Ɛseta 4
4
Modekai Kasola Ɛseta Nyi Waa Kyɔ Wɔ
1Modekai kenyii ŋan pou bɔɔ yɛɛ nɛ, ɔ kyaŋa ɔ kegbase tirii te ɔ moo titire wuu te ɔ moo tɔŋ buraa ɔ wose. Keŋte ɔ gyuuwɔ donɔɔ dinaa keŋ man ɔ ne fae yeesa na ɔ ne wii keŋkeŋ. 2Mɔna ɔ ka seŋae gyoo denaanɔɔ man, nawolo nyi walaŋ ŋon ɔ wuuna titire nɛ be dana gbɛɛ waa gyoo gyoo dɛɛ ya. 3Yenaŋ kamasɛ keŋ gyoo mmaraa keŋ be lii na Yudatena baŋ be kyaa botɔɔ nɛ ne wii na bee di waraŋsa. Bɛɛ bake be nɔɔ na bee wii na bɛɛ fae yeesa. Be man balaŋ burum mɔ moo titirese wuu ba wose te ba moo tɔŋ mɔ buraa ba wose.
4Ɛseta saayɛse baŋ na alebia baŋ bɛɛ som e nɛ kekɔŋ kaa yako Modekai wose man nombia ŋan nɛ ke takaa e nideli. Keŋte ɔ moo kegbase yelee e nyi waa kpee titire keŋ na waa do ŋenaŋ, mɔna Modekai bɛe. 5Keŋte Ɛseta baake gyoo saayɛse baŋ man ŋon gyoo ba lese nyi waa som e te bɛɛ baake e nyi Hatake nɛ te ɔ kpila e nyi waa gyu ke bɔɔse Modekai nyi woŋ ne yɛɛna e te woŋ kɔŋala.
6Mena dɔɔ Hatake gyuuwɔ Modekai gyaŋ debɔɔ man gyoo denaanɔɔ keŋ siaman. 7Keŋte Modekai yako e kpene kamasɛ keŋ be kɔŋ ɔ dɔɔ, na kɔba keŋ Haman be yakosee nyi waa tɔ do gyoo kɔba dɛɛsee man nyi akpaa gyoo de sɛɛ baa koe Yudatena baŋ pou na. 8Modekai besewɔ mo tɔne keŋ bɔɔ ŋmarase lee ba wose man keŋ bɔɔ kale Susa nɛ daale fa Hatake nyi waa mo gyina Ɛseta na waa lese ke man fa e. Ɔ besewɔ yako e nyi waa yako Ɛseta na waa gyu gyoo gyaŋ na ɔ kaa waase e nyi waa wii e na waa sola e fa ɔ balaŋ.
9Mena dɔɔ Hatake besewɔ gyu keyako Ɛseta kpene keŋ Modekai be yako nɛ. 10Botɔɔ te Ɛseta yako e nyi waa yako Modekai nyiaa, 11<<Gyoo kyaarabia na balaŋ baŋ be kyaa tɛɛle kei dɔɔ pou gyeŋ nyiaa, mmaraa keŋ doo yɛna walaŋ kamasɛ ŋon gyoo te baake e ya te ɔtenate de gyu ɔ gyaŋ dekpaŋalaŋ tɔɔman nɛ kaboena nyi baa ko e. Nyi akpaa gyoo da mo ɔ kɔba yayam gbutu keŋ kpila gyu kelɛɛ ɔtenate nyee na bɔɔ gyae baa ko e ya. Mɔna weeya sao na kufu (30) te lam ŋgba bɔɔ baake maŋ gyu gyoo gyaŋ nɛ.
12Be ka mo Ɛseta nɔɔwoya kɛŋa gyina Modekai nɛ, 13ɔ besewɔ kpila keyako Ɛseta nyiaa, <Na gyueŋ nyi keŋ n kyaa gyoo dekpaŋalaŋ man dɔɔ nɛ, nyaŋ nyaageŋ n ke nyiŋ n wose lee n tebia Yudatena baŋ man ya. 14Nawolo nyi akpaa n ta koro nombii kei dɔɔ ya nɛ, ŋolo waa lee yenaŋ wɔle kaa lɛɛ Yudatena nyee. Mɔna nyaŋ na n kya dekpaŋalaŋmantena ɛ ke munu. Ŋolo ba gyeŋ ya, mberem na nombii kei dɔɔ te n nyiŋa gbɛɛ gyu gyooro dekyae kei man nɛ.>>
15Keŋte Ɛseta kpilawɔ gyu keyako Modekai nyiaa, 16<<Gyu keyilaa Yudatena baŋ pou be kyaa Susa nɛ na ɛ ke bake ɛ nɔɔ na ɛ ke fane fa maŋ. Ɛ na di weenɛɛ yaa ɛ ke nyɔɔ loŋ ya weeya atooro nelim na ka weese. Daa na ma alebia mɔ dɛɛ bake de nɔɔ mena. Nyi akpaa de yɛɛ mena taŋ na maa gyu kekolosina gyoo ŋon, mɔna ma gyeŋ nyi kee tia mmaraa keŋ. Nyi akpaa ke yɛɛ yeŋ ke koraŋ na maa yeŋ.>
17Mena dɔɔ Modekai laŋawɔ te ɔ gyuuwɔ ke yɛɛ ŋan pou Ɛseta be yako e nyi waa yɛɛ nɛ.
Currently Selected:
Ɛseta 4: NTR
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics Literacy and Bible Translation