2 Koorinteeneeb 7
7
1Yꞌarawaanay, een iwaadiya nimeereek, ugaroowwa eeshuukwa yiwaashiiseent kasteeh teena hinin iknaayaan hooy neenhasiyeet toonaati. Ukwaasanaay mirkwaayii winneet mugaddasaab nikatiyeet toonaati.
Buulusiit tifirha
2Iginꞌaayeekna tehooyteeb gaw dehoon dꞌiina. Hinin gaal han amaag weeraab kinki, gaal han maraayaab kinki, gaal han tilsaab kinki. 3Ani een bareeh bareek gwabab haay sꞌabuukiib kaadi. Een bareeh ani suur diyaabu, baraak hineeb iginꞌaayeeb bak tꞌiiti mhiin tibariina. Hinin needhhaniyeek geebookna needhhani, niyaayeek geebookna niyaayi. 4Ani bareekna winneet aamanani, winneet aree hookna habnamani. Ani winneet akra ginꞌiibu, kasseeh igwirhaayeen geeb aniit tifirha agiyaab kiibariin.
5Hinin Magadoonyaab eenanihoob, uun hineeb ugaru fiinaab kiiki. Laakiin nakamnaneet jhaatiika amaag nitweeraay; barraay finaab aree tehooytee mirkwaay hoon daaya. 6Laakiin Ukwaasana iginꞌaayeet tehooy isꞌakiir, Tiituusiib wꞌaayii isꞌakir hoon, 7aree bariiyooh wꞌaayii oobhaat kiiki, laakiin barooh tehiiyyeet tisꞌakirooy han tisꞌakir hoon. Baruuk aniib eerhi harawaayook baruuh sooyi hoon, winneet igwirhaayeekwa, anii dehaay tiibriyeet tudaayiinaaywa sooyi hoon, aflaay aniit tifirha gwidakaat ikeen.
8Ani ujawaabiisu gwirhaab kehookna adꞌiyeek han, andimaab kaaki. Andimaab iiktiyeek han, laakiin ujawaabu lhasiyaneetookna toona akteen, laakiin shalikt midda toobhaat lhasiya hookna. 9Oontꞌa ani afirhaabu, ani bareekna gadabsaneet toonaati sabbii kiiki, laakiin igadabaakna tuubisiyaan hookna. Baraak Ukwaasana yharweet toonaatiit gadabtaana, aree hinin bareek adaatniina kwaasaab kinki. 10Ukwaasanaay ikatiin igadab umidhhan istoobiint tuuba ikatiin, aree nadamt kiikwaasna. Laakiin tuduniyaatii ikatiin igadab yat haay yꞌeen. 11Aan Ukwaasanaay ikatiin igadab hookna idꞌiineet toona shibibna: baraah kak fagaraab ikwaasna hookna, igarooyeekna kak tisinhasna! Hasiyaaytwa, midgweegwtwa, hayꞌiibwa, shibootwa, aree wꞌadil ikatiyi jillaay timarniit tishbibna. Kastooh toon tehalaagaaytiib baraak naatiibka nhas tikatiineet toona rhistaana. 12Ani marookna jawaab aktibeek han, beet toomaag idꞌiib tari toomaag itweeraay bariiyooh sabbii kiiki. Laakiin baraak Ukwaasanaay suurii hinee dehaay kak daayiib tikatiineet toona iknaayaakna rhiteeneet toona adgirteena. 13Hinin kastooh tunaatiib akra ginꞌiiba.
Hineeb wꞌakra ginꞌi geeb, Tiituus kak afirhaab iiktiyeeb rhinanihoob winneet nimdhadh. Bariiyaah aashuuk bareek kasseesookna gayiimiyaani sabbii hinin nimdhadh. 14Ani bareesookna habnamaab iiktiyeet toona barooh sooyan, baraak han aneeb siisakwꞌaab kitteena. Laakiin bareekna soonaneet tuuna kastuuh sidikuuyt, bareesookna iiktiin yhabna Tiituus soonaneeb han sidik iiktiin. 15Baruuh baraakna kassaakna tisnaakirneet toonaawwa, mirkwaayiiwwa katateewwa tꞌashishneet toonaawwa shꞌiiniyihoob, baruuh bareekna areeyiiniyeeb uureer kassuuh winkaab ikati. 16Ani bareekna aamananiyeet toonaatiib winneet afirhaabi.
Currently Selected:
2 Koorinteeneeb 7: BEJA
Highlight
Copy
Compare
Share
Want to have your highlights saved across all your devices? Sign up or sign in
2026 Seed Company and the MTT