Luugaay W'injiil 6
6
Tusabti Ankwana
1Sabt gaat Yasuuꞌa harrooyt dirꞌaati bitik saki, aree ikwiriyaatayaah gangaraab ikitꞌaniit ishmitniitka tehabba tamiyaan. 2Fariisi gali bareeyooh dehaay, “Tusabtiib harramamaana naanhooy sakteena?” idiin.
3Yasuuꞌa bareeyooh dehaay igwibi, “Whadꞌa Daawidwa yꞌarawaahwa yharagwnihoob, baruuh sakiyaneet toona agriiyaab kitteena han? 4Daawid Ukwaasanaay gaw shuumiyaayt, Ukwaasanaay dehaay farꞌa tikaraamaati hadhi tamiya. Baliib yhadhi ifagiiriya nuun wari katamiyaan. Aree yꞌaraweeh han naat yhii.” idi. 5Malya Yasuuꞌa bareeyooh dehaay, “Wꞌaadami Oor tusabti Ankwana ikati.” idi.
Wꞌayi Adhaadh Iiktiyeeb Ootak
6Sabt weet baruuh Iyahuudi diini gaw shuumiyaayt, oodehay allamiya. Been oomhiin wꞌayi umaykwa ayaab iiktiyi tak iifi. 7Ifariisiiwwa, whaggi koojaawwa Yasuuꞌaab haay atehimiini sabab yhiriwna. Aflaay baruuh ootak toosab mheeliini han kaamheeliya isdawilni igwꞌadna. 8Laakiin Yasuuꞌa baraah iikwinneet toona iktiin. Aree ootak wꞌayi ayaab iiktiyeenaay dehaay, “Yakaat kassooh oodehayi suurii asti gadaa!” idi. Aflaay uutak yakiyaayt, beentooy asti ingad.
9Malya Yasuuꞌa bareeyooh dehaay, “Raati hookna andi! Tusabtiib naan halaalu: tudaayiinaayti sakti han tumaagnaay? Gaalnaayt shidhhanooyt han kwidhistiib?” idi.
10Baruuh kasseeh bareeyooh nakamiya, malya ootakii dehaay, “Wꞌayook fidhidha!” idi. Uutak bak idꞌi, aree wꞌayuuh winneet inꞌir. 11Laakiin baraah winneet yhaseeniit, Yasuuꞌaab kak iwariineeb taktaki geeb tarootsamiyaan.
Ilinguumiya Itamna Malu
12Baliit tiyinaateeb yint gaat Yasuuꞌa siileelti jillaay ribaab reewiyaayt, whawaad kassooh beentooy Ukwaasanaay dehaay siileeliya. 13Uumha mhiyanihoob, Ikwiriyaatayeeh waliikiyaayt, bareesooh tamna maloob waasiya. Bareeh ilinguumiya isim: 14Siimoon tari Bitrus simaab iiktiyeebwa, Andaraawoos oosanwa, Yaaguubwa, Yuuhannaawwa, Fiilibuswa, Baartulamaawooswa, 15Mattaawwa, Toomaaswa, Yaaguub Alfaaꞌiyoosi oorwa, Siimoon “Wꞌashꞌara” iidneebwa, 16Yahuudaab Yaaguubiib oosanwa, Yahuudaab Wꞌiskaaryuuti malya ukhaayin ikeebwa, een bareeh isim.
Yasuuꞌa Allamiini Aree Mheeliini
17Yasuuꞌa bareeyooh geeb ikwibar eeyanihoob, gwida kwiriyaatayi geeb dangaltiib ingad. Gwida dehay kassooh Yahuudaaywa Algudusee yꞌaabwa, oobhari ginnaaliib iifiint timadiina Tiirooswa Siidooneewwa yꞌaabwa beentooy iifiin. 18Baliin baraah barooh isniikarni jillaaywa, tilhanayteesoohna mheelamiini jillaaywa yꞌaaba. Baliib aajin hooy iifiineeb han mheelamiyaan. 19Bariisooh yꞌiin yꞌakrir bareeh kasseeh mheeliinayt, kassuuh uudehay bariiyooh itatehiti yhiriwna.
Tifirhaawwa Igadabwa
20Yasuuꞌa ikwiriyaatayeeh ishbibaayt:
“Libaabtaana, baraakna imiskiina,
Ukwaasanaayt tehadꞌaayi bareetookna tikati.
21Libaabtaana, baraakna oontꞌa yhargwa,
gabi tiyadna.
Libaabtaana, baraakna oontꞌa waaween,
iifiyad tiyadna.
22Libaabtaana, Wꞌaadami Oori sabbii uudehay
himaageen hookna,
itafilna hookna aree neeween hookna
wꞌamaag dehayiit eeribna hookna.
23Wꞌijruukna tibreeteeb gwidaabuuyt, beet tooyin afirhaana aree midhadhna. Bareeyaah yhooba suur inabiya bak weeraaba.
24Laakiin tidhikwna, baraakna oontꞌa igabaab!
Tuduniyaatiit nafirnaay wꞌijaarookna timriina.
25Tidhikwna, baraakna oontꞌa dꞌooramaab!
Baraakna itehirigw tiyadna.
Tidhikwna, baraakna oontꞌa yꞌeefiyiid!
nawwaatiit waawi tiyadna.
26Tidhikwna, kassaah uudehay daayiinayt hookna hadiideenihoob,
suur bareeyaah yhooba inabiya igwisreeb bak iweerna.” idi.
Yꞌashooyeekna Areeyaana
27Yasuuꞌa, “Laakiin baraakna uudehay aneeb yꞌisnaakiir andi hookna: Yꞌashooyeekna areeyaana! Baliib iroobanaayeekna daayiinaayt weerna. 28Oodehay wꞌinꞌiitookna deharna. Baliib amaag hookna sakeen dehaay siileelaana. 29Gaal udaraagook oongaal inthꞌeek, ooraaw han hiiyya! Gaal sideeriyaaytook iniineek, gamiisook han baahabiya. 30Tak naat hook harriiwihoob, toona teharriiweet hiiyya! Gaal bariitookna iniineek, aguur hooy baahariiwa. 31Uudehay dehookna baꞌiidꞌiin tiyadneet toona, baraakna han dehaay dꞌiina.
32Oodehay yꞌareeyeeneekna areeteeneek, naan rayiimteena? Yꞌamag da han yꞌareeyeeneehna areeyeen. 33Oodehay daayiib iwariineekna daayiib tiwariineek, naan rayiimteena? Yꞌamag da han beet toona sakeen. 34Oodehay ookwis hooy sꞌayaamteeneeb tisiisaliifneek, naan rayiimteena? Yꞌamag da han yꞌamag da isiisaliifna, timmiimaana itkwasiineet toona sꞌayaameen. 35Laakiin yꞌashooyeekna areeyaana, daayiib weerna, siisalifna aree kwis baasꞌayaamaana. Malya wꞌijruukna guudi indi, aree Winneet Utageegaay ar iikti tiyadna. Baruuh baliib ibaahamiidaawwa yꞌamag daawwa dehaay nꞌakwmanaayiini. 36Baabuukna rahiim ikatiyeet toonaatiit, rahiimaab akeena.” idi.
Eeraw Baahaakamaana!
37Yasuuꞌa “Baahaakamaana, aree haakamami kitdiina. Baaꞌankiraana, aree ankirami kitdiina. Afooyaana, aree afoomi tiyadna. 38Hiina, aree ittiyiw tiyadna. Daayi abaar, ataabna, hiddaab atyawawꞌaana, teetfiifna hiina, beet tuuna yꞌayeekna beeti ituufif tindi. Wꞌabaar itiyawneenaay dehookna abbarami tindi.” idi.
39Yasuuꞌa een ibhali bareeh mitaalee dehaay hadiidiya: “Hamashay tak gaal weer hamashay salooliini han? Baraah mhallaahna deelaay dhibi kiidiin han? 40Ukwiriyaataayi ukoojaayooh mhakwal kiiki. Laakiin daayiib allamamiiniibka, ukoojaayooh tꞌiiteeb iikti indi.
41Naanhooy tehakwa uraawiyook gwꞌadiib shanbiiba, bariiyook ugwꞌadiib itragiig ukwoolay karhita han? 42Tari usaniyook dehaay, ‘Yaa oosan, ugwꞌadiisook tehakwa hook firꞌat yꞌani!’ kak tindiya, yaa uumshuush? Ugwꞌadiyook eefeeb ukwoolay rhaab baakaay!
Awwal ukwoolay ugwꞌadiisook firꞌaa, malya daayiib rhitniyihoob, tehakwa usaniyook ugwꞌadii firꞌaa!” idi.
Whindi Ufraayiisooh Itookkiin
43Yasuuꞌa “Daayi hindi amaag firaay haay yꞌiini kiihaay. Amaag hindi aree daayi firaay haay yꞌiini kiihaay. 44Hindiibka ufiraaysooh itookkiin. Uudehay tinaweetee tiin kiimriina, tari wꞌadaarii inab kiimriin. 45Uutak udaayi, uginꞌiyooh dibiyaab ikatiyeet tudaayiinaaytii daayiina mhaliini. Uutak wꞌamaag, uginꞌiyooh dibiyaab ikatiyeet tumaagtii amaagnaayt mhaliini. Uuyaf uginꞌiib teefeet toona hadiidiini.” idi.
Oogaw Uliilaawi Mooyiib Shagaamamaab
46Malya Yasuuꞌa, “Naanhooy ‘Wꞌankwanaay! Wꞌankwanaay!’ tiyadnaheeb, ani ‘Sakaana!’ andiyeetookna kasaktaana? 47Been anii dehaay yꞌeetiit aniib ibhali isnaakiir aree bareeh haay shagaamiiniib uutak, kak tꞌiiteeb ikatiyeeb, ani rhisi hookna andi. 48Uun baruuh ootak oogaw indꞌiir tꞌiiteebi. Been baruuh hooga di ifrikaayt wꞌasaas liilaawi kehii idꞌi. Kwaan eeyanihoob, aayam been oogaw ithꞌana. Laakiin uugaw daayiib dꞌaaruuyt aayam barooh hankalsaab kiikeen. 49Laakiin been aniib ibhali maasiwtiit, bareeh haay baashagaamay, whaashi kehii gaw asaas anu idꞌir ootak tꞌiiteebi. Uukwaan been oogaw ithꞌihoob, baruuh dhibiya aree winneet dayꞌamiya.” idi.
Currently Selected:
Luugaay W'injiil 6: BEJA
Highlight
Share
Compare
Copy
Want to have your highlights saved across all your devices? Sign up or sign in
2026 Seed Company and the MTT
