Ɛseta 9
9
1Mmaraa keŋ gyoo be faa nɛ gyaalaŋna kufu alate ŋon bɛɛ baake e nyi Ada nɛ, ɔ weeya kufu atoorote man te Yudatena kɔlara loo gyakaa nyi baa koe wɔ. Mɔna kebake keŋ bɔɔ bake nɛ besenawɔ te Yudatena kaa dii be kɔlara baŋ dɔɔ lee gyoo mmaraa keŋ dɔɔ. 2Yudatena baŋ yilaawɔ be donɔɔse kamasɛ man na baa yoo balaŋ baŋ bɛɛ gyae baa munu wɔ nɛ. Walaŋ kamasɛ bɛɛ tale seŋ be siaman ya nawolo nyi bee yee wɔ. 3Gyooneŋ kegyiise na baŋ bɛɛ kɛɛ dikpii kamasɛ dɔɔ seŋawɔ Yudatena wɔle nawolo be popou ne yee Modekai. 4Modekai yɛɛ walaŋ dinaa e gyoo dɛɛ. Ɔ lɛɛ yele dikpii kamasɛ man te ɔ gyakaa ɔ ne nyiŋ doŋ mɔ kpu.
5Mena dɔɔ Yudatena baŋ ne tale yɛɛ be kɔlara baŋ kpene kamasɛ keŋ bɛɛ gyae. Ba moo yoosilase koe wɔ te be wɔlɛɛ wɔ. 6Be donɔɔ dinaa Susa man nɛ, Yudatena koo balaŋ sɔŋonoŋse anoŋ (500) te be wɔlɛɛ wɔ. 7Ba besewɔ ko Paresandata na Dalefon na Asepata 8na Porata na Adaliya na Aridata 9na Paremasta na Arisai na Aridai na Waisata. 10Tewulɛɛ kufu (10) kɛwɔ yɛna Hamedata bu tobaale Haman ŋon ɔ ne kɔla Yudatena nɛ bia tewulɛɛ. Mɔna be te kuu ba abɔɔ ya.
11Wee kenaŋ ke nɛ be yako gyoo ŋon balaŋ baŋ bɔɔ koo Susa donɔɔ man nɛ yaanɔɔle. 12Keŋte gyoo yako alagyoo Ɛseta nyiaa, <<Yudatena ta koe te be wɔlɛɛ balaŋ sɔŋonoŋse anoŋ (500) kpuna Haman bia tewulɛɛ kufu (10) Susa donɔɔ man. Woŋ te be yɛɛwɔ gyoo akpiisebia akaŋ ŋan man? Yako maŋ kpene keŋ n ne gyae bela? Nyaŋ kenyiŋ ke. Yako maŋ kpene keŋ n ne gyae bela te nyaŋ ke nyiŋ ke.>>
13Botɔɔ te Ɛseta tiranɔɔ nyiaa <<Nyi akpaa gyoo de sɛɛ na waa fa Yudatena baŋ gbɛɛ na baa bese yɛɛ keŋ bɔɔ yɛɛ gyɛŋ nɛ kyoo bela. Yela baa mo Haman bia tewulɛɛ kufu (10) baŋ wuluŋu daase dɔɔ.>> 14Mena dɔɔ gyoo ŋon yela be yɛɛwɔ mena, te ɔ faa mmaraa Susa donɔɔ man. Te ba moo Haman bia kufu (10) baŋ woya wuluŋuna daase. 15Gyaalaŋ Adate weeya kufu anaarate man nɛ Yudatena baŋ be kyaa Susa nɛ yilaa dɔŋa bela te ba koo balaŋ sɔŋonoŋse atooro (300) donɔɔ dinaa kenaŋ man. Mɔna be te kuu ba abɔɔ ya.
16Yudatena baŋ be kyaa akpiisebia mɔ yilaa dɔŋa na baa nyiŋ yoona walaŋ kamasɛ ŋon waa naa wɔ. Ba koo balaŋ kakpoŋse sɔŋotooro na kufu anoŋ (75,000) baŋ bɛɛ kɔla wɔ nɛ mɔna be te kuu ba abɔɔ ya. 17Kei kɔŋawɔ gyaalaŋna kufualate ŋon bɛ baake Ada nɛ ɔ weeya kufu atoorote man. Tɛɛkena ɔ weeya kufu anaarate nɛ be ta ko walaŋ bela ya, mɔna be fɛɛfowɔ te be dii be nɔɔ te be nyaŋeewɔ wee kenaŋ.
18Yudatena baŋ be kyaa Susa nɛ yilaa dɔŋa weeya kufu atoorote na kufu anaarate man, te be fɛɛfowɔ gyaalaŋ ŋonaŋ weeya kufu anoŋte man te be di be nɔɔ te be nyaŋeewɔ. 19Mena dɔɔ te Yudatena baŋ be kyaa akuraase man ne di be nɔɔ gyaalaŋ Ada weeya kufu anaarate man na bɛɛ fa balaŋ abɔɔ nɛ.
Be Kasee Purim Nɔɔkedi Wee
20Modekai yela be ŋmarase nombia kɛŋa see te ba moo tɔna ŋan kpɛlɛɛ fa Yudatena baŋ pou be doo gyoo Ahasewerose tɛɛ te be kyaa tiitii na lemlem nɛ, 21nyi baa di gyaalaŋ Ada weeya kufu anaarate na kufu anoŋte kulutoo kamasɛ man. 22Weeya kɛŋa yɛna weeya ŋan Yudatena ba mo di be kɔlara dɔɔ, gyaalaŋ ŋon man be waraŋase ba bese kenyaŋee na nɔɔkedi. Ɔ ŋmarasewɔ fa wɔ nyi baa di weeya kɛŋa na baa di be nɔɔ na baa fa ayematena abɔɔ na baa mo weenɛɛ kpɛlɛɛ dɔŋa.
23Mena dɔɔ be dii keŋ Modekai be ŋmarase fa wɔ nɛ dɔɔ te kulutoo kamasɛ na bee di weeya kɛŋa. 24Nawolo nyi Agagi baale Haman ŋon ɔ yɛɛ Hamedata bu e te ɔ yɛɛ Yudatena pou kɔlare e nɛ yela be lɔɔ boe ba nyee man na waa nyiŋ wee keŋ waa mo koe wɔ. 25Mɔna Ɛseta gyuuwɔ gyoo gyaŋ te gyoo yela be ŋmarase mmaraa te nombiakumɛɛ ŋan Haman ba gyueŋ lee Yudatena wose man nɛ besewɔ kɔŋ ŋon gbagba dɔɔ, te ba doo ŋon na ɔ bia tewulɛɛ ŋmeeseŋ wuluŋu. 26Mena dɔɔ te bɛɛ baake weeya ŋan nyi Purim nɛ (lee boe keŋ bɔɔ lɔɔ dɔɔ). Nawolo nyi lee Modekai tɔne keŋ ɔ be ŋmarase na ŋan pou bɔɔ naa be kɔŋ be dɔɔ nɛ, 27te Yudatena mo ke yɛɛ mmaraa fa ba wose na be duuluŋ man balaŋ na walaŋ kamasɛ ŋon ɔ ne gyae waa bese Yuda walaŋ nyi baa di weeya ala kɛŋa kulutoo kamasɛ man ŋgba mena keŋ bɔɔ yakosee nɛ. 28Baa tɔɔse na ba di weeya kɛŋa dekpaŋalaŋ kamasɛ man na dikpii kamasɛ man na donɔɔ kamasɛ man. Be na wolee Purim weeya kɛŋa kedi ya. Baa tɔɔse ke be duuluŋ man pou.
29Mena dɔɔ Abihayile bu alagyoo Ɛseta na Yuda baale Modekai moo be doŋ ŋmarase tɔne alate lee Purim nɔɔkedi keŋ wose man. 30Modekai kpilawɔ mo tɔne yelee Yudatena baŋ pou be kyaa akpiisebia sɔŋolooro na nyetooro (127) ŋan ŋe doo gyoo Ahasewerose tɛɛ nɛ. Ke man nombia yɛɛ wosefɛɛreŋ na anokoare, 31nyi baa yela Purim weeya kedoo debaŋ keŋ bɔɔ see fa wɔ nɛ, ŋgba mena keŋ bee di nɔɔkebakesee na waraŋsa keŋ Yuda baale Modekai na alagyoo Ɛseta be yako wɔ nɛ. 32Ɛseta moo ɔ doŋ seŋ Purim weekedi mmaraase ŋan wɔle te be ŋmarase ŋa see.
Currently Selected:
Ɛseta 9: NTR
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics Literacy and Bible Translation