1 Koorinteeb 6
6
Yꞌaamanaanaayi bitik wꞌashkiisamti
1Bareek gaal hookna weernaay geeb halaagaayt ibariyeek, Ukwaasanaay oodehayi suurii whaakamamti ribtiit baruuh tehalaagaaytooh kak oodiin baabariin igaadiyaayi suurii itehakiim? 2Ukwaasanaay uudehay tuduniya haakameeneet toona kitkanna han? Baraak tuduniya haakamtiineek, shalikt halagnay han kahaakamtaana han? 3Hinin imalak haakamnayeet toona kitkanna han? Oon umidhhaniit halagnay kak gwidakaat ikatiin! 4Shaawti bak tꞌiiteet tinaateeb halaagaayt tibariineek, tukaniisaatiib shalikt takwi ibariin eenda han gaadiyaab kwaasna. 5Ani toon toona bareek haay asiisakwꞌi sabbii andi hookna. Yꞌaamananaayi bitik halaagaayt tankwiikw fagar gaal han hookna kiihaay? 6Laakiin beet toona ishtiit, san gaal weernaay dehaay tumhakama eebi. Toon aree uudehay yꞌaamanaab baakay yhakimna!
7Uusdik aree, ashkiisameen dehay ibtikeekna eefeeneek, winneet tigrabneet toona rhistini. Tumaagtookna agbilteeneet toonaatu, titootiilnihoob han agbilteeneet toonaati. 8Bak aree baraak iknaayaakna titalisna, amaagna sakteena, aree isanaayeekna kehii toon toona sakteena.
9Yꞌamag dehay Ukwaasanaayt tehadꞌaayi biikwasaamayneet toona kitkanna han? Baaꞌatootaalna, uudehay jikuun daayeen, tari isanama yꞌabid, tari eenda ifaddad, tari eenda itaktak reeween, 10tari igwiharana, tari yhaamaab, tari isakran, tari itataggeegeen yꞌabaabana tari itallas, Ukwaasanaayt tehadꞌaayi kwasaami kiidiin. 11Gali bareesookna bak tꞌiiteeb tiiktiina. Laakiin oontꞌa baraakna tishgwadhna, Ukwaasana tittiyeewaayna, Wꞌankwana Yasuuꞌa Umasiihiiwwa Ukwaasanaayoon Ishuukeewwa aree Ukwaasanaay geeb takwakw tikeena.
Oojkuun
12Gaal aree “Ani naatka sakaniyeet toona soomamaabi.” indi, laakiin kastuuh tuuna daayiit kitti. “Naatka anii dehaay takwaakwti.” indi, laakiin aneeb naat han ankwanaamiheeb kitdi. 13Weer aree “Timꞌari oofꞌii jillaay tikati, aree uufꞌi timꞌariiti jillaay ikati.” indi, laakiin Ukwaasana bareeh mhalleehna kwidhsi indi. Ugaru jikuunii dehaay kiiki, laakiin Wꞌankwanaay dehaay ikati, aree Wꞌankwana ugarooy dehaay ikati. 14Ukwaasana Wꞌankwanaayoon tooyatii yakisiyaneet toonaatiit, hinin han yꞌakrireesooh tooyatii yaksi hoon indi. 15Igarooyaakna sidik Umasiihi tarab ikatiineet toona kitkanna han? Umasiihi tarabee, tak ugarooyooh yaksiit jakiint haay eebiyeet tuuna daayiitu? Abadan! 16Tak jakiint eebiyihoob batiiyooh geeb gaal garu ikatiyeet toona kitkanna han? Aaktab “Mhallaahna gaalnaay imshawawaayna.” iyadna. 17Laakiin unafar Wꞌankwanaay imshawawiib bariiyooh geeb gaal shuuk ikati.
18Oojkuunii foorna. Kassaah idanuub wꞌaadami sakiiniyeeb ugarooyiisooh barraab ikatiina, laakiin jikuun danuub sakiiniib uutak ugarooyooh ooknaay kehii danuub ikwasi. 19Igarooyuukna Eeshuuk Imugaddasaayi diini gaw ikatiyeet toona kitkanna han? Baruuh hookna kwarri, aree Ukwaasanaay attiyeewiyaab kitteena han? Baraak ishuukeeyookna kittaana, 20Ukwaasana alya tamanii dilba ahaayookna. Shaawti Ukwaasana igarooyiisookna hamooysaana.
Currently Selected:
1 Koorinteeb 6: BEJA
Highlight
Copy
Compare
Share
Want to have your highlights saved across all your devices? Sign up or sign in
2026 Seed Company and the MTT