Ɛseta 3
3
Haman Kebake Nyi Wa Ko Yudatena
1Nombia kɛŋa wɔle nɛ gyoo Ahasewerose gyinaa Agagi baale Hamedata bu tobaale Haman adido lee ɔ tom keyɛɛ man. Ɔ faa e dekyae dinaa kela gyoorobia baŋ pou. 2Gyoo faa ɔ kyaarabia baŋ pou be kyaa ɔ denaanɔɔ man nɛ mmaraa nyi baa buŋ mo obua fa Haman. Mɔna Modekai dɔɔ ŋon bɛɛwɔ nyi ɔ be buŋ e yaa waa mo ɔ buo fa e ya.
3Keŋte gyoo kyaarabia baŋ bɔɔse Modekai nyi, <Weera dɔɔ te n bee di gyoo mmaraa dɔɔ ya?> 4Wee na wee na bee kolosi fa Modekai mɔna ɔ bɛe ɔ bee di ke dɔɔ ya. Mena dɔɔ be yako Haman na baa kɛɛ nyi waa lɛɛ Modekai nombia ŋan do yaa sena. Nawolo nyi ɔ te yako wɔ nyi ɔ yɛɛ Yuda baale e.
5Haman kena nyi Modekai bɛɛ buŋ e ya, te ɔ bɛɛ mo obuo mɔ fa e ya nɛ ɔ gyeŋa baŋ nideli. 6Haman ka gyeŋ nyi Modekai yɛɛ Yuda baale e nɛ, ɔ moo nyeempɔ nyi ɔ be gyae waa ko Modekai waageŋ ya. Mɔna ɔ moo nyeempɔ nyi waa munu Modekai balaŋ Yudatena baŋ pou lee Ahasewerose gyoori deedii keŋ pou man.
7Gyoo Ahasewerose kedi gyoori kulutooneŋ kufu alate ŋon gyaalaŋ gyaŋgbate ŋon bɛɛ baake e nyi Nisan man nɛ, Haman yako ɔ balaŋ baŋ bɛɛ fa e afutoo nɛ nyi baa lɔ boe na baa lese gyaalaŋ na ɔ wee keŋ man baa mo ko Yudatena baŋ pou. Te boe kelɔ keŋ yalawɔ gyaalaŋna kufu alate ŋon bɛɛ baake e nyi Ada nɛ dɔɔ.
8Keŋte Haman gyuuwɔ ke yako gyoo Ahasewerose nyiaa, <Balaŋ baale te yaasee gyoo n balaŋ baŋ pou be kyaa n gyoori deedii keŋ man nɛ man keŋ be te tira ba wose kpoo. Ba amanberɛse yɛɛ kpoo balaŋ akaŋ baŋ wui man te bɔɔ ne di gyoo mmaraase dɔɔ ya. Mena dɔɔ kaboena nyi nya lese wɔ lee tɛɛle kei dɔɔ. 9Nyi dei fa neŋ na fa mmaraa na baa koe wɔ pou. Nyi n yɛɛ mena na maŋ maa fa neŋ kɔba wolom tonse sɔŋonoŋse atooro na sɔŋotooro na kufu anoŋ (375) na n ka mo see n gbelitɛɛ.>
10Keŋte gyoo kpee ɔ nyimbii kɔla keŋ ɔ yele gyakaa ke dɔɔ nɛ fa Agagi baale Hamedata bu tobaale Haman ŋon ɔ ne kɔla Yudatena nɛ. 11Te gyoo yako Haman nyiaa, <<Yela n kɔba keŋ kedoo, na n ke yɛɛ balaŋ baŋ mena keŋ n ne gyae.>
12Gyaalaŋ gyaŋgbate ŋon weeya kufu atoorote man nɛ Haman baake gyoo tɔna ŋmarasela pou gyaŋee. Ɔ wola wɔ kpene keŋ baa ŋmarase te ɔ yako wɔ nyi baa ŋmarase fa dikpii kamasɛ be dei man fa balaŋ baŋ pou. Te ba moo tɔna ŋan yelee kegyiise baŋ be kyaa gyoo nawɔɔ man na baŋ bɛɛ kɛɛ dikpii kamasɛ dɔɔ nɛ. Ba moo gyoo yele bo ŋmarase tɔna ŋan te ba moo gyoo kɔla keŋ ɔ yele gyakaa ke dɔɔ nɛ ŋere ŋe dɔɔ na kawola nyi gyoo ŋmarasela. 13Be kpilii balaŋ gyu gyoo tɛɛlese pou dɔɔ nyi baa koe Yudatena baŋ pou. Baa koe bia na kegyiise na ala na bia buruburu pou wee dokoloŋ keŋ yɛɛ gyaalaŋna kufu alate ŋon wee kufu atoorote ŋon bɛɛ baake e nyi Ada nɛ man, na baa kuu ba abɔɔ pou ŋgba yoo abɔɔ nɛ. 14Ba moo tɔna ŋan ŋaale mataa donɔɔse pou man botɔɔse ŋan balaŋ baa naa kala nɛ, na walaŋ kamasɛ ke nyiŋ desina ɔ wose fa mena wee kenaŋ.
15Kpilara baŋ moo tɔna ŋan laŋ ŋgba mena keŋ gyoo be fa mmaraa nɛ te be kala tɔne keŋ daale keŋkeŋ be donɔɔ dinaa Susa man. Keŋte gyoo na Haman gyuuwɔ ke kyaa bɛɛ nyɔɔ soloŋ, mɔna Susa donɔɔ keŋ te siŋii keŋ bɔɔ gyeŋ kpene keŋ ne kɔŋ ya.
Currently Selected:
Ɛseta 3: NTR
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics Literacy and Bible Translation