Maakɩ 7
7
Duluŋ akalaasa
Matiyo 15:1-9
1Farasitina na mbara bakalaasa baa barɛ lɩɩ Yerusalem dɩɛ naŋ kɔŋ gaa sila logo Yesu, 2sɛ ba na Yesu kpalɛnara barɛ gʋ ba n saŋ ba pamɩɛ na ŋii yɩɛ dɩchɩrɩchɩrɩ pɔɩ na baa di, ganaŋkʋ Farasitina ayɩɛsa kɩɛna na a. 3[Akala takɩɛ Farasitina na Yudatina kpiniŋ a kpaŋ ba duluŋ ayɩɛsa dʋɔ. Dɩmʋŋ dʋɔ baa di i, amʋɔ ba saŋ ba pamɩɛ iniesi saŋ lɩsɛ pɔɩ na baa di, ganaŋkʋ ba duluŋ ayɩɛsa akala na. 4Ba lɩɩ gɩyɩɛ naŋ kɔŋ na, baa di adiya a, amʋɔ ba saŋ ba pamɩɛ ganaŋkʋ ba ayɩɛsa akala na. Ba duluŋ ayɩɛsa ŋii baa kpaŋ dʋɔ na ŋarɛ n nyina takɩɛ gafisi, sapɩɛ bisi na nyɩnasɛ yalɛ.]
5Sɛ Farasitina na Mosesi mbara bakalaasa baa tasɛ Yesu sɛ, <<Be n yɩɛ sɛ n kpalɛnara baa ba aa kpaŋ daa duluŋ ayɩɛsa dʋɔ? Akala takɩɛ ba aa mʋ ba pamɩɛ na iniesi baa di (baa saŋ ba pamɩɛ na baa yɩɛ ba wʋsɛ dɩchɩrɩchɩrɩ pɔɩ na baa di i.)>>
6Yesu lɩsɛ nʋɔ sɛ, <<Wɩɛ ŋii Ɩsʋɔ ɔja Yisaya cha gbalɛ lɩɩna amɩɛ aluguusitina dʋɔ na yɩɛ gasiŋteŋ bɛ. Ba sabɩɛ Ɩsʋɔ wɩɛ naŋ sɛ,
<<<Bakpa bana, ba nʋɔ naŋ sɛ baa bu maŋ,
ama ŋɩ n lɩɩ ba agela naŋ ŋ.
7Ɩ tʋm maŋ kpakpuo, akala takɩɛ,
wʋkpa mbara sɛ ɩ kalaa.>#Yis 29:13.>>
8Sɛ Yesu ju dʋɔ tawɩ sɛ, <<Ɩ yela Ɩsʋɔ mbara sɛ ɩ kpaŋ amɩɛ duluŋ ayɩɛsa dʋɔ.>>
9Sɛ wʋ ti bɔrɛ tawɩ ba sɛ, <<Ɩ wɩɛna dɩsɛ fulu gbɩɛ gaa ɩ sɩmɩɛɩ dʋɔ ɩ yela Ɩsʋɔ mbara ŋii ɩ si laraŋ, na ɩ yu gbɩɛ kpaŋ amɩɛ duluŋ ayɩɛsa dʋɔ. 10Mosesi tawɩ mbara wɩɛ ŋii naŋ sɛ, <Bu njuo na nnaa,>#Ɛsa 20:12; Ditiro 5:6. na wʋkʋma wʋŋ wʋ a tawɩ wɩɛ baŋ wʋjuo yaa wʋnaa na, ŋɩ tiri gʋ ba n kʋ ɩ.>>#Ɛsa 21:17; Lɛf 20:9. 11Ama amɩɛ bɩrɛ, ɩ kalaa sɛ wʋkʋma n tawɩ wʋjuo yaa wʋnaa sɛ, <<Chɔna kʋma ŋii nyaa yu lɩɩ ma jaŋ na yɩɛ Kɔbaŋ [gaa ga tie akala sɛ gafaasa fa Ɩsʋɔ.] 12Dɩmʋŋ dʋɔ dɩ yela sɛ wʋ aa dɩlɛ kɩɛ wʋjuo yaa wʋnaa a. 13Dɩ kɔŋ dɩmʋŋ na, amɩɛ duluŋ ayɩɛsa ŋii ba yela si fa amɩɛ na dʋɔ ɩɩ di Ɩsʋɔ wɩɛ dʋɔ ɔ. Wɩɛ ŋii ŋɩ kɩɛna dɩmʋŋ na fɔɩ sɛ ɩ yɩɛ.>>
Bʋrʋ gaa gaa yela sɛ wʋkpa wʋsɛ a yɩɛ iniesi
Matiyo 15:10-20
14Yesu ti bɔrɛ yagɛ jama baa kɔŋ wʋ jaŋ sɛ wʋ tawɩ ba sɛ, <<Wʋkʋma n nyii ma jaŋ na ɩ nyii tie sɛ 15naa ŋii ŋɩ lɩɩ asʋŋ jʋʋ wʋkpa wʋsɛ naŋ na, aaŋ yela sɛ wʋ wʋsɛ a yɩɛ iniesi i. Ama bʋrʋ gaa gaa lɩɩ wʋ wʋsɛ naŋ na, aaŋ dɩlɛ yela na wʋ wʋsɛ a yɩɛ iniesi.>> 16[Wʋkʋma wʋŋ wʋ wɩɛna dɩla na wʋ n nyii.]#7:16 Naa Sabɩɛwɩɛ ŋii kpiniŋ n wɩɛna dɩmʋŋ wɩɛ ŋii na a
17Gʋ Yesu lɩɩ jama baa jaŋ ju waa dʋɔ na, wʋ kpalɛnara baa tasɛ ɩ diduu gaa tie. 18Sɛ Yesu tasɛ ba sɛ, <<Amɩɛ gba ɩŋ nyii tie? Naa ŋii ŋɩ lɩɩ asʋŋ jʋʋ wʋkpa wʋsɛ naŋ na aaŋ yela sɛ wʋ wʋsɛ a yɩɛ iniesi i. 19Akala takɩɛ ŋii ŋɩ jʋʋ wʋ digela naŋ, ama ŋii jʋʋ wʋ lori naŋ bɛ na ŋii lɩɩ.>> [Yesu tawɩ ŋina mʋ kalaa takɩɛ adiya kʋma ŋina yɩɛ chɩrɩchɩrɩ.]
20Wʋ ju dʋɔ tawɩ sɛ, <<Bʋrʋkʋma gaa ga lɩɩ wʋkpa wʋsɛ naŋ na, aaŋ yela sɛ wʋ wʋsɛ a yɩɛ iniesi. 21Akala takɩɛ wʋkpa digela naŋ sɛ dɩsʋbʋ kpiniŋ a lɩɩ ŋii kɔnɛ sɛ ŋii yela sɛ wʋ a yɩɛ dɩsʋbʋ takɩɛ nfɩɛrɛ asʋbʋɛ, danaŋburidi, ŋmɩɛlɩŋ, gatagapʋ, baalɛ wʋrʋgbɩɛ lɩɩ yaa alʋ wʋrʋgbɩɛ lɩɩ, 22dɩsɛchɩbɛ, kɔlɩŋ ayɩɛsa, pɩna, gɩjaga wɩɛ, ajʋʋnyaŋ, yɩrɛ warɩɛwʋ, gɩjaŋjanɛ na gɩmalaŋpʋrɛ. 23Dɩmʋŋ dɩsʋbʋ ŋina kpiniŋ aaŋ lɩɩ wʋkpa digela naŋ sɛ ŋii yela sɛ wʋ wʋsɛ a yɩɛ iniesi.>>
Giriki alʋ wʋrʋ lɩɛdi
Matiyo 15:21-28
24Yesu lɩɩ Galaliya lɩɩ nʋɔ ju Tirosi tibi dʋɔ. Wʋ jʋʋ waa garɛ dʋɔ na wʋ n ja sɛ wʋrʋ a jiŋ wʋ dʋɔ sɛ wʋ wɩɛ dɩmaŋ ŋ. Ama ŋɩ n dɩlɛ yɩɛ wɩɛ awɩsɛsa a. 25Alʋ wʋrʋ feliŋ sʋbʋ chaɩ wʋbu galibie tɩba, gʋ wʋ nyii Yesu dʋɔ na, gabʋanaŋ sɛ wʋ kɔŋ Yesu jaŋ sɛ wʋ gaa luuŋ wʋ asanaŋ. 26Alʋ wʋŋ yɩɛ Giriki wʋkpa bɛ, sɛ ba lʋrʋ ɩ Siro-Fonisiya tibi dʋɔ. Wʋ sʋlʋ Yesu sɛ wʋ n gɩŋ feliŋ sʋbʋ wʋŋ lɩɩ wʋ galibie wʋŋ tɩba.
27Sɛ Yesu tawɩ Giriki alʋ wʋŋ sɛ, <<N yela na bachaasɛ achɩŋkpɩɛ di pa pɔɩ. Akala takɩɛ dɩ n daga na baa mʋ bachaasɛ adiya fa paasɛ ɛ.>>
28Sɛ Alʋ wʋŋ tawɩ ɩ sɛ, <<Kpaŋjuo, yɩɛ gasiŋteŋ bɩrɛ ama paasɛ gba a duo tebulu tie baa di bachaasɛ ajarɩɛ bisi ŋii ŋɩ lɩɩ sala tibi na.>>
29Sɛ Yesu tawɩ alʋ wʋŋ sɛ, <<Ganaŋkʋ nya lɩsɛ nʋɔ na dʋɔ, bɔrɛ ju dɩɛ, feliŋ sʋbʋ wʋŋ lɩɩ nbu galibie wʋŋ tɩba.>>
30Gʋ wʋ ju waa dʋɔ na, wʋ ga na wʋbu galibie wʋŋ duwei mpa dʋɔ, feliŋ sʋbʋ wʋŋ lɩɩ wʋ tɩba.
Yesu chɔ baalɛ wʋrʋ wʋ yɩɛ kpawu na namu
31Sɛ Yesu lɩɩ Tirosi tibi dʋɔ sɛ wʋ mʋna Sidoŋ tibi dʋɔ ju Galaliya lɩɩ nʋɔ gaa ga wɩɛ Dekapolisi#7:31 Dekapolisi tie nyɩnasɛ dɩɛsɛ gifi tibi dʋɔ. 32Dɩmaŋ sɛ bakpa barɛ mʋ baalɛ wʋrʋ wʋ yɩɛ kpawu bɛ sɛ wʋ yɩɛ namu kɔŋ Yesu jaŋ. Sɛ ba sʋlʋ Yesu sɛ wʋ n mʋ wʋ pam jaga baalɛ wʋŋ dʋɔ na wʋ a chɔ ɩ.
33Sɛ Yesu mʋ baalɛ wʋŋ lɩɩ jama baa tɩba ju laraŋ. Sɛ wʋ mʋ wʋ pamɩɛ nyiŋbisi dʋ baalɛ wʋŋ dɩla naŋ. Sɛ wʋ tɔ mɩtalɩŋ jaga wʋ pam nyiŋbie dʋɔ sɛ wʋ mʋ tapʋ wʋ nʋɔ jʋlʋŋ. 34Yesu kɩɛ Ɩsʋɔ adugbe sɛ wʋ lɩɩ wuosi sala tɩba sɛ wʋ tawɩ baalɛ wʋŋ sɛ, <<Efata>> tie akala sɛ, <<fulu!>> 35Dɩmaŋ gana sɛ baalɛ wʋŋ dɩla fulu sɛ wʋ nʋɔ jʋlʋŋ buoli sɛ wʋ fara wʋ a tawɩ na dieli.
36Yesu jɔ ba nyienaŋ sɛ ba n baa tawɩ wʋrʋ ŋii ŋɩ yɩɛ na. Ama gʋ wʋ jɔ ba nyienaŋ na, yela ba saŋ baa jɔ wɩɛ ŋii dʋɔ dawuta. 37Sɛ dɩ yɩɛ bakpa baa kpiniŋ doba. Sɛ ba tawɩ sɛ, <<Wʋ yɩɛ bʋrʋkʋma gana na dieli. Wʋ yela sɛ akpawu gba a nyii wɩɛ sɛ anamu a tawɩ.>>
Currently Selected:
Maakɩ 7: CLL
Highlight
Share
Compare
Copy
Want to have your highlights saved across all your devices? Sign up or sign in
2025 Ghana Institute of Linguistics Literacy amp Bible Translation
