2 Ɩya-ɩya 32
32
Asiriya wogyu Senakeribi ɛ sʋ Yuda ɛ sa
1Ade gɛtɛ Hesekiya ɛ mɛ powu lɛ wʋʋ gama fɔ, Asiriya wogyu-dɩrɛ Senakeribi ɛ ma sʋ Yuda ɛ sa. Ɛ sʋ watele ma ɔkɛma fɔ ɛ sa, ma dɩmɩnlɛ gɛtɛ ee gye bɛ bɩtà. 2Gɛtɛ Hesekiya e we alɛ Senakeribi ɛ ba, gɛ è len ɛ̀ɛ̀ kpà ma Yerusalem fɔ, 3ɛwɔ ma wɔ bɛndɩrɛbi ma wɔ bɩtà bʋʋ bɛtàlɛ bɔɔ bɛndɩrɛbi bɛ dɔ̀ gɛtɛ baà sʋ butu gɛtɛ bʋʋ da ditele fɔ daanɩ bu ye okòro fɔ, gɛ be to wade fɔ bɛ sa. 4Bɛ kʋla gʋtʋn gɩɩ bɛmɛlɛ kpekpesi, gɛ bɛ sʋ atiribun ma atu gɛtɛ yɩɩ da gɛtʋnkwaa fɔ gaanɩ fɔ, gɛ bɛ dɔ̀ alan, <<Anʋn yii koro gɛ Asiriya wogyu eè be wura butu kpekpesi?>> 5Gɛ ɛ pɩna e sere ɔpɔrɩ fɔ wʋʋ-ɩkʋn gɛtɛ i gbena-gbena fɔ powu, ɛ mara ayela-dɩyɛlɛkʋn ɛ gyaga wuu koro. Gɛ e biri ɛ mara ɔpɔrɩ ɛ sa wʋ̀ gyangbasɛlɛ fɔ wàà sa wʋ ɔkɛma ɔkʋn gɛtɛ bee kpèlè Dafidi ditele fɔ daanɩ. Gɛ ɛ nɩ mɛ akpanyan ma wawɔrɔnyan panpasan-dɩyɛlɛ koro kpekpesi.
6Gɛ e tiri bɩtà bʋʋ bɛtàlɛ bɔɔ bɛndɩrɛ gɛtɛ bàà nya bɛnɩ fɔ boo koro. Gɛ ɛ kʋla be powu ditele fɔ dɩkpaara gɛtɛ dɩ̀ sa otunu fɔ, gɛ ɛ tabʋrʋ ɛ sa bɛ ɔkɛma alan, 7<<I yela kin-kin, fɔ yàà sa koro ɔkɛma. I kara yɛ gɩsaa gàà ton yɩ abɛɛ koro gàà yɔ yi Asiriya wogyu ma wɔ bɩtà bʋʋ bɛtàlɛ kpekpesi gɛtɛ bɛ fɩya ma ɛwɔ fɔ boo koro, yema kɛma-dɩrɛ wʋ sa ma ɛtɩ da ɛbɛ. 8Ɛwɔ ɛ̀ ba gɛ bɛnɩ-nyalɛ bɔɔkɛma, mɔ ɛtɩ bɩrɛ Yahwe, tii Wurubwarɛ nan kpà tɩ, fɔ ɛ̀ɛ̀ kpà taakpa ɛ tɩ.>> Gɛ egyu-dɩrɛ wade gɛtɛ ɛ dɔ̀ fɔ ɩ sa bɛnɩ fɔ ɔkɛma.
9Gamama fɔ, gɛtɛ Asiriya wogyu Senakeribi ma wɔ bɩtà bʋʋ bɛtàlɛ bɛ̀ sangba bɛ̀ sa Lakisi fɔ, ɛ sa wɔ bɛndɩrɛbi bɛ san Yerusalem, Yuda wogyu Hesekiya ma wɔ bɛnɩ powu baakʋn alan,
10<<Asiriya wogyu Senakeribi alan, Anʋn yii koro gɛ aa bʋnʋn bʋ̀ gyaga gɛ i to Yerusalem ì si lɛ?
11Gɛ Hesekiya ɛ dɔ̀ alan, < Yahwe, tii Wurubwarɛ eè to tɩ e ye Asiriya wogyu walɔ yaanɩ,> ɛɛ gban wɔ fɔ àà be ku dɩkpan ma otinbili. 12Nka Hesekiya gbagba na gbena Yahwe dɩsʋmakʋn ma gedi gɩɩ gɛtɛ̀kʋn, gɛ ɛ dɔ̀ ɛyɩ Yuda ma Yerusalem bɛnɩ alɛ gedi gɩɩ gɛtɛ̀kʋn kɩlɩn gɛ wù di gɛtɛ yàà sʋma fɔ yàà kuma olifwi gii koro fɔ.
13<<An nyɩ̀ gɩnyan gɛtɛ Ɛtɩ ma miinte tɩ̀ mɛ bɛnɩ powu ntʋnkwaa kurumakyɛɛ yaanɩ? Bɩfɩɩ bʋtɔkɔ buu bekpen bɛ talɩ be to bɔɔ ntʋnkwaa be ye maalɔ yaanɩ?
14Bekpen powu gɛtɛ miinte e gbena bɩfɩɩ baanɩ fɔ, baanɩ mɔmɔ na talɩ na to wɔ bɛnɩ na ye mɩɩn gʋlɔ gaanɩ? Gɛ lan waanɩ gɛ yii Wurubwarɛ fɔ ɛɛ̀ talɩ e to yi e ye mɩɩn gʋlɔ gaanɩ? 15Nkele Ɩ kara yɛ Hesekiya ɛ̀ɛ̀ gban yɩ fɔ yàà lulu osele gɛlɛ. Ɩ kara to wɔ i di, yema ekpen ɛkɩ ɛn ma, abɛɛ gɩfɩɩ gɩkɩ gɩ̀ ma, abɛɛ bugyu bʋkɩ bʋ̀ ma gɛtɛ bʋ talɩ bu to bʋʋ bɛnɩ bu ye mɩɩn gʋlɔ gaanɩ, abɛɛ miintu ɛbɛ bɔɔ gʋlɔ gaanɩ bɛ nya. Gɛ lan waanɩ gɛ yii Wurubwarɛ ɛɛ̀ talɩ e to yi e ye mɩɩn gʋlɔ?
16Senakeribi bɛndɩrɛbi fɔ bɛ ade-kpen kadama Yahwe Wurubwarɛ, ma wɔsaranyan Hesekiya. 17Egyu Senakeribi mɔ ɛ ŋwara akpa e toro Yahwe, Isareli bete boo Wurubwarɛ fɔ alan, <<Anlɛ gɛtɛ ntʋnkwaa kurumakyɛɛ fɔ yɩɩ bɛnɩ boo bekpen ban talɩ to bɔɔ bɛnɩ ye mɩɩn gʋlɔ gaanɩ fɔ, gɛlɛ ke gɛ Hesekiya wo Wurubwarɛ fɔ mɔ ɛn nan talɩ e to wɔ bɛnɩ e ye mɩɩn gʋlɔ gaanɩ.>> 18Gɛ bɛ gbɛrɛ afala Hebre ginde gaanɩ, bàà ka sa Yerusalem bɛnɩ gɛtɛ bɛ̀ gyaga ditele fɔ dɩɩpɔrɩ wuu koro fɔ gɩsaa, fɔ koro gàà yɔ bɛ, fɔ bàà gye ditele fɔ bɩtà. 19Bɛ tabʋrʋ Yerusalem wo Wurubwarɛ fɔ wo koro gaade anlɛ gɛtɛ bɛɛ tabʋrʋ gɛtʋnkwaa gɩɩ bɛnɩ boo bekpen gɛtɛ bɛnɩ bɛ ka baalɔ bɛ mɛ fɔ baade.
20Gɛ egyu-dɩrɛ Hesekiya ma Amosi wobi Wurubwarɛ wɔtabʋrʋlɛ Isaya, be tiri onyun be wùlà be kpèlè Wurubwarɛ ade fɔ yii koro. 21Gɛ Yahwe ɛ sa wɔsalɛ ɛkɩ e be wolo bɩtà bʋʋ bɛtàlɛ ma boo begyegeyelɛ, ma bɔɔ bɛndɩrɛbi gɛtɛ bɛ sa Asiriya wogyu gɛsarakʋn fɔ powu. Okoro e biri ɛ da wɔlɛ ma ɩnɩnfa. Gɛ gɛtɛ ɛ̀ sa wokpen dikwo daanɩ fɔ, wo bebi bɛkɩ be be wolo wɔ.
22Okoro Yahwe e to Hesekiya ma Yerusalem bete e ye Asiriya wogyu Senakeribi ma bekurumakyɛɛ powu baalɔ yaanɩ. Gɛ ɛ yɛ boo koro gɩ nʋ̀n bɛ ade powu yaanɩ. 23Gɛ bɛnɩ kpekpesi bɛ ba Yerusalem bɛ bɛ tɛ Yahwe gedi, gɛ bɛ ka anyan-kyɛlɛ gbagba bɛ bɛ kyɛ Yuda wogyu Hesekiya. Ye dʋkɔbɛ fɔ, bɩfɩɩ powu bʋ tɛ wɔ gebù-dɩrɛ
Hesekiya gɛbʋma koro ma wo gepe ma wo diku
24Awi ɩtɔkɔ waanɩ fɔ Hesekiya e gyu geyeba diku-diku. Gɛ e tiri onyun ɛ fɔ Wurubwarɛ, gɛ e yera wɔ, gɛ e wùlà wɔ ade-dɩrɛ ma gɩsaa ɩkɩ. 25Mɔ Hesekiya e bʋma koro gatala, gɛ ɛn mɩnɩ kʋna ade-kpara gɛtɛ Yahwe ɛ mɛ ɛ tɛ wɔ fɔ. Gɛlɛ wuu koro Yahwe wowurufa wʋ ba ɛwɔ ma Yuda ma Yerusalem boo koro. 26Ɛwʋ gɛ Hesekiya ma Yerusalem bete bɛ warama koro gatɩn. Okoro Yahwe en tiira bɛ giten ma sere gɛtɛ Hesekiya e ku.
27Hesekiya e wura koro gaanyan kpekpesi ma gebù, gɛ e sere akwo gɛtɛ ɛɛ sɩ̀ wɔ sɩka-fututu, ma wɔ sɩka-sɩya, ma wataa-kpara, ma wanyan ma ofen, ma awɔrɔnyan-dɩyɛlɛ-koro, ma anyan gbagba-kamasɛ. 28Gɛ e biri e sere akwo gɛtɛ bɛɛ sɩ̀ afɩnaa, ma wayɩn-fon, ma bʋnɔ, gɛ ɛ mɛ bɛkwɔ ma bɛyɛran baakwo. 29Gɛ ɛ yɛ be sere atele bɛ tɛ wɔ, gɛ e wura bɛyɛran ma bɛkwɔ kpekpesi, yema Wurubwarɛ e hira wɔ gepepe.
30Hesekiya na sʋ Gihon butu gɛtɛ buu ye gatala wʋ̀ gɩɩ gɩlan, gɛ e fi bu ɛ san gatɩn Dafidi-ditele diifila wʋʋ gɛnʋ̀nkʋn wʋʋ gɩlan. Gɛ gɩnyan-kamasɛ gɛtɛ ɛ mɛ fɔ wu pe wʋ tɛ wɔ. 31Mɔ gɛtɛ Babilon gɩfɩɩ gɩɩ bɛnyalɛ bɛ sa bɛnɩ bɛ ma lila wɔ ade-dɩrɛ ma gɩsaa gɛtɛ i sere gɛtʋnkwaa fɔ gii koro fɔ, Wurubwarɛ e kere wɔ ɛ ya fɔ ɛ̀ɛ̀ kɛrɛ wɔ nya, fɔ èè we woturu ade powu gɛtɛ ɩ̀ sa oturu waanɩ.
32Bɛ ŋwara Hesekiya wade-kurumakyɛɛ gɛtɛ ɛ mɛ wo bugyu buu gedi gaanɩ, ma koro gɩɩ gɛka-tɛ, bɛ sa Amosi wobi Wurubwarɛ wɔtabʋrʋlɛ Isaya wade gɛtɛ e we anlɛ okute waanɩ yɩɩ gɩkpa ma Yuda ma Isareli begyu-dɩrɛ boo koro gaade yaakpa yaanɩ.
33Hesekiya e ku gɛ be lò wɔ odon wuu koro ɔkʋn gɛtɛ Dafidi wodu wʋʋ bɛnɩ bɔɔ bɩsàn bʋ̀ sa fɔ. Gɛ Yuda ma Yerusalem bete powu bɛ sa wɔ gebù wo diku daanɩ. Gɛ wobi Manase e di bugyu e sere wɔ gɩsɩrɩ.
Currently Selected:
2 Ɩya-ɩya 32: ADE
Highlight
Share
Compare
Copy
Want to have your highlights saved across all your devices? Sign up or sign in
2025 Ghana Institute of Linguistics Literacy and Bible Translation