Ɛseta 2
2
Be Kamo Ɛseta See Alagyoo
1Kei wɔle gyoo Ahasewerose wɔe ke fɛɛ e nɛ, ɔ tɔɔse Waseti na kpene keŋ ɔ be yɛɛ na mena keŋ ŋon gyoo mɔ be fa mmaraa lee ɔ wose man nɛ. 2Keŋte gyoo tewulɛɛ baŋ bɛɛ som e nɛ faa e nyeempɔ nyiaa, <<Kpila baale baa gyu tɛɛle keŋ dɔɔ na be kaa kɛo alebia keteŋse baŋ be dana kyeo nɛ fa gyoo. 3Gyoo waa lese balaŋ lee akpiisebia ŋan man na baa mo mena alebia kɛwɔ kaa see botɔɔ keŋ gyoo wɛɛla ne kyaa Susa donɔɔ man nɛ. Baa mo wɔ do n tobaale Hegai ŋon bɔɔ lese e saayɛ te ɔ ne kɛɛ gyoo wɛɛla dɔɔ nɛ nyiŋmaa man. Waa kɛɛ nyi ba te fa alebia baŋ nuŋse kpaakpaa nyiŋan na lafentase baa tiu na baa nyiŋ yɛɛ kyeo. 4Na n ka lese be man alebu ŋon n ne gyae nɛ na baa mo e see alagyoo Waseti nawɔɔ man.>> Mena nyeempɔ kei yɛɛ gyoo gyoŋ mena dɔɔ ɔ lɛɛ ke do.
5Debaŋ kenaŋ na Yuda baale ŋon bɛɛ baake e nyi Modekai ŋon ɔ ba lee Bɛneyameŋ dekpaŋalaŋ man nɛ kyaa Susa donɔɔ man. Ɔ kya yɛna Yaire te Yaire mɔ ɔ kya yɛna Simei te Simei ɔ kya yɛna Kise 6Debaŋ keŋ Babilɔn gyoo Nebukadenɛsa be kyaŋ Yuda gyoo Yehoyakim na ɔ balaŋ lee Yerusalɛm gyu Babilɔn ŋgba yoogbeŋa nɛ na Modekai mɔ kpuɛ. 7Na Modekai ɔ kyinebu bu ŋolo kyaa ɔ gyaŋ keŋ ɔ yele yɛna Hadasa. Modekai kɛɛlena e nawolo nyi ɔ be dana kya yaa naa ya. Alebu kei yele daale yɛna Ɛseta te ɔ siagbɛɛ na ɔ wose pou dana kyeo nideli. Ɔ kya na ɔ naa ka yeŋ nɛ te Modekai moo e ŋgba ŋon gbagba bu nɛ.
8Debaŋ keŋ gyoo be yako nyi baa kɛo alebu ŋon ɔ dana kyeo nɛ, be kyaŋa alebia burum kɔŋ gyoo dɛɛ keŋ kyaa Susa donɔɔ dinaa keŋ man nɛ te ba moo wɔ do Hegai nyiŋmaa man nyi waa kɛɛ be dɔɔ. Ba moo Ɛseta mɔ gyu gyooro dekpaŋalaŋ keŋ man te ba moo e do Hegai ŋon ɔ ne kɛɛ botɔɔ dɔɔ nɛ nyiŋmaa man. 9Ɛseta nombia gyoo Hegai sia mena dɔɔ ɔ tee sia kɛɛ ɔ dɔɔ nideli te ɔ faa e nuŋ kpaakpaa nyiŋan na weenɛɛ kpaakpaa nyiŋan. Ɔ lese alebia nyetooro lee gyooro dɛɛ botɔɔ nyi baa som Ɛseta ŋon te ɔ lese ŋon na wa alebia baŋ kasee dekyae kpaakpaate man botɔɔ.
10Ɛseta ta lese ɔ wose wola nyi ɔ lee dei daale man ya, nawolo nyi Modekai te faree e nyi ɔ na wolo ya. 11Wee kamasɛ na Modekai na gyem tisi dekpaŋalaŋ keŋ man na waa kɛɛ Ɛseta kekyaabii man na kpene keŋ ne yɛɛ e.
12Pɛna baa mo alebu ŋolo gyu gyoo Ahasewerose gyaŋ nɛ, na kaboena nyi waa mo gyaalaŋna kufu ala desina ɔ wose pɛ. Waa mo gyaalaŋna looro bɔ adudo na waa mo gyaalaŋna looro mɔ tiu nuŋ ofoŋnyiŋan na lafeŋtase. 13Nyi akpaa ba lese alebu ŋolo nyi waa gyu gyoo gyaŋ nɛ, bɛɛ fa e kpene kamasɛ keŋ ɔ ne gyae nyi waa do lee botɔɔ mo gyu gyooro dekpaŋalaŋ keŋ man. 14Balinɔɔ na bɛɛ mo e gyu gyoo gyaŋ, te tɛɛ de naa na be ta mo e gyu yenaŋ wɔle botɔɔ keŋ gyoo wɛɛla ne kyaa nɛ. Botɔɔ te balee ŋon bɔɔ lese e saayɛ te bɛɛ baake e nyi Sasegase ne kyaa. Ŋon ne kɛɛna gyoo diidɔɔna baŋ dɔɔ botɔɔ. Alebu ŋonaŋ be gyae waa bese gyu gyoo gyaŋ bela ya. Pɛ waa bese gyu na mberem na ɔ nombia na gyoo gyoo sia bo te ɔ lɔɔ yele baake e nyi baa mo e kɔna e.
15Kelii Ɛseta ŋon ɔ yɛɛ Modekai ɔ kyinebu Abihayile bu alebu e te Modekai ba mo e ŋgba ŋon gbagba bu nɛ dɔɔ nyi waa gyu gyoo gyaŋ nɛ, ɔ te bɔɔse kolo nyi waa mo tela ya. Kpene keŋ gyoo tobaale saayɛ Hegai ŋon ɔ ne kɛɛ ala baŋ dɔɔ ba mo do e nɛ te ɔ doowɔ gyu. Walaŋ kamasɛ ŋon ɔ be naa Ɛseta na ɔ gyae ɔ nombia. 16Gyoo Ahasewerose kedi gyoori kulutooneŋ nyetoorote ŋon gyaalaŋna kufute ŋon bɛɛ baake e nyi Tebete man nɛ te ba moo Ɛseta gyina e ɔ dekpaŋalaŋ man.
17Gyoo kena Ɛseta na ɔ nombia gyoo ɔ sia nideli kela ala akaŋ baŋ pou, te ɔ gyae e mɔ kela alebia keteŋse akaŋ baŋ pou. Mena dɔɔ ɔ moo gyooro kotɔtɔɔ wuu ɔ nyee dɔɔ te ɔ moo e see alagyoo Waseti nawɔɔ man. 18Keŋte gyoo doo kesaa dinaa Ɛseta yele man fa ɔ gyoorobia na ɔ kyaarabia pou. Ɔ torowɔ yako nyi walaŋ kamasɛ waa fɛɛfo ɔ tɛɛle keŋ pou dɔɔ keŋ be na yɛɛ tom ya te be na tɔ totose mɔ ya, te ɔ kpɛlɛɛ abɔɔ burum fa balaŋ.
Modekai Kelɛɛ Gyoo Nyee
19Be ka bese yilaa alebia keteŋse baŋ bolate nɛ, na Modekai kyaa gyoo dekpaŋalaŋ keŋ denaanɔɔ man. 20Mɔna Ɛseta weese ɔ wose keŋ ɔ ta wola ŋolo ɔ dalee ya ŋgba mena keŋ Modekai be yako e nɛ. Nawolo nyi na ɔ gyakaa ɔ ne nyii Modekai dei ŋgba mena keŋ ɔ be nyii ɔ dei lee ɔ biatɛɛ debaŋ keŋ ɔ ne kɛɛle e nɛ.
21Modekai kekyaa gyoo denaanɔɔ keŋ man nɛ, wee gyoo kyaarabia bala baŋ bɛɛ baake wɔ nyi Bigetan na Terese nɛ te be bakewɔ nyi baa ko gyoo Ahasewerose ŋon. 22Modekai nyii kpene keŋ bɔɔ bake nɛ te ɔ yakowɔ fa alagyoo Ɛseta. Ɛseta mɔ gyuuwɔ ke yako gyoo mɔna ɔ yela gyoo nyiiwɔ nyi Modekai yakona e. 23Ba gyoo nombia ŋan man te be naawɔ nyi ke yɛɛ ampaŋ. Mena dɔɔ gyoo yela ba doo wɔ ŋmeeseŋ mo wuluŋuna daase. Ba te ŋmarase mena nombia kɛŋa pou do ɔ gyoorikedi wose man nombia tɔne man gyoo siaman.
Currently Selected:
Ɛseta 2: NTR
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics Literacy and Bible Translation