Ɛseta 8
8
Gyoo Kegyina Modekai Adido
1Mena wee kenaŋ nɛ gyoo Ahasewerose moo Yudatena kɔlare Haman ŋon dekpaŋalaŋ pou fa alagyoo Ɛseta. Modekai mɔ kɔŋawɔ dekpaŋalaŋ keŋ man nawolo nyi Ɛseta yako gyoo loŋtoro keŋ doo ŋon na Modekai nsana. 2Gyoo kpee ɔ nyiŋmaa kɔla keŋ ɔ yele gyakaa ke dɔɔ keŋ ɔ be lɛo lee Haman gyaŋ nɛ fa Modekai. Te Ɛseta moo Haman abɔɔ pou do Modekai nyiŋmaa man.
3Ɛseta besewɔ gyu ke waase gyoo. Ɔ tisiwɔ doo gyoo naawɔɔtɛɛ na ɔ ne wii. Ɔ waase e nyi waa tɔ Nyeempɔkum keŋ Agagi baale Haman ba moo lee Yudatena wose man nɛ gbɛɛ. 4Gyoo tenee ɔ kɔba yayam gbutu keŋ tee Ɛseta te ɔ korowɔ seŋ ɔ siaman.
5Te ɔ yako gyoo nyiaa, <<Akpaa gyoo ne gyae te waa wii maŋ te ɔ naa nyi ke yɛɛ kolo kpaakpaa keŋ waa yɛɛ te me nombia na gyoo ɔ sia na, waa ŋmarase tɔne bɛɛ tɔna ŋan Agagi baale Hamedata bu tobaale Haman ba mo Nyeempɔkum te ɔ be ŋmarase na waa mo wɔlɛɛ Yudatena pou gyoo tɛɛle man nɛ. 6Nawolo nyi sena yaa maa kyaa kɛɛ na nombiikum ke yala me balaŋ? Sena yaa maa tale seŋ kɛɛ me balaŋ ke munu?>>
7Keŋte gyoo Ahasewerose yako alagyoo Ɛseta na Yuda baale Modekai nyiaa, <<Lee keŋ Haman ba koroseŋ tia Yudatena dɔɔ me ta mo ɔ dekpaŋalaŋ fa Ɛseta te ba moo e wuluŋu daŋ keŋ ɔ be bam nɛ dɔɔ. 8Nɛnɛɛ bese ŋmarase tɔne wɔle gyoo yele man lee Yudatena baŋ naawɔɔ man ŋgba mena keŋ dei fa nyaŋ gbagba nɛ na n ka mo gyoo kɔla keŋ ɔ yele gyakaa ke dɔɔ nɛ tɔ ke nɔɔ. Nawolo nyi akpaa be ŋmarase tɔne te ba mo gyoo kɔla keŋ ɔ yele gyakaa ke dɔɔ nɛ tɔ nɔɔ na ŋolo be tale kyɛɛkee ke ya.>
9Debokenaŋ man te be baake gyoorodɛɛ tɔne ŋmarasela baŋ pou gyaŋee gyaalaŋna batoorote ŋon wee sao atoorote ŋon man keŋ yɛɛ Siwan gyaalaŋ ŋon man. Be ŋmarase Modekai nɔɔwoya ŋan pou yelee Yudatena na baŋ bɛɛ kɛɛ tɛɛlese dɔɔ na baŋ ba seŋɛɛ gyoo dinaa naawɔɔ man na gyoorobia baŋ pou be kyaa akpiise sɔŋolooro na nyetooro (127) ŋan dɔɔ nɛ lee India kelii Kuse. Be ŋmarase tɔna ŋan yelee tɛɛle kamasɛ na be dei man. Te be ŋmarasewɔ fa Yudatena mɔ baŋ gbagba be dei na ba keŋmarase man. 10Modekai ŋmarase tɔna ŋan gyoo Ahasewerose yele man te ɔ moo gyoo nyiŋmaa kɔla keŋ ɔ yele gyakaa ke dɔɔ nɛ tɔ ŋe nɔɔ. Te ɔ moo ŋa fa baŋ bɛɛ mo dɛɛkyɔŋse yeu nɛ nyi baa mo ŋa ke kpɛlɛɛ. Dɛɛkyɔŋse benaŋ lee botɔɔ keŋ bɛɛ kɛɛle gyoo dɛɛkyɔŋse nɛ.
11Gyoo tɔna ŋan faa Yudatena baŋ doŋ nyi baa tale yilaa debodokoloŋ na baa gyee ba wose. Nyi akpaa tɛɛle daale balaŋ da koro baŋ na be wɛɛla na be bia dɔɔ na baa tale ko wɔ yaa baa wɔlɛɛ wɔ na baa kuu ba abɔɔ ŋgba yoo abɔɔ nɛ. 12Wee keŋ bɔɔ see fa Yudatena nyi baa yɛɛ ke gyoo Ahasewerose dikpii kamasɛ man yɛna gyaalaŋna kufu alate ŋon bɛɛ baake e Ada nɛ ɔ weeya kufu atoorote man. 13Ba lese ke debɔɔ nyi keyɛɛ mmaraa ke fa balaŋ baŋ be kyaa akpiisebia ŋan man pou na Yudatena baŋ kenyiŋ desina ba wose yoo be kɔlara baŋ wee kenaŋ.
14Keŋte gyoo ŋon yela ɔ kpilara baŋ moo ɔ dɛɛkyɔŋse baŋ bɛɛ tale yeu nɛ kpila wɔ bileŋ mo tɔna ŋan kekpɛlɛɛ dikpii kamasɛ man. Ba lese mmaraa keŋ debɔɔ be donɔɔ dinaa Susa man.
Yudatena Kedi Be Kɔlara Dɔɔ
15Modekai kalee gyoo dɛɛ nɛ na ɔ doona gyooro abɔɔ keŋ yɛɛ buluu na wolom na ɔ wuuna kɔba yayam gyooro kotɔtɔɔ dinaa na amɔlaloŋ kegba keŋ bɔɔ mo ŋmeleŋ kpaakpaa loo ke nɛ. Te balaŋ baŋ be kyaa Susa donɔɔ man nɛ moo yeesa nyaŋee nideli. 16Yudatena baŋ gyaŋ na ke yɛɛ gyoŋ na kenyaŋee na yele kalese na obuo ke fa wɔ. 17Donɔɔ na dikpii kamasɛ man keŋ bɔɔ kala gyoo mmaraa keŋ nɛ, yɛɛ Yudatena baŋ gyoŋ te be dii be nɔɔ. Balaŋ burum besena ba wose yɛɛ Yudatena nawolo nyi bee yee wɔ.
Currently Selected:
Ɛseta 8: NTR
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics Literacy and Bible Translation