2 Ɩya-ɩya 30
30
Hesekiya ɛ pɩna koro ɛ tɛ Gɛkààrà-da gii duwi dii gedi
1Hesekiya ɛ tɩyɛma Isareli bete ma Yuda bete powu ɔtʋn, gɛ ɛ ŋwara akpa e kpèlè Efrayim ma Manase bɛnɩ alɛ bɛ ba Yerusalem, Yahwe Dikwo-dɩrɛ fɔ daanɩ bàà di Gɛkààrà-da gii duwi fɔ bɛ tɛ Yahwe, Isareli bete boo Wurubwarɛ fɔ.
2Egyu-dɩrɛ ma wɔ bɛndɩrɛbi ma bɛnɩ dikpi gɛtɛ bɛ sa Yerusalem fɔ powu bɛ dɔ̀ alɛ baà di Gɛkààrà-da gii duwi fɔ ebon-nyɔɔfɛ fɔ waanɩ. 3Ben te di Gɛkààrà-da gii duwi ɔyɛ-kpara waanɩ nya yema gedi gɩɩ bɛtɛlɛ gɛtɛ bɛ kpa koro dɩdɩɩ fɔ bɛn sɔ, gɛ bɛnɩ ben te tuma Yerusalem asɔ waanɩ.
4Okoro amɩnlɛ gɛtɛ bɛ ka fɔ ɩ sara ma egyu-dɩrɛ ma bɛnɩ dikpi fɔ powu. 5Bɛ dɔ̀ gɛtɛ baà kpèlè bɛnɩ be ye Isareli anɩ powu, ye Beseba ma ye Dan. Baà kpèlè bɛnɩ bɛ ba Yerusalem bàà bè di Gɛkààrà-da gii duwi fɔ bɛ tɛ Yahwe, Isareli bete boo Wurubwarɛ fɔ. Ben te biri di duwi fɔ asɔ yaanɩ anlɛ gɛtɛ Ose fɔ wuu wùlà fɔ.
6Egyu-dɩrɛ ma wɔ bɛndɩrɛbi bɛ ŋwara akpa, gɛ bɛ sa bɛnɩ bɛ ka yɩ san Isareli ma Yuda. Ade gɛtɛ bɛ ŋwara fɔ n di alan, <<Isareli bete, I biri ɩ ba Yahwe, Abraham ma Isaki ma Isareli wo Wurubwarɛ fɔ wakʋn, fɔ ɛwɔ mɔ èè biri ba ɛyɩ gɛtɛ i kuruma gɛtɛ i serenti i ye Asiriya wogyu gʋlɔ gaanɩ fɔ yaakʋn. 7Ɩ kara mɛ anlɛ yiitu ɛbɛ, ma yɩɩdɩrɛ ɛbɛ gɛtɛ ben di nʋnkwarɩ tɛ Yahwe, boote ɛbɛ boo Wurubwarɛ fɔ, gɛ ɛ yɛ bɛ be biligi gɛmʋmwa-yoli gɩɩ bɛnɩ, anlɛ gɛtɛ ii we lɛ. 8Ɩ kara mɛ oturu-kɛma anlɛ gɛtɛ yiitu ɛbɛ bɛ mɛ fɔ. Ɩ ka koro ɩ tɛ Yahwe. Ɩ ba ɔkʋn fɩrɩnfɩrɩn-kʋn gɛtɛ ɛ kpa dɩdɩɩ gakpaagakpa fɔ. Ɩ sʋma Yahwe, yii Wurubwarɛ fɔ, fɔ èè kere wowurufa-dɩrɛ fɔ ya. 9Gengyi ì biri ɩ ba Yahwe wakʋn fɔ, bɛnɩ gɛtɛ be gye yɩɩ bɛnɩ gɩdɩ̀ fɔ baà we boo gutunkoro, fɔ baà kere bɛ bɛ ya bàà biri ba gɛtʋnkwaa nyagɩ gaanɩ, yema Yahwe, yii Wurubwarɛ fɔ è di gɛbwala giite ma gutunkoro giiwulalɛ. Gengyi ì biri ɩ ba wakʋn fɔ, ɛn nan tiri wɔ bʋnʋn e ye yii koro.
10Gɛ bɛsalɛ fɔ bɛ san Efrayim ma Manase boo-ifoli yaatele-atele yaanɩ, ka ma ye Sebulun wofoli waanɩ, mɔ bɛnɩ fɔ bɛ mʋmwa bɛ, gɛ bɛ sa bɛ dɩkpàtà. 11Mɔ Asa, ma Manase, ma Sebulun wo-ifoli yɩɩ bɛnɩ bɛkɩ bɛ nʋn baakʋn, gɛ bɛ san Yerusalem. 12Gɛlɛ ke gɛ Yuda mɔ anɩ fɔ, Wurubwarɛ ɛ kya bɛnɩ fɔ boo-ituru, gɛ bɛ mɛ onyun-kɩlɩn gɛtɛ bàà di Yahwe wade gɛtɛ egyu-dɩrɛ ma wɔ bɛndɩrɛbi bɛ dɔ̀ fɔ yii koro.
13Bɛnɩ dɩtɩnpan be tuma Yerusalem bàà di boroboro gɛtɛ bɛn sa gɩfa-ŋanlɛ fɔ wɔsɛ wuu gedi ebon-nyɔɔfɛ fɔ wanɩ. 14Be tiri bekpen boo gedi gaatɛkʋn fɔ, ma olifwi wuu gedi gaatɛkʋn fɔ, gɛ bɛ ka yɩ bɛ ma fun bɛ sa Kidiron dɩtagba daanɩ.
15Be wolo Gɛkààrà-da gɩɩyaran fɔ ebon-nyɔɔfɛ fɔ wo duwi fwo-naafɛ daanɩ. Gɛ gedi gɩɩ bɛtɛlɛ ma Lefi bete fɔ bɔɔ bʋnʋn bu ku, gɛ bɛ kpa koro dɩdɩɩ, gɛ bɛ tɛ gekuma gii gedi Yahwe Dikwo-dɩrɛ fɔ daanɩ. 16Ɛwʋ gɛ be biri bɛ ma yela baayelakʋn, anlɛ gɛtɛ Wurubwarɛ wɔnɩ Mose Wose fɔ wuu wùlà fɔ. Gɛ Lefi bete fɔ bɛ ka nkalan gɛtɛ gedi gɩɩ bɛtɛlɛ fɔ bɛ ka bɛ tɛ fɔ bɛ ŋwan gedi gɩɩ gɛtɛkʋn fɔ gii koro. 17Gɛtɛ dikpi bɛnɩ kpekpesi bɛn ta kpà koro dɩdɩɩ okoro, Lefi bete na wolo Gɛkààrà-da gɩɩ bɛyɛran fɔ bɛ tɛ ɛbɛ powu gɛtɛ boo koro gin fere, gɛ wun pe gɛtɛ bàà talɩ wolo ɛbɛ gbagba bɔɔ bɛyɛran bɛ tɛ Yahwe fɔ. 18Ma gɛtɛ bɛnɩ kpekpesi gɛtɛ be ye Efrayim, ma Manase, ma Isaka, ma Sebulun boo-ifoli yɩɩ bɛnɩ bɛn kpa koro dɩdɩɩ fɔ, be di Gɛkààrà-da gaanyandilɛ fɔ, gɛtɛ wʋn san ma anlɛ gɛtɛ bɛ ŋwara bɛ sɩ̀ fɔ. Mɔ Hesekiya e tiri onyun ɛ tɛ bɛ alan, <<Wurubwarɛ gɛtɛ ɛ̀ kɔlɔ fɔ, ɛ ka ɛ kyɛ ɛnɩ-kamasɛ 19gɛtɛ wɔ bʋnʋn bʋ̀ gyaga Yahwe, bootu ɛbɛ boo Wurubwarɛ fɔ wo koro, gengyi boo koro gin fere anlɛ gɛtɛ Dikwo-dɩrɛ dii-ise ii wùlà gba fɔ.>> 20Ɛwʋ gɛ Yahwe ɛ nʋn Hesekiya wonyun-tiri, gɛ ɛ ka ɛ kyɛ bɛnɩ fɔ.
21Gɛ Isareli bete gɛtɛ bɛ̀ sa Yerusalem fɔ bɛ ka ɔsɛ-dɩrɛ be di boroboro gɛtɛ bɛn sa gɩfa-ŋanlɛ fɔ, duwi n di duwi awi kwarankɩ. Fɔ Lefi bete ma gedi gɩɩ bɛtɛlɛ fɔ bè de Yahwe wɔ-ɩnʋn yɩɩ gɛnʋma gaanyan fɔ gɛ bɛɛ nʋma ɩnʋn be sila Yahwe.
22Gɛ egyu-dɩrɛ Hesekiya e sila Lefi bete gɛtɛ be yera bɛ bɛ sʋma Yahwe fɔ. Awi kwarankɩ fɔ powu fɔ, be di gɛ anyandilɛ fɩrɩnfɩrɩn fɔ. Gɛ bɛ tɛ olila wuu gedi, gɛ be sila Yahwe, bootu ɛbɛ boo Wurubwarɛ fɔ.
23Gɛ Bɛnɩ dikpi fɔ powu bɛ dɔ̀ be yera alɛ baà biri bɛ awi kwarankɩ be di ɔsɛ-dɩrɛ fɔ. Okoro be biri bɛ ka awi kwarankɩ be di ɔsɛ fɔ. 24Yuda wogyu-dɩrɛ Hesekiya ɛ tɛ bɛkwɔ-teni nkpɩn ton (1,000), ma bɛyɛran ma begbebi ɩgbaa isiyee ma nkpɩn ton (7,000). Gɛ wɔ bɛndɩrɛbi fɔ mɔ bɛ tɛ bɛkwɔ-teni nkpɩn ton (1,000) ma bɛyɛran ma begbebi ɩgbaa ton (10,000). Gɛ gedi gɩɩ bɛtɛlɛ kpekpesi bɛ kpa koro dɩdɩɩ 25Ɛwʋ gɛ wʋ mɛ Yuda bɛnɩ dikpi fɔ powu, ma gedi gɩɩ bɛtɛlɛ, ma Lefi bete powu gɛtɛ be ye Isareli fɔ, ma besela gɛtɛ bè si Yuda fɔ ɔsɛ. 26Gɛ ɔsɛ-dɩrɛ wʋ ba Yerusalem, yema ye Isareli wogyu Dafidi wobi Solomon wawi yaanɩ bè ye ma ǹdò fɔ, ade ɩkɩ anlɛ in te biri sere Yerusalem ɩ nya. 27Ɛwʋ gɛ gedi gɩɩ bɛtɛlɛ fɔ ma Lefi bete fɔ bɛ tɔ be yela be hira bɛnɩ fɔ, gɛ Wurubwarɛ ɛ nʋn boonyun-tiri e ye gatala.
Currently Selected:
2 Ɩya-ɩya 30: ADE
Highlight
Share
Compare
Copy
Want to have your highlights saved across all your devices? Sign up or sign in
2025 Ghana Institute of Linguistics Literacy and Bible Translation