2 Koorinteeneeb 6
6
1Hinin Ukwaasanaay geeb ushagaayoon, Ukwaasanaayt tinꞌimaati miyaay mishiit bitkwaasiineet toona hookna nhariw. 2Ukwaasana indiyeet toona maasiwna:
Ukwaasana “Aniib udaayi door eeyanihoob, amaasiw hookna,
aree umidhhaniit tuyintiib, asham hookna.” diyaabi.
Andi hookna, oontꞌa Ukwaasanaay udaayi door yꞌaabu, oontꞌa umidhhaniit tuuyin tikati.
Baawloosiib igwirha
3Hinin ushagaayoon gaal han gwihaab hooy marriyeet toona kinhariw. Aflaay gaalnaay salaliib han goofiit nidꞌeet toona kinhariw. 4Laakiin hinin nidꞌeet toonaatiibka Ukwaasanaay shagaamana nikatiyeet toona rhisnay, igwirhaayeet amtarrimooytwa, wꞌamaag haalwa, ilhamtiiwwa, 5ithibꞌeewwa, oosjinwa, tiribshaywa, wꞌakra shagaaywa, isehariiwwa tehargwiiwwa, 6nhisuuytiiwwa, tufhamaatiiwwa, oosbirwa tunhas niiyaawwa, Eeshuuk Imugaddasaayeewwa, nhas reeriiwwa, 7sidki bhaliyeewwa, Ukwaasanaay akrireewwa, tooshbooti gadhꞌi wꞌayi umaykwaaywa utalhaaywa, 8umatuuniiwwa whamooysamti naawiiwwa, wꞌamaag sootiiwwa udaayi sootiiwwa Ukwaasana shagaamnay, aree igwisri dehayiit nishtabbaab laakiin masi oosdik hadiidnay. 9Hinin atookakinaaba, laakiin masi atookakinaab baakaay udehayiit nishtabbiib. Hinin niyaayi, laakiin masi dhhaniiba. Nitoothꞌa, laakiin masi ayaab kinki. 10Gadabna, laakiin diimaab afirhaaba. Aniwa, laakiin masi gwida rayi rayiimnay. Naat kinbari, laakiin naatka kinaamnay.
11Bareekna Ikoorinteenaayi, usidkii hadiidsamna hookna, aree iginꞌaayeen daayiib dehookna ningil. 12Hinin ureeroon hookna abkaab kinki, laakiin baraakna ureerookna hoon tꞌabikna. 13Ani oontꞌa bareekna yꞌareetu anfariid hookna, baraakna han hinin dehookna nibariyeet tooshbu tꞌiiteena rhisaana hoon. Iginꞌaayeekna han daayiib nigilna.
Yꞌaamanaab baakaayni geeb baahasalna
14Oodehay yꞌaamanaab baakaayni geeb baahasalna. Uudehay aashboobwa yꞌamagwa naan taktaki geeb ibariina? Tari uunuurwa uuthbinwa kak hiddaab ikweerna? 15Umasiihwa Uubliiswa kak taafagsameen? Wꞌaamanaabwa wꞌaamanaab baakaaywa naan teeshwawi? 16Ukwaasanaay udiini gawwa isanamaawwa kak taafagsameen? Hinin Ukwaasana udhhaniinaay diini gaw nikati akay, Ukwaasana uukna han diyaabu: “Ani bareeyooh geeb ikwaar andi aree bareeyooh bitik saki andi, aree bareeyoohna Kwaasana iikti andi, aree baraah anii dehay iikti iyadna.” diyaabi.
17Aflaay Wꞌankwana, “Bareesooh firꞌana
aree tifalna,
indi Wꞌankwana.
Nhast baakaayna baatatehaana,
malya ani agbili hookna andi.
18Ani baabookna iikti andi, baraakna han anii arwa aritwa iikti tiyadna.” indi.
Wꞌankwana Wꞌalya bak indi.
Currently Selected:
2 Koorinteeneeb 6: BEJA
Highlight
Copy
Compare
Share
Want to have your highlights saved across all your devices? Sign up or sign in
2026 Seed Company and the MTT