Ɛseta 7
7
Mena Keŋ Bɔɔ Ko Haman
1Mena dɔɔ gyoo na Haman gyuuwɔ Ɛseta dɛɛ be kaa di be nɔɔ bela. 2Ba kekyaa bɛɛ nyɔɔ soloŋ nɛ gyoo bɔɔse alagyoo Ɛseta bela nyiaa <<Ɛseta woŋ yaa n ne gyae? Yako maŋ na maa yɛɛ fa neŋ. Akpaa keyɛɛ me gyoori keŋ koraŋ na, maa kpase ke yaale fa neŋ.>>
3Botɔɔ te alagyoo Ɛseta tiranɔɔ nyiaa <<Akpaa me gbeŋgyoo waa wii me waraŋase na waa yɛɛ kpene keŋ mɛɛ sola e nɛ, waa lɛɛ daa na me tebia nyee. 4Ba te yɔɔ daa na me tebia nyi baa wɔlɛɛ daa na baa ko daa na baa munu daa. Beŋ yɔɔ daa ŋgba gbeŋa baa na nafɔ mɔɔ gyae maa kolosi yaa maa naase gyoo diyem ya. Mɔna bɛɛ gyae baa ko daa.>>
5Keŋte gyoo Ahasewerose bɔɔse alagyoo Ɛseta nyiaa, <<Amɔte ŋonaŋ? Nde e? Walaŋ woŋti yɛna ŋon ɔ ne gyae waa yɛɛ mena nombia kɛŋa?>>
6Te Ɛseta tiranɔɔ fa e nyiaa, <<Mena walaŋkum na de kɔlare ŋonaŋ yɛna Haman walaŋkum kei.>> Botɔɔ te gyakoloŋ gyoo Haman gyoo na alagyoo siaman.
7Gyoo ŋon korowɔ baŋ man tina ɔ soloŋ keŋ yela lee gyu ɔ gyooro wɔɔbii keŋ siaman. Haman naawɔ nyi gyoo ŋon taŋ keyɛɛ wa nyeempɔ nyi waa wɔŋ ɔ deŋele dɔɔ nɛ, ŋon kyaawɔ wɔle na waa sola alagyoo Ɛseta na waa lɛɛ ɔ nyee.
8Gyoo ŋon ka bese lee ɔ gyooro wɔɔbii keŋ man kɔŋ deni keŋ man bee di be nɔɔ nɛ, na Haman te tisi buŋ kyaŋ Ɛseta nawɔɔ botɔɔ keŋ ɔ kyaa nɛ. Gyoo ŋon kena mena nɛ,
ɔ fae yeesa baŋ man nyi, mena dɔɔ n ne gyae n kado alagyoo desɛŋ me siaman maŋ gbagba me dɛɛ?>>
Gyoo ŋon nɔɔ kabetaa si pɛ te ɔ somra baŋ bɔɔ lese wɔ saayɛ nɛ kaa wuu Haman sia. 9Keŋte Harebona ŋon ɔ yɛɛ gyoo somre e te bɔɔ lese e saayɛ nɛ yakowɔ gyoo siaman botɔɔ nyiaa, <<Haman taŋ kebaŋ daŋ keŋ ka korɛɛ metase sao atooro (23) nɛ ɔ dɛɛ keŋ waa mo Modekai ŋon ɔ be lɛɛ gyoo nyee nɛ wuluŋu ke dɔɔ ko.>>
Keŋte gyoo yakowɔ nyiaa, <<Ɛ mo Haman ke wuluŋu daŋ keŋ ɔ be bam nyi waa mo Modekai wuluŋu nɛ dɔɔ.>>
10Mena dɔɔ ba moo Haman gyu ke wuluŋu daŋ keŋ ɔ be bam fa Modekai nɛ dɔɔ. Te gyoo ŋon wɔe fɛɛwɔ.
Currently Selected:
Ɛseta 7: NTR
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics Literacy and Bible Translation