2 Ɩya-ɩya 15
15
Asa e foma ade
1Ɔya wʋkɩ waanɩ fɔ, Wurubwarɛ Gifiye gɩ ba Odedi wobi Asariya wo koro. 2Gɛ ɛ san ɛ ma tuma egyu Asa, gɛ ɛ dɔ̀ wɔ alan, <<Egyu Asa ma Yuda ma Benyamin bɛnɩ powu, ɩ nʋn maakʋn, Yahwe ɛ̀ sa ma ɛyɩ ɔya-kamasɛ gɛtɛ ɛyɩ mɔ ɩ̀ sa ma ɛwɔ fɔ. Gengyi ɩ̀ ka yɩɩ bʋnʋn ɩ gyaga wo koro fɔ, ɛɛ̀ kpà yɩ. Mɔ gengyi ì fi gama i ten wɔ fɔ, eè fi gama i ten yi. 3Ɔya kpekpesi wʋ lɛ gɛtɛ Isareli bete bɛn nyɩ̀ nʋnkwarɩ wo Wurubwarɛ fɔ, gɛ bɛn ma gedi gɩɩtɛlɛ ɛkɩ gɛtɛ èè wùlà bɛ ade, gɛ bɛn ma ose wʋkɩ. 4Mɔ bɔɔ dɩyɩyɛ daanɩ fɔ be fi bɛ ba Yahwe, Isareli wo Wurubwarɛ wakʋn, be bugiti wɔ gɛ be we wɔ. 5Awi ɩtɔkɔ yaanɩ fɔ, wʋ̀ ba gɩsaa gɛtɛ ɛkɩ ɛ̀ɛ̀ san osele fɔ èè biri ba olila waanɩ, yema ade-karankaran ɩ̀ sa gɛtʋnkwaa fɔ gɩɩkʋn-kamasɛ. 6Gɩfɩɩ gɩkɩ gɩɩ nyanla gɩfɩɩ-do, fɔ ditele dɩkɩ dɩɩ nyanla ditele-do. Yema Wurubwarɛ è de dɩfana-kamasɛ ɛɛ nyanla bɛ. 7Mɔ ɛyɩ bɩrɛ, ɩ sa koro ɔkɛma, fɔ yàà wura oturu, yema yaà wura yɩɩ gʋtʋn gii gutoro gii gele.>>
8Gɛtɛ Asa ɛ nʋn gɛlɛ gaade nyayɩ, ma ade gɛtɛ Wurubwarɛ ɛ dama Odedi wobi Asariya wo koro ɛ tabʋrʋ fɔ, e wura koro ɔkɛma. Gɛ e tiri bekpen gɛtɛ wù di Yahwe wade-kyʋnlɛ gɛtɛ bɛ̀ sa Yuda ma Benyamin ntʋnkwaa powu baanɩ, ma atele gɛtɛ e gye yɩ bɩtà, gɛ ɩ̀ sa Efrayim wo-idon yii koro fɔ yaanɩ. Gɛ ɛ pɩna Yahwe gedi gɩɩ gɛtɛ̀kʋn gɛtɛ gɩ̀ sa Dikwo-dɩrɛ dɩɩ dɩkpaara dii getite fɔ.
9Bɛnɩ kpekpesi be ye Efrayim, ma Manase, ma Simeyon boo-ifoli yaanɩ bɛ bɛ fɩya ma egyu-dɩrɛ Asa, gɛ bɛ sara ma ɛwɔ. Yema be we gɛtɛ Yahwe, Asa wo Wurubwarɛ fɔ ɛ̀ sa ma ɛwɔ. Gɛ Asa ɛ kʋla bɛ powu ma Yuda bɛnɩ ma Benyamin bɛnɩ.
10Be tuma Yerusalem Asa bugyu buu gedi bʋʋ gɩkyan fwo-tonfɛ, giibon-siyeefɛ wanɩ. 11Ɔya wʋtɔkɔ waanɩ fɔ, bɛ ka bɛkwɔ nkpɩn bisiyee ma akpilin-ton (700), ma bɛyɛran ɩgbaa isiyee ma nkpɩn-ton (7,000), ma begbebi gɛtɛ be kpila be ye akpa yaanɩ bɛ ba fɔ, bɛ tɛ Yahwe gedi. 12Gɛ bɛ tà dikola gɛtɛ baà ka booturu ma bɔɔkala powu bɛ sʋma Yahwe, bootu ɛbɛ boo Wurubwarɛ fɔ. 13Ebi oo, ɛndɩrɛ oo, eteni oo, ɛnanɩ oo, ɛnɩ-kamasɛ gɛtɛ ɛn nan sʋma Yahwe, Isareli wo Wurubwarɛ fɔ, baà wolo wɔ. 14Gɛ bɛ ka gɩta-dɩrɛ bɛ kan ntam Yahwe diyere daanɩ alɛ baà di dikola fɔ dii koro, gɛ be fʋn akantan ma bɛnan baayela. 15Yuda bɛnɩ powu be di ɔsɛ dikola gɛtɛ bɛ tà fɔ dii koro, yema bɛ tà dɩ booturu powu waanɩ. Bɛ ka ɔsɛ bɛ sʋma Yahwe, gɛ ɛ nʋn bɛ, gɛ ɛ tɛ bɛ olila ofèn-kamasɛ.
16Nkele mɔ Egyu-dɩrɛ Asa e tɔ̀là wonu Maaka gɛtɛ è di egyu-nanɩ fɔ gɛbɩya, yema e sere ekpen Asera wo-iyon gɛtɛ wù di ade-kyʋnlɛ. Asa e kebi wʋ ɛ fɩna gɛ e kuma wʋ Kidiron dɩtagba daanɩ. 17Ma gɛtɛ Asa en tiri asʋmakʋn gɛtɛ ɩ̀ sa Isareli dʋkɔbɛ gba fɔ, ɛ ka waamɩnlɛ powu ɛ gyaga gɛ Yahwe wo koro wɔnkpa awi powu yaanɩ. 18Ɛ ka sɩka-fututu ma sɩka-sɩya ma anyan-gbaa-gbaa gɛtɛ ɛwɔ ma wote ɛbɛ bɛ ka bɛ tɛ Yahwe fɔ ɛ ba Yahwe Dikwo-dɩrɛ fɔ daanɩ.
19Okoro akpa ɩkɩ ɩn mɩnɩ sere ka ma ye wo bugyu buu gedi buu gɩkyan dikpilin ma fwo-tonfɛ gaanɩ.
Currently Selected:
2 Ɩya-ɩya 15: ADE
Highlight
Share
Compare
Copy
Want to have your highlights saved across all your devices? Sign up or sign in
2025 Ghana Institute of Linguistics Literacy and Bible Translation