Maargoo 1
1
Yuuhanna umoosana usalal isoomir
1Uun baruuh usakana udaayiinaay isuurdaba. Yasuuꞌaab Umasiih Ukwaasanaay Ooriib hadiidiiniibi.
2Aan ibhali unabi Isyaasiib ooktaabiib kataba:
“Ukwaasana ‘Udiigwatkinaayu usalal dehook isoomiiree dehaay
suurook iifidig andi.’ diyaabi.
3Umingaayiib waliikiini hiss, ‘Wꞌankwanaay usalal soomirna! Tilagiiteeh fadhadht kwaasna!’ indi.” idi.
4Aflaay Yuuhanna umoosana umingaayiib lawiya. Oodehayii dehaay, “Ukwaasanaay dehaay tuubaana aree atoomaasna! Malya idanuubaakna afoomi iyadna.” idi. 5Kassaah Yahuudaay whaashi dehaywa kassaah Alguduseeb uudehay bariiyooh dehaay ifirꞌana. Idanuubeehna ifidhadhna, aree Urduneeb ubhariib barooh itoomaasna. 6Yuuhanna kaami hamooyee shagaamama halaka ikwi, habaab ilbab, aree yaaweetwa awitwa tamiya. 7Bariituuh tudiigwat aree bak tiifi: “Ani harꞌii aniika akraka gaal yꞌiini. Ani oon barooh tigidhꞌaateeyooh imhakwara afandiigeet toona han kaꞌastehalan. 8Ani yamee anmiis hookna. Been baruuh laakiin Eeshuuk Imugaddasaayee inmiis hookna.” idi.
Yasuuꞌa itoomaas aree uubliis barooh jarrabiya
9Beenhoob Yasuuꞌa, Jaliileeb teefeet Naasiraay eeya. Yuuhanna Wꞌurduni bhariib barooh imis. 10Yasuuꞌa iyamee ifirꞌihoob, teebiri nigalee rhiya. Eeshuuk Imugaddasa aree kwibheeriitiit hayꞌaatiit dehaay gidehee rhiya. 11Tibireetee hiss eeya: “Baruuk wꞌooru winneet wꞌareeyanyeebwa. Ani akraab hook afirhaabu.” idi.
12Gaalhoob Aashuuk Yasuuꞌaab umingaay beeti salooliyaan. 13Beentooy uubliis fadhig tamuunt yina barooh jarrabiya. Beenhoob Yasuuꞌa malaaliit dhhanyaati gwad iifii, aree imalak barooh shagaamiin.
Yasuuꞌa Usakana Udaayiib sooya
14Yuuhanna yhakwaraayt harꞌii, Yasuuꞌa Jaliilee dehaay eeyaayt Ukwaasanaay usakana udaayiib sooya. 15Yasuuꞌa “Oontꞌa idaman yꞌaaba, Ukwaasanaayt tehadꞌaayi dawiltooknaati. Tuubaana, usakana udaayiib aamanaana!” idi.
Yasuuꞌa ikwiriyaatay yꞌawwaliib waliikiya
16Yasuuꞌa Jaliileeb iyami ginnaalii sakee, malu aashoob aabki Siimoonwa usanooh Andaraawooswa rhiya. Baraah tishabakaateehna ubhariib iigidna. 17Yasuuꞌa bareeyooh dehaay, “Yakaana, gwadu mꞌaana! Dehayi aabki iikwasi hookna andi.” idi. 18Gaalhoob tishabakaateehna ingadna idꞌiiniit barooh iramna.
19Yasuuꞌa shalikt midda hiireeriyaayt harꞌii, Yaaguub Sabadi oorwa oosan Yuuhannaawwa falluukaatiib rhiya. Baraah tishabakaateehna ishiishbuubna. 20Igidiyeesooh Yasuuꞌa bareeh waliikiya. Baraah ubaaba Sabadiib tufalluukaatiib eenda ishagaamanaayi geeb yꞌishniit, Yasuuꞌaab iramna.
Yasuuꞌa takii jin mhaliya
21Baraah tumadiina Kafarnaahuum ibeena. Tuusab eetanihoob aree Yasuuꞌa oodiini gaw shuumiyaayt agriistiib badooya. 22Uudehay bariiyooh wꞌallamtiib ajjabamiyaan. Baruuh tehadꞌaayi ibariib gaal tꞌiiteena teen teena allami akay, aree whaggi kooja tꞌiiteeb kiiki. 23Iyahuudi diini gawiib jin hooy iifiini tak gaalhoob eeya. Uun uutak aadhiya, 24“Yasuuꞌa Unaasiraayi! Naan hoon harriiwa? Kwidhsitiyoon dehaay yꞌaabwa han? Ani akteen hook, baruuk Ukwaasanaay Umugaddas Oongaal tikatiya!” idi.
25Yasuuꞌa eejin idninaayt, “Tim akaa! Ootak hooy firꞌaa!” idi. 26Aajin ootak winneet irgisna, tageega hissii aadhiyaaniit hooy ifirꞌana.
27Uudehay kassaah ajjabisiyaaniit taktak raatiyaana, “Tuun naanaatu? Gayi tꞌaliim hadꞌaayeetii bhaliimiiniibu! Baruuh eejin danniinihoob, aajin barooh isnaakiirna.” idiin. 28Yasuuꞌiib usakana kassooh Jaliileeb whaashiib willa ibrar.
Yasuuꞌa gwida dehay mheeliya
29Baraah Iyahuudi diini gawii willa giigiyaaniit, Yaaguubwa Yuuhannaaywa geeb Siimoonwa Andaraawoosiibwa ugawiib shuumiyaan. 30Siimooniit teham abaakiib barii nꞌaaliib bꞌaa tiifi. Baraah willa Yasuuꞌii dehaay batiiyooh whaal hadiidiyaan. 31Aflaay Yasuuꞌa tootakat idwil, wꞌayi yꞌabikaayt isingad. Malya yꞌabaaki tootakatii giigiyaan. Aree batuuh bareeyooh dehaay mꞌariit shagaamta.
32Tuuyin dhibtanihoob, kassooh oodehay oolhaabwa eejin hooy iifiineebwa Yasuuꞌii dehaay haay eeyaan. 33Kastooh tumadiinaatii uudehay ugawi dheefaay suurii idbalna. 34Yasuuꞌa gwidaat lhanay iibriin oodehay mheeliya. Oodehayii gwida jin han ifirꞌa. Aajin baruuh aab iiktiyeet toona ikannayt, Yasuuꞌa bareeh wari bhali hadiidsaab kiiki.
Yasuuꞌa mingaayama mhiiniib sileeliya
35Tooyin tooraaw Yasuuꞌa teekiruum ibꞌar. Siileeliyi jillaay nageema mhiin ibi. 36Siimoonwa yꞌarawaahwa bariiyooh harawaay yakiyaan. 37Aree barooh imriinihoob, “Uudehay kassaah barook yhariwna.” idiin.
38Laakiin Yasuuꞌa bareeyooh dehaay, “Timadiina teeraw han ibakii neebiyeet toonaati. Aflaay ani beentooy usakana udaayiib bhaliiyi andi. Oon usabbii dehaay ani yꞌaabi.” idi. 39Aflaay Yasuuꞌa kassooh Jaliileeb whaashiib sakiya, Iyahuudi diini gawaayeeb usakana udaayiib bhaliiya, aree eejin ifirꞌa.
Yasuuꞌa tak bhadh iibriib mheeliya
40Tak bhadh iibriib Yasuuꞌii dehaay eeya. Whaashiib bariiyooh whii ignafaayt aree inꞌal, “Wꞌankwanaay, sinꞌiraheeb, harriiweek na tisinꞌiiraheeb!” idi.
41Yasuuꞌa bariiyooh dehaay nꞌakwmanaayaayt wꞌayooh ootaki kehii daasiyaayt, “Aharriiw, nhas akaa!” idi. 42Igidiyeesooh uubhadh ootakii giigiya aree baruuh inꞌir.
43Yasuuꞌa ootak akra soob sooyaayt giigisiya: 44“Toon toona gaal tak han baasooya! Difaat ugarooyook ufagiiri rhisa. Iminhiseeyook dehaay unabi Muusa firꞌana diyaab iiktiyeet tikaraama firꞌa! Beet tuuna iminhiseet badeha tikati.” idi. 45Laakiin uutak giigiyaayt kassooh oodehayi kehii oon usakana ibrir. Toon toonaati sabbii, Yasuuꞌa madiinaat gaanaati shuumti han adgirat irib. Baruuh oodꞌooh daayaneek han, uudehay masi kasseeh yhashee bariiyooh dehaay eeyaan.
Currently Selected:
Maargoo 1: BEJA
Highlight
Share
Compare
Copy
Want to have your highlights saved across all your devices? Sign up or sign in
2026 Seed Company and the MTT
