2 Koorinteeneeb 4
4
Ishuuki miraay idiwaneeb eefeeb
1Ukwaasana tirhamaateesooh oon ushaga yhii hoon, aflaay hinin afreeni kindi. 2Hinin kasteeh teena tikwabaswa isalala yꞌisiisakwꞌiiwwa nirib. Gaal han kintilis, tari Ukwaasanaay ibhali kinbidil. Laakiin Ukwaasanaay suurii oosdik soonay, aree kassaah baliin usidki toon ikteenna. 3Hinin bhaliinayeeb usakana udaayi kwabaas ikatiyeek, baliib ikwidhaab eebhat hooy kwabaas ikati. 4Uubliis toon tuduniyaati kwaasana ikatiib, baliib yꞌaamanaab baakaayni iginꞌa hamasheesaabuuyt, aflaay baraah beeb Umasiihiib umatuuni wꞌinjiili nuur adgiriit karhiyaana, aree baruuh Ukwaasana tꞌiiteebi. 5Hinin iknaayaan kabhaliina, laakiin Yasuuꞌa Umasiih Wꞌankwanaayt, hinin iknaayaan aree Yasuuꞌi jillaay bareeyeekna kishiya nikati. 6Ukwaasana “Uthibnii uunuur buubi indi!” diyaab ikatiib, unuurooh iginꞌaayeen tehooyteeb buubisiya. Uunuur Ukwaasanaay umatuuniit kanaant Umasiihi suurii iniiw hoon. 7Laakiin hinin oon oomraay adaarhaashi diwaneeb nibari, aan yꞌakrir usidki hinee kiikeena laakiin Ukwaasanaay ikatiineet toona rhiseen hoon. 8Hinin diimaab gwirhaayeeb neefi, laakiin katꞌamaab kinki. Door gaal eetehaknay, laakiin door han yigwhaab kinki. 9Amaag nitweeraay, laakiin atooꞌishaab kinki, nitoothꞌa laakiin kwidhaab kinki. 10Hinin igarooyoon tehooyteeb diimaab Yasuuꞌiit tooyat nitfayiik, aflaay Yasuuꞌiib umidhhan han igarooyoon lawiiniib ikati. 11Hinin idhhaniib nikatiib Yasuuꞌi jillaay diimaab tooyat beeti nittiyeewi, aflaay bariiyuuh umidhhan hineeb ubashari garooy lawiiniib ikati. 12Aflaay malya tuuyat hineeb shagaami tindi, laakiin umidhhan bareeyookna shagaami indi.
13Uuktaab “Ani aamanan akay hadiidan.” diyaabi. Oon bak tꞌiiti iimaani shuuk, hinin han aamannay aree shaawti hadiidnay. 14Ukwaasana, Wꞌankwana Yasuuꞌaab tuyatii yakisiyaab, hinin han Yasuuꞌi geeb yaksi hoon indiyeet toona nikteen, aree bareeyookna geeb bariiyooh suurii haay yꞌi hoon indi. 15Tuun tuuna kastuuh bareekna rayiisi tindi, aflaay gwida dehay ikatimt tinꞌima hamaad ikwasiina aree whamaad Ukwaasanaay umatuun beeti iitfaf indi.
16Aflaay afreeni kindi. Tisaradtaan diiseet suuseeneek han, tehooytaan oombꞌi oombꞌii dehaay gayiimeen. 17Oontꞌa ishalik doori gwirha ilhaseenaan, ansiriit hoon daayim matuun iyawna hoon, aree kasseeh igwirhaayi mhakwal iikti iyadna. 18Aflaay igwꞌadeen toona tulawtiniit kinshiishabib, laakiin toona tulawaat baakaay nishiishabiib. Tuuna tulawtiniit hallaay tikati, laakiin tuuna tulawaat baakaay daayimt tikati.
Currently Selected:
2 Koorinteeneeb 4: BEJA
Highlight
Copy
Compare
Share
Want to have your highlights saved across all your devices? Sign up or sign in
2026 Seed Company and the MTT