Maargoo 16
16
Ooyak
1Tuusab hasamtanihoob, Maryam Majdaleenaawwa, Maryam Yaaguubiit tuundeewwa, Saaloomaatwa Yasuuꞌiit tukinaajaati kehii iidꞌani jillaay shakwiinaat idlibni iyheen. 2Tehadtiit yint fajir tuuyin talawtani harꞌii, bataah umiimashii dehaay eeyaan. 3Bataah taktak raatiyaana, “Wꞌawi ibidhdhigil udheefaay aaw dehoon gwanshiish?” idiin.
4Laakiin bataah ishbibnihoob, wꞌawi ibidhdhigil umiimashii fidnaab kwaaleelaa rhiyaan. 5Umiimash tehooy shuumiyaaneet midda, adhami oor eera halak akwaay umaygwadii dehaay sꞌee rhiyaan. Araa taamꞌa irkwiin.
6Wꞌoor bateeyooh dehaay, “Baarikwiina! Yasuuꞌa Naasiraay usallabamiyaab tehariwna. Baruuh tooy kiihaay, yakiya! Baruuh hooy atoobsaab iiktiyeeb oomhiin shibibna. 7Laakiin bataakna giigaana, ikwiriyaatayeehwa Bitruswa sooyaana, ‘Baruuh suurookna Jaliil hadiit giigiini. Suur sooyaayookna iiktiyeet toonaatiit, barooh beentooy rhi tiyadna.’ diina!” idi.
8Taamꞌat umiimashii fooree ifirꞌana, winneet mirkwaayii katatiyaana aree bissaniisiyaan. Mirkwaayii gaal han naat sooyaat kiikeen.
9Yasuuꞌa tehad karuumaab yakiyanihoob, asarama jin hooy firꞌaa iifiyeet Maryam Majdaleenaay dehaay awwal lawiya. 10Batuuh giigtaayt winneet gadabaa waawiin yꞌaraweeh soota. 11Baraah Yasuuꞌa idhhaneet toonaawwa, aree batuuh barooh rhitaneet toonaawwa imaasiwnihoob, aamanaab kiikeen.
12Malya Yasuuꞌa umingaayiib weet hayꞌaatii malu kwiriyaatayee dehaay lawiya. Baraah gariyaat gaat beeti hiireeriin. 13Aan baraah yꞌagarniit eeraw sooyaan. Laakiin bareeh han aamanaab kiikeen.
Yasuuꞌa ikwiriyaatayeeh dehaay lawiya
14Malya Yasuuꞌa ikwiriyaatay itamna gwiraayee dehaay lawiya. Baraah been oodoor mꞌariit tamiina. Yasuuꞌa bareeyooh wꞌiimaani naawwa, wꞌakra girmaaywa sabbii bareeh idaanin. Ooyaki harꞌii barooh rhiyaan oodehay aamanaab kiikeen akay bareeh idaanin.
15Baruuh bareeyooh dehaay, “Kastooh tuduniya beena, aree usakana udaayiib kasseeh oodehay sooyaana! 16Aamaniit itoomiiska iidhhan indi, aamanaab baakaay aree ituurib indi. 17Baliib yꞌaamaneen taan tꞌalaama imooriimna: Aniib oosmii eejin ifarꞌana, gayi bhali hadiideen. 18Baraah ikwakwara yꞌayeesoohna yꞌabikna. Sim gwꞌeeneek han naat kiiweer. Yꞌayeehna oodehay eelhaanaayi kehii daaseena aree baraah shabhameen.” idi.
19Bareeh bhaliisamiyaayt harꞌii, Wꞌankwana Yasuuꞌa gaalhoob teebri hadiit tafamiya. Aree Ukwaasanaay umaygwadiib isꞌa. 20Malya ikwiriyaatay giigiyaaniit kastooh tuduniyaati dehay usakana udaayiib sooyaan. Wꞌankwana bareeyooh geeb iifi, ibhaliyeeh tꞌalaama tꞌiitramnaatee dehaay akkadi.
Currently Selected:
Maargoo 16: BEJA
Highlight
Share
Compare
Copy
Want to have your highlights saved across all your devices? Sign up or sign in
2026 Seed Company and the MTT
