2 Ɩya-ɩya 31
31
1Gɛtɛ ade nyayɩ powu i were fɔ, Isareli bete gɛtɛ bɛ̀ sa dʋkɔbɛ fɔ bɛ san Yuda watele fɔ yaanɩ, gɛ bɛ ma gbena akpen-taa fɔ, gɛ be kebi Asera woyon fɔ. Be gbena asʋmakʋn fɔ, ma gedi gaatɛkʋn gɛtɛ ɩ̀ sa Yuda, ma Benyamin, ma Efrayim, ma Manase boo-ifoli yaanɩ fɔ. Gɛtɛ be muru yɩ powu be were fɔ, Isareli bete fɔ powu be biri bɛ da baasarakʋn, baatele yaanɩ.
Dɩsʋma daanyan yɩɩ gɛtɛ̀
2Hesekiya e yo gedi gɩɩ bɛtɛlɛ fɔ ma Lefi bete fɔ ɛ sa bɔɔ bʋtʋn baakpi yaanɩ, fɔ bàà tɩ tɛ gekuma gii gedi ma olila wuu gedi, fɔ bàà mɛ dɩsʋma dɩɩ gʋtʋn, fɔ bàà tɩ yela wɔ gɛsarakʋn fɔ giitunu ka onyun wʋʋ gɛsa ma gesila gɩɩ-ɩnʋn bɛ tɛ Yahwe. 3Egyu-dɩrɛ e tiri ɛwɔ gbagba wanyan ɛ tɛ gagyɩgyan ma ɔgyɔlɔ yii gekuma gii gedi, ma Duwi-Tunalɛ dii gekuma gii gedi, ma Ebon-Fon wɔsɛ wuu gedi, ma ɩsɛ gɛtɛ bɛ ŋwara yaade Yahwe Wose yaanɩ fɔ yii gedi. 4Gɛ ɛ dɔ̀ bɛnɩ gɛtɛ bè si Yerusalem fɔ gɛtɛ bàà tì tiri gedi gɩɩ bɛtɛlɛ ma Lefi bete booyo gedikʋn bɛ tɩ̀ tɛ bɛ fɔ bàà talɩ ka koro bɛ mɛ gʋtʋn gɛtɛ Yahwe Wose fɔ wʋ dɔ̀ bɛ alɛ bɛ mɛ fɔ. 5Gɛtɛ ɛ bɔ ɛ dɔ̀ bɛnɩ fɔ ade nyayɩ e were fɔ, Isareli bete bɛ tɛ yaanyan-gyangbasɛlɛ gɛtɛ be sila be ye bii-ili yaanɩ fɔ be ye booturu waanɩ. Bɛ ka afɩnaa, ma wayɩn-fon, ma olife bʋnɔ, ma ɛŋɔɔ, ma oli wanyan-kamasɛ bɛ ba. Bɛ tiri gɩnyan-kamasɛ gii dikpen-fwofɛ bɛ ba asɔ yaanɩ. 6Isareli bete ma Yuda bete gɛtɛ bè si Yuda watele yaanɩ fɔ mɔ be tiri bɔɔ bɛkwɔ ma bɔɔ bɛyɛran baanɩ dikpen-fwofɛ, ma anyan gɛtɛ bɛ mɛ fɩrɩnfɩrɩn yii dikpen-fwofɛ bɛ tɛ Yahwe, boo Wurubwarɛ fɔ, gɛ bɛ kʋla yɩ kpekpesi. 7Be sere ade nyayɩ yɩɩ gɛmɛ ye ebon-siyeefɛ fɔ waanɩ, gɛ be werema yɩ ebon kwarankɩfɛ waanɩ. 8Gɛtɛ egyu Hesekiya ma wɔ bɛndɩrɛbi fɔ be be we anyan gɛtɛ bɛ kʋla fɔ, be sila Yahwe boo Wurubwarɛ fɔ, gɛ be hira wɔ bɛnɩ Isareli bete.
9Gɛ egyu Hesekiya e lila gedi gɩɩ bɛtɛlɛ ma Lefi bete fɔ ɔkʋn gɛtɛ anyan kpekpesi fɔ i ye.
10Gɛ gedi gɩɩtɛlɛ Asariya gɛtɛ è di gedi gɩɩ tɛlɛ bɔndɩrɛ ye Sadoki dɩkpaara daanɩ fɔ e tiri wuunyun alan, <<Bo ye gɛtɛ bɛnɩ be sere ɔpɩ bɛɛ ka anyandilɛ bɛ ba Yahwe Dikwo-dɩrɛ daanɩ fɔ, ti wura akɩ ti di ti kuruma kpekpesi, yema Yahwe e hira wɔ bɛnɩ.>>
11Gɛ egyu Hesekiya ɛ dɔ̀ bɛ alɛ bɛ pɩna akwo gɛtɛ bɛɛ sɩ̀ anyandilɛ yaanɩ Yahwe Dikwo-dɩrɛ fɔ daanɩ fɔ. Gɛ bɛ mɛ anlɛ gɛtɛ ɛ dɔ̀ fɔ. 12Gɛ bɛ ka anyan-tɛlɛ, ma anyan dikpen-fwofɛ, ma anyan gɛtɛ bɛ mɛ fɩrɩnfɩrɩn bɛ tɛ Yahwe fɔ powu bɛ bɛ sɩ̀ akwo fɔ yaanɩ. Gɛ bɛ yɛ Lefi-te Konaniya ɛ nya anyan fɔ yii koro, fɔ wonobi Simeyi ndi wɔkpàlɛ.
13Gɛ egyu Hesekiya ma gedi gɩɩtɛlɛ Asariya be tiri Yehiyeli, ma Asasiya, ma Nahati, ma Asaheli, ma Yerimoti, ma Yosabadi, ma Eliyeli, ma Isimakiya, ma Mahati, ma Benayiya alɛ bɛ mɛ gʋtʋn Yahwe Dikwo-dɩrɛ fɔ daanɩ, Konaniya ma wonobi bɔɔ gatɩn.
14Lefi-te Imina wobi-teni Kore gɛtɛ ɛɛ nya ofila wʋʋ gɛtàkʋn giitunu fɔ, ntɛ nya gedi gɩɩ gɛtɛ̀ gɛtɛ gi ye oturu waanɩ fɔ yii koro. Ɛwɔ nte yo anyan gɛtɛ bɛɛ tɛ Yahwe Dikwo-dɩrɛ fɔ daanɩ fɔ, gɛ ɛɛ mɛ yɩ fɩrɩnfɩrɩn.
15Eden, ma Miniyamin, ma Yesuwa, ma Semayiya, ma Amariya, ma Sekaniya ntɛ kpà wɔ ma anyan yii geyo atele gɛtɛ gedi gɩɩ bɛtɛlɛ bɛ̀ sa yaanɩ fɔ. Be yo anyan fɔ bɛ tɛ bɛndɩrɛ ma bebi powu kyɛkyɛ anlɛ gɛtɛ akpen fɔ ɩ̀ dɔ.
16Nkele mɔ, be yo bɛ tɛ beteni gɛtɛ be di bɩkyan bisiyee ka bʋn gɛtɛ bɛ ŋwara baayere bɛ sa gewo-tama gɩɩ gɩkpa gaanɩ fɔ. Ɛbɛ powu gɛtɛ baà gyu Yahwe Dikwo-dɩrɛ daanɩ duwi ndi duwi bɛ mɛ bɔɔ gʋtʋn anlɛ gɛtɛ bɛ tɛ bɛ gʋtʋn alɛ bɛ mɛ baakpen yaanɩ fɔ. 17Gɛ be yo bɛ tɛ gedi gɩɩ bɛtɛlɛ gɛtɛ bɛ ŋwara baayere dɩkpaara-dɩkpaara bɛ sa gewo-tama gɩɩ gɩkpa gaanɩ fɔ, gɛlɛ ke gɛ bɛ tɛ Lefi bete gɛtɛ be di bɩkyan dikpilin ka bʋn fɔ anlɛ gɛtɛ bɔɔ gʋtʋn ma baakpen ɩ̀ dɔ fɔ. 18Gɛ bɛ ka bebi, ma bɛna-kpasɔ, ma bebi-teni, ma bebi-nanɩ gɛtɛ bɛ̀ sa gɩfɩɩ fɔ gaanɩ powu gɛ bɛ ŋwara baayere bɛ sa gewo-tama gɩɩ gɩkpa gaanɩ fɔ bɛ fɩya. Yema be di nʋnkwarɩ gɛtɛ bɛ kpa koro dɩdɩɩ.
19Gɛ gedi gɩɩ bɛtɛlɛ gɛtɛ bè di Aaron wodu wʋʋ bɛnɩ fɔ bɩrɛ, ɛbɛ gɛtɛ bè si gɛtʋnkwaa-kpara gɛtɛ gi silin baatele fɔ, abɛɛ atele kurumakyɛɛ yaanɩ fɔ, be tiri bɛnɩ bɛ sɩ̀ gɛtɛ bàà tɩ̀ tɛ eteni-kamasɛ gɛtɛ ɛ̀ sa baanɩ fɔ anyandilɛ, ma ɛbɛ gɛtɛ bɛ ŋwara baayere bɛ sa Lefi bete boo gewo-tama gɩɩ gɩkpa gaanɩ fɔ.
20Anlɛ gɛ Hesekiya ɛ mɛ Yuda powu anɩ. Ɛ mɛ ade gɛtɛ ɩ̀ kɔlɔ, gɛ ɩ̀ tʋna, gɛ e di nʋnkwarɩ ɛ tɛ Yahwe, wɔ Wurubarɛ fɔ. 21Gɛ ade powu gɛtɛ ɛ mɛ Wurubwarɛ Dikwo-dɩrɛ daanɩ fɔ, e di Wurubwarɛ wose ma wade wùlàlɛ fɔ yii koro. E len Wurubwarɛ, gɛ ɛ ka woturu powu ɛ mɛ gʋtʋn. Gɛlɛ wuu koro ade i pe ɩ tɛ wɔ.
Currently Selected:
2 Ɩya-ɩya 31: ADE
Highlight
Share
Compare
Copy
Want to have your highlights saved across all your devices? Sign up or sign in
2025 Ghana Institute of Linguistics Literacy and Bible Translation