Mattaay 7
7
Oodehay uraawi haakamti
1Yasuuꞌa “Baahaakamaana, tari baraak han haakamamteena. 2Oodehay ooraaw haakamteeneet tehayꞌaatiit, baraak han oontꞌaaneet haakamami tiyadna. Wꞌabaar haay tiyawneeb, haay ittiyiw tiyadna.
3Naanhooy tehakwa uraawiyook ugwꞌadiib shanbiiba, bariiyook ugwꞌadiib itragiig ukwoolay karhita han? 4Baruuk usaniyook dehaay, ‘Tehakwa hook firꞌat.’ kak tindiya? Barook kassooh oodoor ukwoolay ugwꞌadiyook itragiigeek? 5Baruuk haraay oorwa, hankaab ukwoolay ugwꞌadiisook firꞌaat malya daayiib rhitniyihoob, tehakwa usaniyook ugwꞌadii firꞌaa.
6Wꞌankwanaayt mugaddasna eeyas baahiina. Ijawharaayeekna ikhansir baahiina. Een tiwariineek, baraah bareeh iragadaayi whii eeteena, malya bareeyookna nakameetiit katꞌi hookna iyadna.
Raataana, hariwna, kadhawsaana
7Raataana, aree beet toona ittiyiw tiyadna. Hariwna, aree imaar tiyadna. Udheefa kwilna aree baruuh dehookna itnigil indi. 8Raatiiniibka iniin. Harriiwka marri. Aree udheefa inkwiilka baruuh dehaay itnigil indi.
9Bareesookna wꞌooruuh hadhiib raatiiniyihoob, aweeb iniiw aabu? 10Tari aashoob raatiiniyihoob, kwakwar iniiw aabu? 11Aree bareekna tikatiineek, baraakna yꞌamag, yꞌareekna kak daayiina tiyawneeb tikteenna. Aflaay Baabuukna tibreeteeb eefi, oodehay barooh daayiinayt raateen kak winneet gwidaana iyaaw indi! 12Aflaay kastooh tunaatiibka, uudehay dehookna dꞌuuy hooy tehariwneet toona, baraak han dehaay dꞌiina. Uun aree Muusaay whagwa inabiyaayi tꞌaliimwa kassooh ikati.
Udheefa umarꞌaawwa wꞌadehaawwa
13Udheefa wꞌadehaanaay shuumaana. Udheefa umarꞌalooy toonꞌi istoobi salalu, aree gwida dehay haay hasameen. 14Laakiin udheefa uudis adeha salal umidhhan istoobiibu, aree shalik dehay aabhat barooh imeerna.
Whindiiwwa ifraayuuswa
15Gwisri nabiyaayee digwagwna. Baraah ganay tꞌiiteeb akay yꞌeen hookna, laakiin baraah tehooytee kwakwaraaba. 16Bareeh ishanhiisoohna iikan tiyadna. Uudehay naweetee inab lakkateen han? Tari kitirii tiin lakkatamiini han? 17Oontꞌaaneet whindi udaayi daayi firaay fanri, laakiin whindi wꞌamaag amaag firaay fanri. 18Whindi udaayi amaag firaay kiifiri. Whindi wꞌamaag aree daayi firaay kiifiri. 19Whindi daayi firaay baafariib ugadamii kitꞌatiit nꞌeetiib itoogiid. 20Aflaay bareeh han ishanhiisoohna iikan tiyadna.
21Anii dehaay ‘Wꞌankwana, Wꞌankwana,’ indiibka kassaah tibreeteet hadꞌaayi shuumi kiidiin. Laakiin Baabu tibreeteeb eefi harriiweet toona sakiiniib uubhaat shuumi indi. 22Been oombꞌi gwida dehay, ‘Wꞌankwana, Wꞌankwana, bariiyook oosmii Ukwaasanaay ibhali soona, bariiyook oosmii eejin nifarꞌa, bariiyook oosmii aree gwidaat mꞌuujisa nikwaas.’ iyadnaheeb. 23Malya ani bareeh oosdik sooyani, ‘Kaakan hookna hoosu giigaana, baraak maagti kinaabaana.’ andi.
Idꞌaariiga ifagaraawwa yꞌafrayaawwa
24Een aniib ibhali eemsiiw kassaah, malya na haay shagaameen, ootak ufagar ugawooh liilaawi kehii idꞌir tꞌiiteeba. 25Uubri iyaamiit uukwaan asti eeya, ubaraam oogaw infiyihoob, uugaw liilaawi kehii daamaabuuyt dhibaab kiiki. 26Laakiin aniib ibhali maasiwtiit malya na haay baashagaamayka, ootak wꞌafrii ugawooh isseeteeb idꞌir tꞌiiteeba. 27Uubri iyaamihoob, uukwaan asti eeya, ubaraam oogaw infiyihoob, uugaw winneet dhibiyaayt itirhaagw.” idi Yasuuꞌa.
28Yasuuꞌa teen teena idiit faayisiyanihoob, uudehay bariiyooh wꞌallamtiib ajjabamiyaan. 29Baruuh tehadꞌaayi ibariib gaal tꞌiiteena teen teena allami akay, aree whaggi koojaayeehna tꞌiiteeb kiiki.
Currently Selected:
Mattaay 7: BEJA
Highlight
Share
Compare
Copy
Want to have your highlights saved across all your devices? Sign up or sign in
2026 Seed Company and the MTT
