Maargoo 8
8
Yasuuꞌa fadhig alfa dehay mꞌariit tamisiya
1Beenhoob gwida dehay wari Yasuuꞌii dehaay immarraayna. Baraah mꞌariit tamiineet kiibariin akay, Yasuuꞌa ikwiriyaatayeeh waliikiyaayt: 2“Ani oon oodehayii dehaay nꞌakw manaayani. Baraah mhayt yiinaateeka anii geeb eefeena, aree tameeneena han kiibariin. 3Ani bareeh hargwaa igawaayeeh astoobiyeek, gali bareesooh sagi mhiinii yꞌaaba akay, usalaliib dhadhibi iyadna.” idi.
4Ikwiriyaatay “Laakiin oon umingaayiib oodehay kasseeh gabseen hadhi naad nimeer?” idiin.
5Yasuuꞌa raatiya, “Baraak naaka hadhi tibariina?” idi.
Baraah “Hinin asarama hadhi nibari.” idiin.
6Yasuuꞌa oodehay whaashi kehii thathameeneet toona sooya. Yhadhi yꞌasarama yakisiya. Ukwaasana yhamidaayt yhadhi ikitꞌa. Yhadhi ikwiriyaatay nuuniyaayt oodehay iyawneet toona sooya. Baraah han bak sakiyaan. 7Ikwiriyaatay masi shalik aashoob dadis iibriin. Yasuuꞌa bareeyooh dehaay idehar, aree ikwiriyaatay yꞌaashu oodehay iyawneet toona sooya. 8Uudehay tamiyaani gabiyaan. Malyaab timꞌariitii mhiyaab ifirkak yakisiyaaniit asarama biileeb hooy toobiyaan. 9Uudehay fadhig alfa iiktiin. Malya Yasuuꞌa bareeh giigisiya. 10Baruuh ikwiriyaatayi geeb tufalluuka yꞌam. Dalmaanuuta ittiyoodi haash hadiit giigiya.
11Ifariisi eeyaaniit Yasuuꞌaab raatiyaan. Barooh jarrabtiib yhariwnayt, tibreetee alaamaat raatiyaan. 12Yasuuꞌa winneet hamshuukiyaayt, “Aan baraakna amseeneeb uutaas, naanhooy mꞌuujisaateet alaama raatteena? Oosdik andi hookna, uun uudehay alaamaat ittiyiwni kiidiina.” idi. 13Malya baruuh bareeh yꞌish giigiya, tufalluuka hadiit yꞌagar. Oodar ooraaw beeti giigiya.
Ifariisiiwwa Heeroodisiiwwa whamiir
14Ikwiriyaatay hadhiib yaksiineet toona ibaadhinna. Gaal hadhi oobhaat tufalluukaatiib iibriin. 15Yasuuꞌa ikwiriyaatay akraab sooya, “Digwagwna, Ifariisi hamiirwa Heeroodisiib whamiirwa gwꞌadna!” idi.
16Baraah toon toona taktaki geeb bhaliiyaana, “Hadhiib kinbari akay een indi han?” idiin.
17Yasuuꞌa baraah bhaliisamiineet toona ikan. Bareeyooh dehaay, “Naanhooy bak hadiidsamteena? Baraakna hadhiib kitbariinayt een diyaab kaaki. Masi karhitaana han tari kaꞌafhamtaana han? Iginꞌaayaakna oon hadiit hakwara han? 18Gwꞌad tibariina, laakiin karhitaana han? Angwil tibariina, laakiin kitmaasiwna han? Kashꞌataana han? 19Oodehay yꞌay alfaayee dehaay yhadhi yꞌay akitꞌihoob, baraak naaka biili atab yakistaana?” idi.
Ikwiriyaatay “Tamna malu biili.” idiin.
20Yasuuꞌa han “Ani fadhig alfa dehayii dehaay asarama hadhi akitꞌihoob, yhadhiyi firkak naaka biili hooy titibna?” idi.
Baraah “Asarama biili nitib.” idiin.
21Yasuuꞌa bareeyooh dehaay, “Baraakna masi kaꞌafhamtaana han?” idi.
Yasuuꞌa tak hamashay Beetsaydaay mheeliya
22Baraah Beetsaydaab beeti eeyaan. Dehay gali tak hamashay Yasuuꞌii dehaay haay eeyaan. Wꞌayooh oon ootaki kehii daasiyeet toona hooy yhariwna. 23Yasuuꞌa ootak wꞌayi yꞌabikaayt oodehayii haay isgi. Malya ootaki gwꞌadi kehii tifiya, yꞌayeeh kehii daasiya. Yasuuꞌa ootakii dehaay, “Naat han rhitniya?” idiit raatiya.
24Uutak ishbibaayt, “Dehay rhani. Baraah yhindi yhantaayeen tꞌiiteeba.” idi.
25Yasuuꞌa masi yꞌayeeh ootaki gwꞌadi kehii daasiya. Malya uutak daayiib rhiya, suureet aagwꞌad yꞌagarna, naatka daayiib rhiiniib iki. 26Yasuuꞌa ootakii dehaay, “Ugawook bayaa, laakiin tugariya baashuuma!” idi.
Yasuuꞌa aabu?
27Yasuuꞌaawwa ikwiriyaatayaahwa Gaysariya Filiibus ittiyoodi haash ibeen. Yasuuꞌa usalaliib ikwiriyaatay raatiya, “Uudehay, ani aabu iyadna?” idi.
28Baraah igwibiina, “Uudehay gwadi, ‘Yuuhanna umoosana.’ iyadna hook. Wari ‘Unabi Eelyaabwa’ iyadna hook. Wari ‘Een inabiyaayee gaalu.’ iyadna hook.” idiin.
29Yasuuꞌa “Baraakna aree ani aabu tiyadna?” idiit raatiya.
Bitrus “Baruuk Umasiihiiwwa.” idi.
30Yasuuꞌa baraah beet toona gaal han biisooyayneet toona hooy yhariw.
Yasuuꞌa tuyattooh whankaay hadiidiya
31Yasuuꞌa malya ikwiriyaatayeeh allamtiib badooya, Wꞌaadami Oor ibakii winneet gwidaat lhamiini, ibakii yꞌeegrimaawwa, ifagiiriya isuurkinaawwa, whaggi koojaawwa barooh eeribna. Aree baruuh ibakii itoodiir, aree mhayt yinaati harꞌii umhaya masi yakiini. 32Yasuuꞌa een ibhali gwꞌagwuuyt hadiidiya. Aree Bitrus Yasuuꞌaab haay itfalaayt, barooh dinneeb badooya.
33Yasuuꞌa nakamiyanihoob ikwiriyaatay ishbib. Malya Bitrus idaanin, “Hoosu giigaa! Baruuk uubliis! Udehayiit tehalaagay baakaay, Ukwaasanaayt tehalaagay ugirmaay kitbariya.” idi.
Usaliibi Salal
34Yasuuꞌa kasseeh oodehayii dehaaywa ikwiriyaatayeeh dehaaywa, “Anii harꞌii saktiib harriiwka, baruuh ibakii ugarooyooh ankiriini, malya ibakii usaliibooh yaksiit eetriimheeb. 35Umidhhanooh dibuuy harriiwka, barooh itehisir indi. Laakiin umidhhanooh anii jillaaywa usakana udaayiinaay jillaaywa itehasiirka umidhhanooh idaab indi. 36Wꞌaadami tuduniya kastooh marriyeek, laakiin infiseeh eetniiweek, naan rayiimiini? 37Tari wꞌaadami infiseeh naanaatiib bandiil? 38Uun uudehay wꞌiimaan baabariinwa timaagnay shagaameenwa, aneebwa ibhaliyeesoowwa isakwꞌaneek, Wꞌaadami Oor han umatuuniyoohwa ubaaba Ukwaasanaay umatuuniibwa, imalak imugaddasaayi matuuniibwa yꞌiiniyihoob, been oodehay hooy iisikwꞌa indi.” idi.
Currently Selected:
Maargoo 8: BEJA
Highlight
Share
Compare
Copy
Want to have your highlights saved across all your devices? Sign up or sign in
2026 Seed Company and the MTT
