1 Koorinteeb 7
7
Eedoob
1Oontꞌa baraakna tiktibneet tinaateeb, uutak biidꞌiireet toona dehaay hanyiis. 2Laakiin gwida amaag shaga eefiyi sabbii, takka ooknaayt takat danꞌiyeet toonaati. Takatka aree tooknaati tak danꞌiyeet toonaati. 3Uutak ibakii idꞌareet shanhatiya tootakatii dehaay tankwiikweet toonaati. Tutakat han oontꞌaaneet utakiyooh dehaay idꞌareet shanhatiya tankwiikweet toonaati. 4Tootakati garu batooh tookna toobhaanaatiib kiiki, laakiin uutak han hooy eefi. Oontꞌaaneet ootaki garu han barooh ookna oobhaanaay kiiki, laakiin tutakat hooy teefi. 5Shalik door ookiik ammakkaartiit tikwasiineet toona nuun, taktak baaꞌamooraabna. Aflaay igarooyookna toosileeltii dehaay waasteena. Malya taktakee dehaay masi mꞌaana shaawti igarooyookna kaleewti raabii uubliis jarrabi hookna kiidi. 6Toon toona ani nasehaat akay sooyani hookna, amir kiiki. 7Aanda kassaah aniib whaaliit iiktiineet toona minniimani. Laakiin takka ooknaay miyaaw Ukwaasanaay ikatiib ibari, gaal oon oomyaaw ibari, weer aree beeb ibari.
8Oontꞌa oodehay idꞌiraab baakaywa, timꞌataahna tari aandaahna ayaab ikatiineebwa aree bak sooyani: oon aniib whaal tꞌiiteena dꞌiraab baakay eesitꞌaneet toona bareeh dehaay hayiskaati. 9Laakiin baraah igarooyeehna biikaleewayneek, ibakii eedꞌirneet toonaatu, tishahwaatii teetliiwneet toonaatiika aadꞌar yhayisna.
10Oodehay idꞌiraab aree bak sooyani (aan ibhali aniib kiikeena laakiin Wꞌankwana diyaabu): tutakat utakiisooh bitfidaageet toonaati. 11Laakiin batuuh titfadiigeek, ibakii dꞌaart baakaay teesitꞌeet toonaatu, tari ootakiyooh dehaay titꞌagiireet toonaati. Uutak han tootakatooh ibakii biifadiigeet toonaati.
12Oodehay irawee dehaay bak andi (aneeb kaaki laakiin Wꞌankwana bak sooyiini): tak masiihi takat aamanaat baakaayt ibariyeek, batuuh aree bariiyooh geeb kwiraay harriiweek, baruuh ibakii batooh biifadiigeet toonaati. 13Takat aree tak aamanaab baakaay tibariyeek, batiiyooh geeb aree kwiraay harriiweek, batuuh ibakii barooh bitfidaageet toonaati. 14Uutak wꞌaamanaab baakaay tootakatiyooh sabbii Ukwaasana barooh agbiliini. Tutakat tꞌaamanaat baakaayt han ootakooh wꞌaamanaay sabbii, Ukwaasana batooh agbiliini. Bak biikaayeek aree, yꞌaraakna nhas kiiꞌakeena, laakiin oontꞌaaneet baraah mugaddasaaba.
15Laakiin wꞌaamanaab baakaay giigiiniyeek, ishna dꞌiina bagiigi. Uutak wꞌaamanaab tari tootakat tꞌaamanaat been whaaliib hakwar kiikeena, Ukwaasana mꞌasgiib nikweeri jillaay waliikiya hoon. 16Batuuk tutakat ootakook tishidhhiineet toona kak tikteenii? Tari baruuk uutak tootakatook tishidhhiineet toona kak tikteena?
17Gaalka umidhhani mhiin Wꞌankwana sooknaab ikatiyeeb kaleewiiniyeet toonaatu, Ukwaasana bariiyooh dehaay barooh waliikaabi. Oon whag aree kasteeh tikaniisaateeb ani sooyani. 18Uutak waliikamiyanihoob, suur akay kwashaab han? Baruuh ibakii itkwashiibeet toonaati. Uutak waliikamiyanihoob, kwashaab baakaay kiiki han? Baruuh biikwishaabeet toonaati. 19Ukwishuub naat kiiki, ukwishuubi naaw han naat kiiki. Ukwaasanaayt tiwaseeti dibuuy naan hayiskaatu! 20Gaalka Ukwaasana barooh waliikiyanihoob iifiyeeb whaaliib ingadiyeet toonaati. 21Baruuk waliikamtanihoob, kishiyaab akay tiifiya? Haay titfadiigeet fursa marriyeek, beet tufursa baahassaa. 22Been barooh Wꞌankwana waliikiyanihoob kishiyaab iiktiib, Wꞌankwanaay fadaag tak ikati. Oontꞌaaneet, been waliikamiyanihoob fadaag tak iiktiib, Umasiihi kishiya ikati. 23Baraak tamanii dalabaana, dehayi kishiya aree baaꞌakeena. 24Isanaayaan, takka Ukwaasana eetriimeet toonaati. Oontꞌaaneet aree baraak waliikamtaanihoob bak tiifiina.
25Oontꞌa yhankwilaawwa tꞌaagiraawwa: Wꞌankwanaayt wasi kaabari laakiin Wꞌankwanaayt tirhamaatee aamaniini takiit irꞌayi iyaad andi. 26Oontꞌa eefeen igwirhaayi sabbii, uutak aree whaaliyooh ingadiyeet toona dehaay hanyiis. 27Baruuk dꞌiraabwa? Aflaay fadag baahariiwa. Baruuk dꞌiraab kitta? Aflaay takat baahariiwa. 28Laakiin baruuk dꞌiraab tikatiyeek, amaag weeraab kitta. Tꞌaagir aree tidꞌiireek, amaag weeraat kitti. Laakiin baliin eedꞌirnihoob, toon tuduniyaatiib gwida gwirha imaar iyadna. Ani aree baliin igwirhaayee afuuy aseharriiw hookna. 29Isanaayaan, uudoor nakash dooru miyaad haay asehariiw. Oontꞌaanee baliin teemꞌat ibariin mꞌat baabariit tunaatiit ikweerneet toonaati. 30Baliin igadabaab, gadab baabariit tunaatiit ikweerneet toonaati. Baliin firhaateeb eefeen aree firhaat baabariit tunaatiit ikweerneet toonaati. Baliin naat dilba ahaab, bareetooh baakaayna ideebneet tunaatiit ikweerneet toonaati. 31Baliin tuduniyaati ambiree anfꞌameen, bareeyooh dehaay daamaab baakaayt tunaatiit ishabibneet toonaati. Tuduniya oontꞌa tehayeet tehayꞌaatii tiyaayi.
32Baraak bitehasiikneet toona hookna aharriiw. Uutak dꞌiraab baakaay Wꞌankwanaay ishagaay hansiik, baruuh Wꞌankwana kak afirhisiiniyeeb shagaamiini. 33Laakiin uutak idꞌira tuduniyaatiit tinaateeb hansiik, baruuh aree umidhhanooh afirhistiib harriiw, 34aree baruuh bak malu mhiin itꞌadhiidh. Tutakat dꞌaart baakaayt tari tꞌaagir Wꞌankwanaayt halaagayteeb hansiik. Batiiyaah yhadaf aree ugaroowwa eeshuukwa mhalleeh Wꞌankwanaay dehaay waastini. Laakiin dꞌaart takat toon tuduniyaatiit tinaateeb hansiik aree utakooh kak afirhistiniyeeb shagaamtini. 35Ani toon toona haay andiyeeb usabab, tudaayiinaaytookna aharriiw. Ani bareeyookna kehii rabeeb daastiib kiiki, laakiin takwaakw salalii tikweerni jillaaywa, baanhaad miyaaw Wꞌankwanaay dehaay tikatiini jillaaywa ani sooyani hookna. 36Tak aagirt daasiiniyeek, aree batiiyooh idaasti idꞌaree afuuy hiisiiniyeek, aree batuuh idꞌari imir katimt tikatiyeek, aree baruuh dꞌar harriiweek, aflaay baruuh yharriiweet toona sakiini. Baruuh amaag weeraab kiiki, baraah imdadꞌiirneet toonaati. 37Laakiin uutak atootraab baakaay, tehalaagaay ooknaay ugirmaay tankwiikweek, laakiin baruuh ooknaayt niya abiktiit tꞌaagirt biidꞌiireek, uun uutak han daayiib sakiini. 38Aflaay tꞌaagir safiiniib uutak daayiib eefi, laakiin tꞌaagir baadꞌiir uutak hayiskaab ikati. 39Tutakat utakuuh dhhanii ahayeeb hadiit, bariiyooh dehaay hakwaart tikati. Laakiin batiiyuuh uutak iiyaayeek, batuuh harriiweeb weer safamtiniyee dehaay adgirtini. Laakiin baruuh ibakii Wꞌankwanaay tak ikati. 40Aniib irꞌayeeb, batuuh aagirt akay teesitꞌeek afirhakaat tikati. Aree ani han Ukwaasanaay Eeshuuk abariyeeb hiisani.
Currently Selected:
1 Koorinteeb 7: BEJA
Highlight
Copy
Compare
Share
Want to have your highlights saved across all your devices? Sign up or sign in
2026 Seed Company and the MTT