Luugaay W'injiil 13
13
Ukwaasanaay Dehaay Agarna!
1Oontꞌa dehay gwadi beentooy iifiin. Biilaatoos idaareeb Jaliileeb uudehay beenhoob baraah Ukwaasanaay dehaay karaamaat iifirꞌaneet toona Yasuuꞌaab sooyaan. 2Yasuuꞌa bareeyooh dehaay, “Baraah bak lhamiyaanayt, aan Ijaliilaayi kasseeh Jaliileeb oodehay ooraawiika amagka danuub dꞌiyaab hiisteena han? 3Kiikeen, andi hookna! Laakiin baraakna han Ukwaasanaay dehaay bitꞌagaarneek, bak kwidhi tiyadna. 4Tari itamna asimhay Silwaameeb tusiraayi kehii dhibtanihoob iyaan baliin, baraah kasseeh Alguduseeb ikweer oodehay iraweeka gwidaka gwabab iibriineeb hiisteena han? 5Kiibariin, andi hookna. Laakiin baraakna han Ukwaasanaay dehaay bitꞌagaarneek, kassaakna bareetooh kwidhi tiyadna.” idi.
6Malya Yasuuꞌa een eemtaal hadiidiya: “Tak dirꞌaatiyooh tiini hindi yꞌadi. Aree whindiib Samaraat yhariw, laakiin naat han miraab kiiki. 7Aflaay baruuh udirꞌaateegaay dehaay, ‘Ani mhay hawla abari, oon ootiiniib firaay ahariw. Laakiin naat hooy miraab kaaki. Whindi wikaa! Whaashiib naanhooy mhiin anbiik?’ idi.
8Udirꞌaateega igwibi, ‘Duuruun! Barooh hawil weer masi ishaa! Bariiyooh kwayaay iifrik andi aree yakistiniina hooy iidꞌi andi. 9Whawil tꞌa yꞌiiniib daayi firaay farriyeek, ishboob! Biikaayeek, malya barooh wookaa.’ idi.” Yasuuꞌa idi.
Yasuuꞌa Takat Toosab Mheeliya
10Yasuuꞌa Yahuudi diini gaw gaalnaay toosab allami. 11Been oomhiin tamna asimhay hawla jin lhasaab iiktiineet takat tiifi. Batuuh winneet agwaal ahaatu aree timifdheedh kaꞌadgirta. 12Yasuuꞌa batooh rhiyanihoob suurbeeti waliikiyaayt, “Yaa takatay! Tulhanaaytook hooy nꞌiraatuwii.” idi. 13Malya batiiyooh kehii yꞌayeeh daasiyaayt, igidiyeesooh tutakat tifidhadh, aree Ukwaasana tehamid. 14Yasuuꞌa toosab mheelaabuuyt, Iyahuudi diini gawi suurkina winneet yhasi. Malya baruuh oodehayii dehaay, “Toosab nuun Asagwit yina hooy shagaamteeneet eefeen. Aflaay mꞌaana een eembꞌi hooy mheelamaana!” idi.
15Wꞌankwana bariiyooh dehaay, “Baraakna uumshuush! Bareesookna gaalka toosab uyooyooh tari umeekooh gwꞌasiiniyee dehaay wꞌalafiit mhakwartii fidigtiit haay kagiigiya han? 16Malya tuun tutakat, Ibraahiimiit oot, uubliis batooh tamna asimhay hawla yhakwir. Batooh hakwiraat toonaatii toosab titfadiigeet toona kitti han?” idi.
17Yasuuꞌa een ibhali idiyihoob, kassaah yꞌashooyaah isikwꞌana. Laakiin baruuh iidꞌeet teena tꞌajaayib kasteeh rhiyaan uudehay afirhiyaan.
Usinfaayt Habbaati Mitaal
18Malya Yasuuꞌa raatiya, “Ukwaasanaayt tehadꞌaayi kak tꞌiiteetu? Batiiyooh geeb naan asnaddiir? 19Batuuh usinfaayt habba tꞌiiteeti. Tak batooh iyhaayt dirꞌaatiyooh yꞌadi. Batuuh yaktaayt hindiib tiki, aree aakilay kehii askiniyaan.” idi.
Whamiiri Mitaal
20Yasuuꞌa masi raatiya, “Ukwaasanaayt tehadꞌaayi naanaati geeb asnaddiir? 21Batuuh takat hamiir yaksitaayt, winneet gwida bꞌuukiib tehathik. Malya kassuuh wꞌajiin yhamir. Beet batooh tꞌiiteeti.” idi.
Udheefa Wꞌadeha
22Malya Yasuuꞌa Algudus beeti sakee, timadiinaateebwa tigariyaateebwa oodehay allamiya. 23Tak gaal barooh raatiya, “Wꞌankwanaay! Shalik dehay midhhan imaar iyadna han?” idi.
Yasuuꞌa bareeyooh dehaay, 24“Udheefa wꞌadehalooyii shuumti jillaay winneet shagaamaana, andi hookna. Gwida dehay shuumtiib jarrabi iyadna, laakiin adgiri kiidiin. 25Ugawikina gaalhoob yakeetiit udheefa hankwiiri harꞌii, baraakna barraab gadtiit udheefa teekwilna, aree ‘Duuruun, udheefa dehoon fidiga!’ tiyadna.
Laakiin baruuh, ‘Kaakan hookna, tari naa mhiinii yꞌaabaana!’ iyaad indi.
26Been oodoor baraakna, ‘Geebook tamna aree gwꞌina, aree hineeb isalalaayeeb allamta.’ tiyadna.
27Laakiin baruuh igwaab indi, ‘Sidik kaakan hookna, tari naa mhiinii yꞌaabaana. Baraakna kassaakna tumaagnaayti sakana, hoosu sigiina!’ indi.
28Malya beentooy waawteena, aree lhamiit tikwileeteekna ishuuthithꞌa tiyadna. Ibraahiimwa, Isehaagwa, Yaaguubwa, kasseeh inabiyaawwa Ukwaasanaayt tehadꞌaayeetiib rhiteenihoob, laakiin baraakna fidnaab titoogiidna. 29Uudehay uyintalawiiwwa, uyindhibiiwwa, oosꞌiidiiwwa, tugiblaatiiwwa yꞌi iyadna. Ukwaasanaayt tehadꞌaayeetiit aduuma hadri iyadna. 30Baliin oontꞌa wꞌagiyaay eefeen suurii daayi iyadna. Aree baliin oontꞌa suurii eefeen wꞌagiyaay daayi iyadna.” idi.
Yasuuꞌa Algudus Areeya
31Been oodoor Fariisi gali Yasuuꞌii dehaay eeyaaniit, bariiyooh dehaay, “Oon oomhiinii giiga aree weer haash bayaa! Heeroodis madareek harriiw.” idiin.
32Yasuuꞌa igwibi, “Giigaanaat, beeb ubꞌashu sooyaana, ‘Ani eejin iifirꞌa andi, aree amseewwa lhaytwa oodehay mheeli andi, aree tooyin tumhaya faaysi andi.’ diina. 33Laakiin ani amseewwa lhaytwa tooyin tooraawwa tꞌiibaab ibakii isuuririm andi. Algudusee barraab iyaayi nabi kiihaay!
34Yaa Algudus! Algudus, batuuk inabiya tidaarii aree idiigwatkina batiiyook dehaay diigwatamiyaab rajamootaayii. Wꞌambuuriyooh whii inisrikaayeeh tismarriit tooklaaytiit, ani diimaab udehayook asmarriyeet aharriiw, laakiin batuuk tiribii. 35Oontꞌa ugawuukna mingaayama dehookna imhi. Andi hookna, baraakna ‘Wꞌankwanaay oosmii yꞌiiniib been baarakamaabu!’ tiyadneeb hadiit masi rhiheeb kitdiin.” idi.
Currently Selected:
Luugaay W'injiil 13: BEJA
Highlight
Share
Compare
Copy
Want to have your highlights saved across all your devices? Sign up or sign in
2026 Seed Company and the MTT
