Esra 1
1
Sirusi ɛ kpà Yuda bete be biri bɛ san bɔɔlɛ
1Perisiya wogyu Kirusi wo bugyu buu gedi wʋʋ gɩkyan-gyangbasɛlɛ gaanɩ fɔ, Yahwe ɛ yɛ wade gɛtɛ ɛ dama wɔtabʋrʋlɛ Yeremiya wo koro ɛ dɔ̀ fɔ ɩ ba waanɩ. Yahwe ɛ kya Kirusi woturu gɛ ɛ yɛ bɛ san bɛ dɔ̀-dɔ̀ wo bugyu buu gedikʋn powu baanɩ gɛ bɛ ŋwara ade fɔ bɛ sɩ̀ alan,
2ade gɛtɛ nmɩ Perisiya wogyu Sirusi ntɛ dɔ̀ fɔ n di alan,
“Yahwe, Wurubwarɛ gɛtɛ ɛ̀ sa gatala fɔ ɛ ka gɛtʋnkwaa gii bugyu powu ɛ tɛ mɩ, gɛ e tiri mɩ ɛ sɩ̀ gɛtɛ nan sere Dikwo-dɩrɛ n tɛ wɔ Yerusalem, Yuda gɛtʋnkwaa gaanɩ. 3Gɛ ɛyɩ powu gɛtɛ ì di wɔ bɛnɩ fɔ, Wurubwarɛ ɛ fɩya ma ɛyɩ, fɔ yaanɩ-kamasɛ ɛ̀ɛ̀ talɩ bʋn san Yerusalem, Yuda gɛtʋnkwaa gaanɩ ɛ̀ɛ̀ ma sere Yahwe, Isareli wo Wurubwarɛ, gɛtɛ ɛ̀ sa Yerusalem fɔ Dikwo-dɩrɛ fɔ.” 4Gɛ ɔkʋn-kamasɛ gɛtɛ Isareli bete be kuruma bè si nkpa fɔ, baà bɛ tɛ̀ sɩka-fututu ma sɩka-sɩya, ma anyan-kpara, ma bɛnan, ma gedi gɩɩ gɛtɛ̀ gɛtɛ gi ye ɛbɛ gbagba boo-ituru yaanɩ bɛ tɛ Wurubwarɛ Dikwo-dɩrɛ fɔ Yerusalem.
5Gɛ Yuda ma Benyamin baakpaara yɩɩ begyegeyelɛ ma gedi gɩɩ bɛtɛlɛ ma Lefi bete ma bɛnɩ-kurumakyɛɛ gɛtɛ Wurubwarɛ ɛ kya bɛ ituru fɔ, bɛ pɩna koro gɛtɛ baà san Yerusalem bɛ ma sere Yahwe wo Dikwo-dɩrɛ fɔ.
6Gɛ bɔɔwɔlɔn ɛbɛ powu gɛtɛ bè si gbɛma bɛ fɔ, bɛ kpà bɛ ma sɩka-fututu, ma sɩka-sɩya, ma anyan-kpara, ma bɛnan, fɩya, ma gedi gɩɩ gɛtɛ̀ gɛtɛ gi ye boo-ituru yaanɩ. 7Gɛ Egyu-dɩrɛ Sirusi, ɛ ka Yahwe Dikwo-dɩrɛ daanyan gɛtɛ Nebukadinesa e tola ɛ ma sɩ̀ wo dikpen-kwo daanɩ fɔ, ɛ ba. 8Peresiya wogyu Sirusi ɛ yɛ Miteredati gɛtɛ è di anyan-gbaagbaa yɩɩsɩlɛ fɔ ɛ ba, ɛ kalan yɩ gɛ ɛ ka yɩ ɛ sa Yuda wofoli wuugyegeyelɛ Sesibasa gʋlɔ. 9Anyan gɛtɛ bɛ tɛ fɔ powu n di, sɩka-sɩya bɛtasa dikpilin ma fwo (30) tɛ gedi gɩɩ gɛtɛ̀, ma sɩka-fututu bɛtasa nkpɩn ton (1,000) tɛ gedi gɩɩ gɛtɛ̀, ma bɛtasa-kperen bɛkɩ dikpilin ma yɛkɩ (29), 10ma sɩka-sɩya bɛtasa buruburu dikpilin ma fwo (30), ma sɩka-fututu bɛtasa nkpɩn bʋnyɔɔ ma fwo (410), ma anyan-salɛ anyan-kurumakyɛɛ nkpɩn ton (1,000). 11Sɩka-sɩya, ma sɩka-fututu yaanyan fɔ powu ɩ mɛ ɩgbaa ɩnyɔɔ ma nkpɩn kwarankɩ (5,400). Anyan nyayɩ gɛ Sesibasa ɛ ka, fɩya ma bɛnɩ-kurumakyɛɛ ɔya gɛtɛ be ye Babilon bɛɛ fɔrɔ Yerusalem fɔ.
Currently Selected:
Esra 1: ADE
Highlight
Share
Compare
Copy
Want to have your highlights saved across all your devices? Sign up or sign in
2025 Ghana Institute of Linguistics Literacy and Bible Translation