1 Koorinteeb 5
5
Tukaniisaatiib oojkuun
1Oontꞌa bareekna ibtikeekna jikuun tikwasiineet tuuna hadiidamta, tuun tuuna aree oodiin baabariib oodehayi bitik han kitꞌaki. Tak ubaabaayt takat ijkin miyaad hadiidamiya. 2Aree baraakna kak haay faalamteena? Baraakna ibakii gadabteeneet toonaatu, aree ootak beet toona idꞌiib bitꞌaraweesamayneet toonaatu, aree sikwiiti tidꞌaneet toonaati. 3Ani uknaayu hookna sagiib akatiyeek han, uginꞌii geebookna eefi. Ani geebookna iifiyeet toonaatiit toon toona idꞌiib ootak suur akay haakaman. 4Baraakna Wꞌankwanaayoon Yasuuꞌi simii majlis tidꞌanihoob, ani uginꞌii geebookna eefi. Wꞌankwanaayoon Yasuuꞌi akrir han geebookna eefeena, 5oon ootak oobliis nuunaana, bariiyuuh ugaru kwidhi indi, aflaay Wꞌankwanaayt tooyin ishuukaah iidhhan iyadna. 6Kibir baadꞌiina uukibir daayiib kiiki! Shalik hamiir wꞌajiin kassooh isehamiireet toona kitkanna han? 7Whamiir ishꞌiiya giigsaana malya gayi ajiin hamiir anu tꞌiiteeb iikti tiyadna aree sidik bak tꞌiiteebaana. Umasiih hineeb Wꞌiidi argin karaamaat iki. 8Aflaay Wꞌiid kaleewnayeet toonaatu, laakiin whamiir ishꞌiiyaay kiiki. Wꞌamaag niyaay hamiirwa tumaagti hamiirwa kiiki, laakiin hadhiib hamiir anu, tinhisuuywa usidkiiwwa hadhi kaleewaana.
9Ani ujawaabiib oodehay oojkuun daayiiniib baaꞌaraweesamaana adi hookna. 10Oontꞌa oodehay oodiin baabariib, tari whaamal, tari igwihara, tari isanama anbiid bareeh kaasehariw. Een bareeh timooriibnee dehaay tuduniyaatii titfarꞌaneet toonaati. 11Laakiin oontꞌa ugarooyooh oosan waliikiiniibka malya na jakiin tari haamaab ikatiib, tari sanam anbiid, tari tataggeegiiniib, tari sakraan tari gwiharaab ikatiib, een bareeh ibakii baaꞌaraweesamaana. Bak tꞌiiteeb ootak aree geeb han baatamaana.
12Oodehay tukaniisaatii barraab eefeen ani gaadiib hooy iikti kaadi, uun shagaayu kiiki. Bareeh Ukwaasana gaadiimi indi. Baraak aree een tehooyteekna eefeen gaadiimi kitdiina han? 13Baliib barraab eefeen Ukwaasana gaadiyoohna iikti indi. Uuktaab “Ibtikeekna eefeeb wꞌamaag tak giigsaana!” diyaabi.
Currently Selected:
1 Koorinteeb 5: BEJA
Highlight
Copy
Compare
Share
Want to have your highlights saved across all your devices? Sign up or sign in
2026 Seed Company and the MTT