Esra 3
3
Be biri be sere Yahwe gedi gɩɩ gɛtɛ̀kʋn fɔ
1Gɛtɛ ebon-kwarankɩfɛ ɛ nɩma fɔ, Isareli bete fɔ powu bɛ wɛrɛ sara baatele yaanɩ, gɛ ɛbɛ powu be tuma Yerusalem anlɛ ɛnɩ-kɩlɩn. 2Ɛwʋ gɛ Yosadaki wobi Yesuwa ma wɔwɔlɔn ɛbɛ gedi gɩɩ bɛtɛlɛ fɔ, ma Seyalitiyeli wobi Serubabeli ma wɔ wɔwɔlɔn ɛbɛ bɛ kya Isareli wo Wurubwarɛ fɔ gedi gɩɩ gɛtɛ̀kʋn fɔ gii gesre, fɔ bàà tɩ tɛ gekuma gii gedi gii koro, anlɛ gɛtɛ bɛ ŋwaralɛ bɛ sa Wurubwarɛ wɔnɩ Mose wo-ise yaanɩ fɔ. 3Ma gɛtɛ bè serenti bɛnɩ gɛtɛ be silin bɛ be tuma gba fɔ, be biri be sere gedi gɩɩ gɛtɛ̀kʋn fɔ gɩɩ geseregyagakʋn-kuba fɔ gii koro, gɛ bɛ tɛ Yahwe gekuma gii gedi gii koro gɛgyɩgyan ma ɔgyɔlɔ. 4Be di Ɩpanpan Yaawi yii Gedi fɔ anlɛ gɛtɛ bɛ ŋwara bɛ sa alɛ bàà ti di fɔ, ma gekuma gii gedi anlɛ gɛtɛ wù di gɛtɛ bàà tɛ duwi-kamasɛ fɔ. 5Wʋʋ gama fɔ, bɛ bɛ tɛ Yahwe duwi n di duwi dii gekuma gii gedi, ma ebon-fon gedi gɩɩ gɛtɛ̀, ma Yahwe wawi-fɩrɩn-fɩrɩn yii gedi gɩɩ gɛtɛ̀, ma gedi gɩɩ gɛtɛ̀ gɛtɛ gi ye bɛnɩ fɔ gbagba boo-ituru yaanɩ. 6Ebon-kwarankɩfɛ duwi-gyangbasɛlɛ daanɩ fɔ, be sere ɔpɩ gɛtɛ̀ Yahwe gekuma gii gedi, ma gɛtɛ bɛn tɛ kya Yahwe Dikwo-dɩrɛ fɔ dii gesere gba fɔ.
Bɛ kya Dikwo-dɩrɛ fɔ dii gebiri sere
7Isareli bete fɔ bɛ tɛ bɛmaralɛ ma dikwo dɩɩ bɛgbɛrɛlɛ fɔ sɩka, gɛ bɛ tɛ Sidon bete ma Tire bete fɔ anyandilɛ, ma bʋkan, ma bʋnɔ fɔ bàà talɩ bɛ ka seda wo-iyon fɔ gyaga butu buu koro ye Lebanon san Yopa anlɛ gɛtɛ Perisi wogyu Sirusi ɛ dɔ̀ fɔ.
8Gɛtɛ bɛ ba Wurubwarɛ Dikwo fɔ dɩɩ dɩkpalan fɔ daanɩ Yerusalem, gɩkyan-nyɔɔfɛ giibon-nyɔɔfɛ waanɩ fɔ, Sewalitiyeli wobi Serubabeli, ma Yosadaki wobi Yesuwa, ma bɔɔwɔlɔn ɛbɛ gedi gɩɩ bɛtɛlɛ, ma Lefi bete, ma ɛbɛ powu gɛtɛ nafɔ be ye gisela gaanɩ gɛ be biri bɛ ba Yerusalem fɔ, be sere gʋtʋn fɔ gɩɩpɩ. Gɛ Lefi bete powu gɛtɛ be di bɩkyan dikpilin ka san fɔ, bɛ ka bɛ bɛ sɩ̀ gɛtɛ bàà nya Wurubwarɛ Dikwo fɔ dɩɩ gʋtʋn fɔ gii koro. 9Gɛ Yesuwa, ma wo bebi-teni, ma wɔndɩrɛ ɛbɛ, ma Kadimiweli, ma wo bebi-teni gɛtɛ bè di Hodafiya wodu wʋʋ bɛnɩ fɔ, ma Henadadi bebi-teni, ma boo bebi-teni, ma bɔɔdɩrɛ ɛbɛ gɛtɛ bè di Lefi bete fɔ powu bɛ bɛ fɩya gɛ bɛɛ nya ɛbɛ gɛtɛ bɛɛ mɛ Wurubwarɛ Dikwo daanɩ dɩɩ gʋtʋn fɔ boo koro.
10Gɛtɛ bɛmaralɛ fɔ bɛ kya Yahwe Dikwo-dɩrɛ fɔ dii gesere-gyagakʋn fɔ gii gesere fɔ, gedi gɩɩ bɛtɛlɛ fɔ bɛ sa bɔɔ ngba gɛ bè de baakantan, gɛ Asafi bebi gɛtɛ bè di Lefi bete fɔ, bè de baakyaka bè yela bàà sila Yahwe anlɛ gɛtɛ Egyu-dɩrɛ Dafidi e wùlà fɔ. 11Bɛɛ nʋma gesila ma onyun wʋʋ gɛsa wʋʋ-ɩnʋn bɛ tɛ Yahwe alan,
“Yahwe ɛ̀ kɔlɔ, gɛ
wo gelen gɛtɛ ɛ̀ ba tɛ Isareli fɔ gɩ̀ sa gakpaakpa.”
Ɛwʋ gɛ ɛkamasɛ ɛ gbɛrɛ afala e sila Yahwe yema bɛ kya Dikwo-dɩrɛ fɔ dɩɩpɩ wuu gesere. 12Gɛtɛ gedi gɩɩ bɛtɛlɛ, ma Lefi bete, ma akpaara yɩɩ bɛndɩrɛ kpekpesi gɛtɛ be we Dikwo-kuba fɔ bɛ nya fɔ, be wula gepepe, ɔkʋna gɛtɛ be we gɛtɛ bee sere gesere-gyagakʋn-fon fɔ. Mɔ bekurumakyɛɛ fɔ bɩrɛ bɛɛ gbɛrɛ gɛ ɔsɛ wafala. 13Ɔsɛ waafala fɔ ma gewula giiyo fɔ powu ɩɩ bʋn gatala gʋsɔ gɛtɛ ɛkɩ ɛn mɩnɩ talɩ nyɩnla alɛ ɔsɛ wuuyo n di nyayɩ abɛɛ gewula giiyo n di nyayɩ.
Currently Selected:
Esra 3: ADE
Highlight
Share
Compare
Copy
Want to have your highlights saved across all your devices? Sign up or sign in
2025 Ghana Institute of Linguistics Literacy and Bible Translation