2 Koorinteeneeb 3
3
1Hinin masi igarooyeen nhamid han? Tari dehay galneet hinin waseeti jawab bareesookna tari bareekna eebiin nhariw han? 2Baraak iknaayaakna hini jawaab tikatiina, iginꞌiyoon kataabu aree uudehay kassaah ikteenna aree agriiyeena. 3Baraak Umasiihi ooknaay kataab jawaab hinee aree diigwatamaab tikatiineet toona rhisteena. Uun baruuh galamii kataab kiiki, laakiin Ukwaasana udhhaniinaay Ishuukee ikati, ilhaayi kehii kataab kiiki laakiin wꞌaadami ginꞌaayi kehii kataabi.
4Uun wꞌakra ginꞌa aree hineebu, hinin Ukwaasana suurii Umasiihiib akra ginꞌiiba. 5Hinin iknaayaan naat daanay niyadee dehaay hag kinbari. Laakiin hinin naan nidꞌeeb kassooh ushaga Ukwaasana iniiw hoon. 6Baruuh hinin ugalad ugayiinaay shagaamana ikwaas hoon. Tuun tuuna aree kataab hag kiiki, laakiin Ishuukee tikati. Whag ukataab tooyat haay yꞌiini, laakiin Aashuuk midhhan iyawna.
7Whag aweeyi lhaayi kehii hiruufee naggashamiya, aree baruuh ittiyeewaayihoob, Ukwaasanaay umatuun lawiya. Muusaay ifiiri wꞌeeraamti giigiyaneek han, Israaꞌiiliib uudehay barooh ooshbuub adgiraab kiikeen. Whag tooyat haay yꞌiiniib bak akriree ikatiyeek, aree bak matuunii eeyaneek, 8Ishuuki shagaay ikatiib umatuun aree kak ookiik winkaab ikati? 9Ushaga wꞌaadami gwabab isidꞌiib matuun ibariyeek, aflaay ushaga tooshbu haay yꞌiiniib kak ookiik matuun iniiwkaabu? 10Suur iifiib umatuun, oontꞌa eefeeb winneet win umatuuni geeb nisnadiireek, been suur iifi matuun kiiki. 11Shalik door iifiib umatuun matuun ikatiyeek, aflaay diimaab daayiiniib umatuun kak ookiik winkaab ikati!
12Shaawti hinin oon usꞌaya nibariyi sabbii winneet gwꞌagwaab nikati. 13Hinin Muusaab tꞌiiteeb kinki, baruuh ifiireeh halakii ikwibis, Yꞌisraaꞌiili bariiyeeh ifiiri wꞌeeraamti giig biirhayni jillaay ifiireeh ikwibis. 14Laakiin bareeh iginꞌaayaahna assamaaba, baraah ugalad ishꞌiiya agriimamiiniyihoob, oon amsi ookiik iginꞌaayaahna been whalak ooknaay kwabasa. Been whalak uudehay Umasiihiib daayeenihoob oobhaat itnagiil. 15Oon amsi ookiik han Muusaay whag agriimamiiniyihoob, bareeh iginꞌaayaahna halakii itkwabiisna. 16Laakiin gaal Wꞌankwanaay dehaay itꞌagiirihoob, whalaki hijaab uginꞌii giigiini. 17Oontꞌa Wꞌankwana Eeshuuk ikati, aree Wꞌankwanaay Aashuuk daayeeneeb oomhiin aree fadagooyt tikati. 18Aflaay hinin kassaan nagal fiiree Wꞌankwanaay umatuun rhisnay. Winka matuun ameeshiwaayiit barooh tꞌiiteeb nikati, been umatuun Wꞌankwanaay yꞌiini, aree baruuh Eeshuuk ikati.
Currently Selected:
2 Koorinteeneeb 3: BEJA
Highlight
Copy
Compare
Share
Want to have your highlights saved across all your devices? Sign up or sign in
2026 Seed Company and the MTT