Maargoo 7
7
Tunajaasaawwa tutahaaraawwa
1Ifariisiiwwa haggi kooja gwadibwa Algudusee yꞌaab, Yasuuꞌii dehaay immarraayna. 2Yasuuꞌiib ikwiriyaatayee gwadi yꞌayaahna najjasamaa tari shagwadh baakaay mꞌariit tamee rhiyaan. 3Ifariisiiwwa kassaah Iyahuudiiwwa suur yꞌayeehna hankaab baashagwiidh mꞌariit katamiyaan. Beet tuuna yhooba iidꞌaneet aadaata. 4Usuugii itꞌigirnihoob, yꞌayeehna shigwidhaab baakaay naat han katamiyaan. Gwidaana weena yhoobee kwasaamaab iiktiineena han tiifi. Tikwibbaywa, ibarradwa timꞌariitiit teedaawwa iishigwidhna.
5Ifariisiiwwa whaggi koojaawwa Yasuuꞌaab raatiyaana, “Ikwiriyaatayaak hoobaan iidꞌaneet tꞌaada naanhooy kiidꞌiin? Baraah yꞌayaahna najjasamaa mꞌariit tameen.” idiin.
6Yasuuꞌa igwibi, “Unabi Isyaas bareeyookna isrideet tuuna sidik tiki. Baraakna uumshuush, aan baraah ooktaabiib kataba:
‘Aan baraah iyafaayeesoohna aneeb yhamidna,
laakiin iginꞌaayaahna anii winneet sagiiba.
7Baraah nafꞌaat baabariint ibaada yꞌabidnaheeb. Allameena laakiin dehayiit aada allameen.’ indi uuktaab.
8Baraak Ukwaasanaayt tiwasi ishtiit, oodehayiit aada tisnaakiirna.
9Baraak Ukwaasanaayt tiwasi ishtiit, abiiyeekna dꞌiyaab tikatiini tꞌaliim tisnaakiirna. 10Muusa ‘Baabeekwa deeteekwa hamooysaana! Ubaabaawwa toondeewwa amaag iwari, ibakii itoodiir.’ idi hookna. 11Laakiin baraak Ifariisi, tak ifarooyeeh dehaay: ‘Baraak anii timeerneet tushamaam, ani Ukwaasanaay dehaay mhalaniyi miyaaw ikati.’ tiyadna. 12Malya bareeh ifarooyeehna biishaamneet toona tisehariiwna. 13Ukwaasanaay ibhali ishtiit hoobeeteekna tꞌaada tisnaakiirna. Aree bak tꞌiiteet amagnayt gwidaat han sakteen.” idi.
Oodehay naan yiwaashiistini
14Yasuuꞌa masi oodehay igwidaab waliikiyaayt, “Kassaakna sinaakirnaheeb, aree een ibhali afhamaana. 15Barraay yꞌiit wꞌaadamiib shuumtiniina kayiwaashiista. Laakiin oodehayii titfarꞌi tuuna oodehay yiwaashiistini. 16Eemsiiw angwil ibariibka, baꞌiimsaw!” idi.
17Yasuuꞌa oodehayii giigiyaayt oogaw shuumiyanihoob, ikwiriyaatayaah barooh een eemtaali tafsiir barooh raatiyaan. 18Yasuuꞌa raatiya, “Baraak han afhamaab kitteena han? Oodehay barraay dehaay shuumtiniit tuuna kayiwaashiista. Beet toona karhitaana han? 19Batuuh iginꞌaayeeb kashuumta, laakiin oofꞌiib shuumiit malya ugarooy titfarꞌi.” idi. Yasuuꞌa kastuuh tumꞌari nhast tikatiyeet toona mitiyaayiini.
20Yasuuꞌa masi, “Oodehayii titfarꞌi tuuna oodehay yiwaashiistini. 21Tehooytee oodehayi ginꞌaayee wꞌamaag niya itfarꞌi, faddaadamtiibwa, gwihartwa, madarwa, 22Jikuunwa, akuushwa, hadaniyaabwa, talasaabwa, moogamtiibwa, hasaadaatwa, neewwa, kibirwa, afreebwa ikatiin. 23Kastuuh tuun tuumaag oodehayi ginꞌaayee firꞌatiit oodehay yiwaashiistini.” idi.
Takati iimaan
24Yasuuꞌa been oomhiin hooy giigiya, tumadiina Tiiroos dawil mhiin beeti ibi. Beentooy gaw shuumiya, uudehay iikanneet toona hariwaab kiiki. Laakiin iikwibiseet toona han adgiraab kiiki. 25Takat dist ootooh jin hooy daaya iifiineet tiifi. Yasuuꞌa been oomhiin yꞌaab iiktiyeet toona timaasiweet midda willa eeta. Batuuh Yasuuꞌiib iragadaayi whii whaashiib dhibta. 26Tutakat Yoonaaniitu, aree Suuriyaay eefi haash Fiiniigiyaay faraaytu. Batuuh tꞌootiisooh eejin iifirꞌee dehaay Yasuuꞌaab tinꞌal.
27Yasuuꞌa batiiyooh dehaay, “Awwal inisrika kastooh timꞌari tiyhariwneet tamsii. Inisrikaayi hadhi yaksiit iyasee dehaay titoogiideet tuuna daayiit kitti.” idi.
28Tutakat “Awooh Wꞌankwanaay, laakiin aayas tutarabeesaati whii eefeen han inisrika dhibseeneet timꞌari tameen.” tidi.
29Malya Yasuuꞌa batiiyooh dehaay, “Giigii! Een ibhaliyi jillaay aajin tꞌootiisook ifirꞌana.” idi.
30Malya tutakat giigtaayt ugawooh tꞌagarihoob, tꞌootooh nꞌaali kehii bꞌee, aajin na hooy giigaa timri.
Yasuuꞌa tak angwilaywa gilluusiibwa mheeliya
31Yasuuꞌa Tiiroosi haashii giigiya. Siidooni salalii Jaliil oobhar hadiit idif. Timadiina Titaminti haashii hasamiya. 32Beentooy dehay gali angwilay tak gilluusiib dehaay haay eeyaan. Uudehay Yasuuꞌa ootak wꞌayooh kehii daasiyeet toona hooy yhariwna.
33Yasuuꞌa ootak oodehayii haay isgi, tigiibalayteeh ootaki angwili kehii daasiya. Malya kehii tifiya, umiidalaab aree tatehiya. 34Yasuuꞌa teebri ishbibaayt ootakii dehaay “Eeffaata!” idi. Eeffaata Iyahuudi bhaliyeeb “Nigala!” miyaadi. 35Igidiyeesooh ootaki angwil ingalna, umiidalaab ifdag, aree winneet hadiidiya.
36Yasuuꞌa beet toona dehay biisooyayneet toona waseeya. Laakiin baruuh gwida doora waseeyaneek han, baraah beet toona amaagkaab sooyiin. 37Baraah winneet ajjabamiyaana, “Baruuh daayiiniyeet tuuna kastuuh tishiboobi. Yꞌangwilaya ismaasiiw, igilluusi hadiidsiini.” idiin.
Currently Selected:
Maargoo 7: BEJA
Highlight
Share
Compare
Copy
Want to have your highlights saved across all your devices? Sign up or sign in
2026 Seed Company and the MTT
