ na, wʋ mʋ nyɩŋtɩɛ na wʋsɛ selesi gaa luuŋ Yesu nafara tie sɛ wʋ tawɩ gasiŋteŋ gaa kpiniŋ fa ɩ. 34Sɛ Yesu tawɩ ɩ sɛ, <<Alʋ, n lɩɛdi chɔ nyaŋ. Pala wʋsɛfɩɛ naŋ, nya awʋrʋfʋɔ si gɩtɛ.>>
35Gʋ Yesu saŋ wʋ a tawɩ na, gabʋɔsɛ barɛ baa ba lɩɩ Yariyosi wʋŋ wʋ yɩɛ Yudatina tʋm danɛ naŋ bɩnɛ na waa dʋɔ kɔŋ gaa tawɩ ɩ sɛ, <<Nbu galibie sɩŋ. Be n yɩɛ sɛ n saŋ nyaa nyala wʋkalaasa wʋŋ?>>
36Ama Yesu n mʋ ba wɩɛ ŋii mʋ tʋŋ dɩtʋm m, sɛ wʋ tawɩ Yariyosi sɛ, <<N baa yela nyɩŋtɩɛ a chaŋ nyaŋ, nyaŋ bɩrɛ lɩɛ di.>>
37Yesu n yela wʋrʋ a kpaŋ ɩ ɩ amʋɔ Petero, Jamesi na wʋnabu Yohane. 38Gʋ ba tala Yariyosi waa dʋɔ na, Yesu na bakpa baa a wii doŋ dʋɔ. 39Yesu jʋʋ waa gaa dʋɔ, sɛ wʋ tasɛ ba sɛ, <<Be n yɩɛ sɛ ɩ wii doŋ dʋɔ? Galibie wʋŋ n sɩŋ ŋ, ama wʋ duo bɛ.>> 40Ama bakpa baa ba nyii wɩɛ ŋii na, ba mʋɩ ɩ. Sɛ wʋ yela sɛ ba lɩɩ asʋŋ, sɛ dɩkaka galibie wʋŋ lʋrʋda, na wʋ kpalɛnara batoro baa, sɛ ba jʋʋ danɛ gaa galibie wʋŋ duwei ga tɩba na.
41Wʋ chaŋ atatɛ wʋŋ tawɩ sɛ, <<Talita kum>>, tie akala sɛ galibie kʋlʋ. 42Gabʋanaŋ sɛ galibie wʋŋ kʋlʋ wʋ dɔŋ wʋ dɔŋ danɛ gaa naŋ [wʋ di bɩŋsɛ gifi ala]. Sɛ dɩ yɩɛ bakpa kpiniŋ doba. 43Sɛ Yesu dʋ ba sɛ ba n baa tawɩ wɩɛ ŋii fa wʋrʋ. Sɛ wʋ tawɩ ba sɛ ba n ja adiya fa ɩ na wʋ a di.
Currently Selected:
Maakɩ 5: CLL
Highlight
Share
Compare
Copy
Want to have your highlights saved across all your devices? Sign up or sign in
2025 Ghana Institute of Linguistics Literacy amp Bible Translation
