Maargoo 15
15
Yasuuꞌa Biilaatoosi suurii
1Fajir karuumaab ifagiiriya isuurkinaawwa, isuurkinaawwa, whaggi koojaawwa, kassuuh Iyahuudi majliswa immarraayniit immakkaarna. Aflaay baraah Yasuuꞌaab yhaakwirniit haay giigiyaan. Whaakim Biilaatoos sallamiyaan. 2Biilaatoos Yasuuꞌaab raatiya, “Baruuk Yahuudi hadꞌaawwa?” idi. Yasuuꞌa, “Aan bariiyeek bhaliiya.” idi.
3Ifagiiriya isuurkina gwidaat maagnaaytii Yasuuꞌa atehimiyaan. 4Aflaay Biilaatoos masi, “Baruuk naat kitdiya han? Uudehay gwidaanaatii atehimeen hook shibiba.” idi.
5Laakiin Yasuuꞌa masi naat han diyaab kiiki. Biilaatoos aree winneet ajjabamiya.
6Whaakim aadaat iibri, wꞌiidiib diima usijnii uudehay yhiriwneeb wꞌabuuki bareeyooh dehaay iifirꞌa. 7Baarabaas iidni tak suur tumadiinaatiib iki finaay gaal diraa whabsiib iifi. 8Uudehay eeyaaniit Biilaatoos abuukiib gaalnaay fiduug hooy yhariwna. Beet toona baruuh diimaab saki.
9Biilaatoos “Iyahuudi hadꞌa dehookna afandiigeet hoosu tehariwna han?” idiit bareeh raatiya. 10Biilaatoos ifagiiriya isuurkina Yasuuꞌa hasaadaateeb dehaay haay yꞌaab iiktiineet toona iktiin. 11Laakiin ifagiiriya isuurkina oodehay isbibna. Biilaatoos raatiit Baarabaas isfadiigneet toona hooy yhariwna.
12Biilaatoos bareeh masi raatiya, “Ootak baraakna Iyahuudi hadꞌa tiyadneeb kak awari?” idi.
13Laakiin uudehay waliikiyaana, “Barooh Sallabaa!” idiin.
14Biilaatoos bareeh raatiya, “Naanhooy? Baruuh amaagna naan gwibbaabu?” idi.
Laakiin baraah kassaah tageega hissaayee, “Barooh Sallabaa!” idiiniit waliikiyaan.
15Biilaatoos baraah yhiriwneet toona sakiya. Aflaay baruuh Baarabaas bareeyooh dehaay ifdig. Biilaatoos Yasuuꞌaab ithabꞌa aree isallabamti jillaay bareeh nuuniya.
Ikajar Yasuuꞌa haay kashiyaan
16Ikajar Yasuuꞌa whaakimiit siraayi beeti haay giigiyaan. Ikajar eeraw kasseeh hiddaab idbilna. 17Baraah Yasuuꞌaab adaarhamaash halak istookwna. Danti taaj shagaamiyaaniit bariiyooh kehii daasiyaan. 18Barooh haay kashiyaana, “Iyahuudi hadꞌa, kwatiibwa?” iidna. 19Yasuuꞌaab doorka doorka kwoolayii ugirma iithꞌana, bariiyooh kehii tatifiyaan. Ginaftiit bariiyooh dehaay asjidiin. 20Malya ikajar Yasuuꞌaab haay kashiyaani harꞌii, whalak wꞌadaarhamaash hooy ifirꞌaniit, yhalakaayeeh istookwna. Malya sallabiinee dehaay haay giigiyaan.
Yasuuꞌiib isallabti
21Siimoon Geerawaani, Iskandarwa Ruufuusiibwa ubaaba, tudirꞌaatii yꞌee ikajar akruurii barooh usaliibi hindi yaksiisiyaan. 22Baraah Yasuuꞌaab Goolgoota ittiyoodi mhiiniib haay eeyaana, aree been baruuh “Kalhooy Mhiin” miyaadi. 23Beentooy Yasuuꞌa haab mir hooy iifiyeeb nuuniyaana. Laakiin baruuh wha irib. 24Malya barooh sallabiyaan. Ikajar gurꞌaat igidniit, tugurꞌa dehaay dhibtaneeb bariiyeeh yhalaka imꞌadhdhaadhna.
25Oodoor baraah sallabiinihoob, aawiit tuusꞌa ashshadhigt tiifi. 26Yasuuꞌi girmaay kehii, “Uun baruuh Iyahuudi hadꞌa!” miyaad kataabi. 27Bariiyooh geeb malu gwihara sallabiyaan. Gaal umaygwadii dehaay, ooraaw utrahagwadii dehaay sallabiyaan. 28Aflaay iktabeeb katab ibhali sidik iiktiina, “Barooh toomaag sakanaayi geeb ishabibna.” indi. 29Uudehay beentooysii hasamiin barooh neewiyaan. Igirmaayeehna gidiitka “Aaha! Baruuk ‘Wꞌankwanaay oogaw katꞌiit, mhay bꞌeeyeeb andꞌiir.’ tidiya. 30Tꞌa ugarooyook shidhhana! Usaliibii kwibara mꞌaa!” idiin. 31Ifagiiriya isuurkinaawwa, whaggi koojaawwa han bariiyooh faaydee, “Oodehay eeraw ishidhhiin, laakiin ugarooyooh kiishidhhan! 32Uun Umasiihi, Israaꞌiileeb whadꞌa, usaliibii oontꞌa batikwi! Malya niishbib, aamanni aree niyad.” idiin. Aanda imalu toomaag sakaab han barooh neewiyaan.
Yasuuꞌiit tooyat
33Nabhoob, gaalhoob kastuuh tuubuur thibinamta. Kassuuh uumbꞌi wꞌasir ookiik thibin iki. 34Himniit tuusꞌa mhayt tikayihoob, Yasuuꞌa tageega hissii aadhiya, “Eelooy Eelooy, lamaa shabagtani?” idi. Aan ibhali Iyahuudi bhaliyee, “Ukwaasanaayu! Ukwaasanaayu! Naanhooy tꞌish tidꞌiyaheeb?” miyaadi.
35Shalik dehay beentooy ingid, beet toona imaasiwnihoob, “Sinaakirna! Baruuh Eelyaab waliikiini.” idiin.
36Tak gaal dhaabee eeyaayt asfoonjiib haab idꞌiit, malya kwoolayiib ishꞌagaayt Yasuuꞌiib uyafiibka yꞌabik, “Oontꞌa ishna dꞌiina! Eelya yꞌeetiit tikwisiiniyeek niishbib.” idi.
37Yasuuꞌa winneet aadhiya, malya iiya.
38Been oodoor Wꞌankwanaay oogawi suurii tiifiit tusitaara mhakwaliisii eedhoom ookiik malu mhiin tishtat. 39Udaabit Iroomaani kajari hadꞌa Yasuuꞌi suurii iistꞌa. Been udaabit Yasuuꞌa kak iyaneeb rhiyanihoob, “Uun baruuh sidik Ukwaasanaay Oor akay iifi.” idi.
40Mꞌat galit isgiiniit ishbibna. Bateeyooh geeb aree Maryam Majdaleenaabwa, Yaaguub oodiswa Yuusifiitwa toondi Maryamwa, Saaloomaatwa iifiin. 41Taan taamꞌa Jaliileeb barooh iramniit winneet daayiib weeraata. Warit mꞌat han Algudusee geeb yꞌaa iifiin.
Yasuuꞌa itoobaas
42Oontꞌa whawaad idwil eeya, tulhaytooh aree toosab akay tiifi. Iyahuudi dehay wꞌiidii dehaay iitmarna. 43Yuusif iidni tak, Raamaayiib Yahuudaay iikti eeya. Uun baruuh Iyahuudi majlisiib winneet hamooysama taku, aree baruuh uukna han Ukwaasanaayt tehadꞌaayi yhigit. Ashꞌara taku aree Biilaatoos ibaayt Yasuuꞌiit tukinaaja hooy yhariw. 44Biilaatoos Yasuuꞌa itoodaareet toona imaasiwihoob winneet ajjabamiya. Daabit gaal waliikiyaayt Yasuuꞌa suur akay iyaneeb biikaayeeb sakanaaya. 45Baruuh Yasuuꞌiit tooyat udaabtii ikanihoob, tukinaaja Yuusif sallamiya. 46Aflaay Yuusif naaylooni halak idlib iyhaayt, usaliibii tukinaaja tikwisiya. Malya whalakiib ishaamim. Amariib miimash isoomiraayt ibis. Malya umiimashi yafiib aweeb kehii kwaaleelisiya. 47Maryam Majdaleenaabwa, Maryam Yuusifiit tuundeewwa tukinaaja naad daasamtaneeb rhiyaan.
Currently Selected:
Maargoo 15: BEJA
Highlight
Share
Compare
Copy
Want to have your highlights saved across all your devices? Sign up or sign in
2026 Seed Company and the MTT
