Maargoo 2
2
Yasuuꞌa tak garbamaab mheeliya
1Shalikt yinaati harꞌii Yasuuꞌa Kafarnaahuum beeti yꞌagar. Uudehay baruuh ugawiib iifiyeet toona imaasiwna. 2Gwida dehay immararaayna, kassuuh uumhiin udheefa hadiit itab. Yasuuꞌa bareeyooh kehii Usakana Udaayiib hadiidi. 3Da gwadi eeyaana, amꞌadhdha tak fadhig da itfiyikneeb bariiyooh dehaay haay eeyaan. 4Laakiin udehayiit guudti sabbii, ishuumti adgirat iribnihoob, ootak ugawi mooy haay reewiyaan. Malya oogaw umooyii itilꞌaniit, been ootak madhamti kehii haayee oodehayi bitikii hoogisiyaan, aree Yasuuꞌi suurii daasiyaan. 5Yasuuꞌa wꞌiimaanoohna rhiyanihoob, ootak wꞌamꞌadhdhaanaay dehaay, “Wꞌooruun! Tumaagnaaytuuk afoomaati.” idi.
6Oontꞌa haggi kooja gwadi beentooy iistꞌana, baraah aakna kwakwooniin: 7“Uun baruuh naanhooy bak hadiidiini? Baruuh kifuuri bhali hadiidiini! Ukwaasana oodꞌooh baakaay, weer adgiriit tumaagnaay afooyiini aabu?” idiin.
8Laakiin Yasuuꞌa baraah iginꞌaayeeb iikwinneet toona willa ikan, aree bareeyooh dehaay, “Naanhooy teen teena teekwinna? 9Naan laamakaatu: ootak wꞌamꞌadhdhaay dehaay, ‘Tumaagnaaytuuk afoomaatu,’ uumiyaad laamakaab han, hana ‘Yhaa! Yakaa! Tumadhamtook yaksaat giiga!’ uumiyaad, naan laamakaatu? 10Laakiin Wꞌaadami Oor tubuutiib tumaagnaay haay afooyiiniyi akrir ibariyeet toona kanaant asehariiw hookna.” idi. Aflaay baruuh ootak wꞌamꞌadhdhaay dehaay, 11“Yhaa yakaa! Tumadhamtook yaksaat ugawook bayaa!” idi. 12Uutak igidiyeesooh baraah kassaah shibbee, tumadhamtooh yakisiyaayt giigiya. Kassaah uudehay ajjabamiyaana aree Ukwaasana yhamidna, “Beet toona tꞌiiteena door han rhaab kinki!” idiin.
Yasuuꞌa Laawiib waliikiya
13Yasuuꞌa Jaliileeb iyami kwayaay dehaay yꞌagar. Gwida dehay bariiyooh dehaay immarraayna. Baruuh han bareeh agriistiib badooya. 14Malya Yasuuꞌa hasamee tilbaat lakkatanaab Laawiib Alfaaꞌiyoosi oor iidneeb, umaktab utilbaatiinaay sꞌee rhiya. Oon ootakii dehaay, “Ramaheeb!” idi. Ulaawi yakiyaayt, barooh iram.
15Yasuuꞌa Ulaawi gawiib mꞌariit tamiya. Gwida tilbaat lakkatanaawwa maagtikinaawwa han baroohwa ikwiriyaatayeehwa geeb tamiyaan. Beentooy gwida barooh iitram han iifiin. 16Whaggi kooja Fariisiib iiktiin barooh itilbaat lakkatanaawwa toomaagtikinaayi geebwa tamee rhiyaanihoob, ikwiriyaatayeeh raatiyaana, “Kak itilbaat lakkatanaayi geebwa toomaagtikinaayi geebwa tamiini?” idiin.
17Yasuuꞌa toon imaasiwihoob, bareeyooh dehaay, “Uudehay udalha hakiimii dehaay kiishinhana, eelhaab nuun. Ani timaagnaytikina waliiktii dehaay yꞌaabu nuun, tooshbu sakeennee dehaay yꞌaab kaaki.” idi.
Yasuuꞌa tubaaskiitiib hadiidiya
18Oontꞌa Yuuhannaay ikwiriyaataywa Ifariisiiwwa baaskiitiin. Dehay gali Yasuuꞌii dehaay eeyaaniit raatiyaana, “Yuuhannaay ikwiriyaataywa Ifariisiiwwa baaskiiteen. Laakiin ikwiriyaatayaak kak kabaaskiitiyaan?” idiin.
19Yasuuꞌa igwibi, “Idoobaayi ar idoobeeb haayee kak baaskiiteen? Udooba gwad haayee baaskiiteenee dehaay kaꞌadgiriyaan. 20Laakiin udooba bareesooh yakamiiniyi daman daayeen. Aree baraah been oombꞌi baaskiiteen.
21Silhaayt gayi halakii firꞌatiit, shꞌiiya halakiib kitehayad. Whalak ugayi shatatamiini, tusilhaay whalak ugayiib amaagkaana shatatiini. 22Aat gayiit hamiit aateeb kiiꞌamshawwaayna. Tiyꞌa tigayiit tehamiitꞌa thawseena, aree taakna kiishiboobna, tehawat han eemigna. Tiyꞌa tigayiit laakiin nhas hawattiib ibakii daayeen. Hamiit aat limda tak tigayiit kiihamid, tehamiit iseheeyiis.” idi.
Tusabti Ankwana
23Sabt gaat Yasuuꞌa harrooyt dirꞌaati bitik saki, aree ikwiriyaatayaah bariiyooh geeb hiireeree, baraah gangaraab galib ikitꞌana. 24Ifariisi bariiyooh dehaay, “Yhaa, tusabtiib harramamaat toona naanhooy sakteena?” idiin.
25Yasuuꞌa Ifariisiyee dehaay, “Daawidwa yꞌarawaahwa ishinhaniit yharagwnihoob, baruuh sakiyaneet toona agriiyaab kitteena han? 26Abiiꞌasaar ufagiiri oowinnaay udamaaniib, Daawid Ukwaasanaay oogaw shuumiyaayt, hadhiib Ukwaasanaay dehaay farꞌa tikaraamaati hadhi tamiya. Aree yꞌaraweeh igeeb iifiin han tamisiya.” idi.
27Malyaab Yasuuꞌa bareeyooh dehaay, “Tuusab oodehayi jillaay daamaati nuun, uudehay tusabti jillaay daamaab kiikeen. 28Aflaay Wꞌaadami Oor han tusabti Ankwana ikati.” idi.
Currently Selected:
Maargoo 2: BEJA
Highlight
Share
Compare
Copy
Want to have your highlights saved across all your devices? Sign up or sign in
2026 Seed Company and the MTT
