2 Ɩya-ɩya 14
14
1Gɛ Abiya e ku gɛ be lò wɔ ɔkʋn gɛtɛ bee kpèlè Dafidi ditele fɔ daanɩ. Gɛ wobi-teni Asa e di bugyu e sere wɔ bɩsɩrɩ. Asa bugyu buu gedi gaawi yaanɩ fɔ, olila wʋ sara gɩfɩɩ fɔ gaanɩ bɩkyan fwo.
Yuda wogyu Asa
2Asa ɛ mɛ ade gɛtɛ ɩ̀ kɔlɔ, gɛ ɩ̀ tʋna Yahwe, wɔ Wurubwarɛ bʋnʋn. 3E tiri bendeni boo bekpen boo gedi gaatɛkʋn fɔ, ma asʋmakʋn fɔ, gɛ e gbena akpen-taa fɔ, gɛ e kebi Asera wo-iyon fɔ ɛ fɩna. 4Gɛ Asa ɛ dɔ̀ Yuda bete alɛ bɛ tɛrɛma Yahwe, bootu ɛbɛ boo Wurubwarɛ fɔ gelenbi, fɔ bàà di wo-ise ma wade-wùlàlɛ fɔ. 5E tiri asʋmakʋn ma gedi gaatɛkʋn gɛtɛ bee kuma olifwi yii koro bɛ tɛ bekpen fɔ e ye ditele-kamasɛ gɛtɛ dɩ̀ sa Yuda gaanɩ, okoro olila wʋ sara wo bugyu buu gedi baanɩ. 6Gɛ e sere ɩpɔrɩ e silin Yuda atele olila wʋʋya wʋtɔkɔ waanɩ. Gɛ bɩkyan kpekpesi baanɩ fɔ, wɔkyʋnlɛ ɛkɩ ɛn mɛ amɩnlɛ alɛ ɛɛ̀ tà bɩtà ma ɛwɔ, yema Yahwe ɛ tɛ wɔ olila.
7Asa ɛ̀ dɔ̀ Yuda bɛnɩ alan, << Ɩ yɛ taà mara atele nyayɩ, fɔ tàà sere ɩpɔrɩ tɩ sa yɩ, fɔ tàà mara ayelakʋn-dɩyɛlɛ, ma itunu gɛtɛ taà sa yɩ awɔrɔnyan. Gɛtʋnkwaa fɔ gì di tiiyo, yema tɩ mɛ Yahwe, tii Wurubwarɛ fɔ gelenbi, gɛ ɛ yɛ olila wʋ ba wʋ tɛ tɩ. Okoro be sere atele fɔ, gɛ ade ɩ san gepe ɩ tɛ bɛ.
8Asa ɛ ka bɩtà bʋʋ bɛtàlɛ asepekyi fwo-ton (300,000) e ye Yuda gɛtɛ bè de awɔrɔnyan-dɩyɛlɛ-koro ma buturunyan, gɛ ɛ ka bɩtà bʋʋ bɛtàlɛ asepekyi fwo-anaa (280,000) e ye Benyamin gɛtɛ bè de awɔrɔnyan-dɩyɛlɛ-koro ma bɔɔ bɛgyangarɩ. Bɛnɩ nyabɛ powu bè di bɩtà bʋʋ bɛtɛlɛ gɛtɛ bɛ̀ ba oturu gepepe.
9Gɛ Etiyopiya-te Sera ɛ ka bɩtà bʋʋ bɛtàlɛ dɩtɩnpan, ma tiiramisan ɛbɛ gɛkpɩn ma akpilin-ton (300) bàà ma kpà ma Yuda bete. Gɛ bɛ san bɛ ma gyu sɩyɛɛ Maresa. 10Gɛ Asa ma wɔ bɩtà bʋʋ bɛtàlɛ bɛ ma tuma bɛ bàà tà bɩtà. Ɛkamasɛ ɛ pɩna koro e yela ɛ tɛ akpa Sefata dɩtagba daanɩ gbɛma Maresa.
11Ɛwʋ gɛ Asa e tiri onyun ɛ tɛ Yahwe, wo Wurubwarɛ alan, <<Ɛkɩ ɛn ma anlɛ awɔ gɛtɛ eè to ɛfɔbɩlɩlɛ e ye ɛkɛmalɛ gʋlɔ gaanɩ. Oo Yahwe, tii Wurubwarɛ, kpà tɩ, yema tɩɩ bʋnʋn bʋ̀ gyaga gɛ aa koro, gɛ aa diyere daanɩ gɛ tɩ ba tàà bɛ tà bɩtà ma bɩtà bʋʋ bɛtàlɛ dɩtɩnpan nyadɩ lɛ. Oo Yahwe, awɔ n di tii Wurubwarɛ, kara yɛ ɛnɩ èè di aa koro.>>
12Gɛ Yahwe ɛ yɛ Yuda bete be di Etiyopiya bete fɔ boo koro, gɛ Etiyopiya bete fɔ be serenti. 13Gɛ Asa ma wɔ bɩtà bʋʋ bɛtàlɛ bɛ kpà bɛ gyaga boo koro bɛ ma ye sɩyɛɛ Gera. Etiyopiya bɩtà bʋʋ bɛtàlɛ fɔ powu be ku. Yahwe ma wɔ bɩtà bʋʋ bɛtàlɛ be di boo koro. Gɛ Yuda bɩtà bʋʋ bɛtàlɛ fɔ be kpila anyan kpekpesi bɛ da. 14Ɛwʋ gɛ bɛ muru atele gɛtɛ i silin Gera i tuma fɔ powu, gɛ Yahwe ɛ yɛ gɩsaa gɩ̀ gyu bɛ. Gɛ Yuda bɩtà bʋʋ bɛtàlɛ fɔ be kpila anyan kpekpesi gɛtɛ ɩ̀ sa atele fɔ yaanɩ fɔ powu. 15Be biri bɛ kpà ma bɛnan boo betonlɛ ma bɔɔ bɛnan gɛtɛ bɛ̀ sa getitebi dʋkɔ fɔ, gɛ be gye bɔɔ bɛyɛran, ma begbebi, ma akpɔŋɔ kpekpesi. Gɛ be biri bɛ da Yerusalem.
Currently Selected:
2 Ɩya-ɩya 14: ADE
Highlight
Share
Compare
Copy
Want to have your highlights saved across all your devices? Sign up or sign in
2025 Ghana Institute of Linguistics Literacy and Bible Translation