Yesaya 10
10
1Baŋ bɛɛ yɛɛ mmaraase ŋan be doona ŋe gbɛɛ ya,
na baŋ bɛɛ fa mmarase ŋan na ŋere balaŋ do nɛ, baa laako.
2Bɛɛ yɛɛ ŋa mo tɔ ayematena nombia ŋan dei nɛ gbɛɛ,
te bɔɔ ne di nombia kegbɛɛ dɔɔ fa me balaŋ baŋ bɔɔ ŋere wɔ do nɛ ya,
na baa kuu liala,
na yoyolobiise abɔɔ.
3Woŋ te ɛ ke yɛɛ akɔŋtaa wee keŋ,
nombiikum da lee lem kaa yala ŋon nɛ?
Amɔte gyaŋ yaa ɛ ke yeu gyu nyi waa kyɔ ŋon?
Aleŋ yaa ɛ ka mo ɛ wosekenyiŋ ŋan see?
4Kolo be doona keyɛɛ ya mɔna ɛ ke yɔkɔse ɛ wose do yoogbeŋa man,
yaa ɛ ka yeŋ kpuna baŋ bɔɔ yale yoo man nɛ.
Mɔna lee kɛŋa pou wɔle na, ɔ te tinaata ɔ baŋ yela ya,
ɔ nyiŋmaa sɛɛ doo adido.
Wurubuarɛ waa di Asiriya nombia
5<<Asiriya, me baŋ dambila,
ŋon me baŋ gbutu keŋ doo n nyiŋmaa man nɛ, laako.
6Me kpila e balaŋ baŋ bɔɔ ne yee Wurubuarɛ ya nɛ gyaŋ,
me kpila e balaŋ baŋ bɛɛ do maŋ baŋ nɛ gyaŋ,
nyi waa lɛo ba abɔɔ na waa kuu be yooman abɔɔ,
na waa sakatee wɔ ŋgba abɔntere man apɛtɛɛ nɛ.
7Mɔna na kei yɛna wa nyeempɔ ya,
na kei doola wa nyeempɔ man ya,
keŋ doo ɔ konɔɔ man yɛna nyi waa wɔlɛɛ,
na waa munu tɛɛlese burum.
8Ɔ yakowɔ nyi, <Me yoonɔɔtena kegyiise pou te yɛɛ gyooneŋwɔ yee?>
9<Kaleno be yɛɛ ŋgba Karekemise yee?
Hamate be yɛɛ ŋgba Arepade,
te Samariya yɛɛ ŋgba Damasekuse yee?
10Mena keŋ me nyiŋmaa be tina bɛɛneŋ gyooridediise ŋan,
na gyooridediise ŋan ŋe bɛɛneŋ kela Yerusalɛm na Samariya wui nɛ,
11mɔɔ gyae maa yɛɛ Yerusalɛm na be bɛɛneŋ,
ŋgba mena keŋ mɔɔ yɛɛ Samariya na ɔ bɛɛneŋ yee?>>>
12Akpaa Degbeŋgyoo de yɛɛ ŋan pou ɔ kpa waa yɛɛ Siyɔn bula dɔɔ na Yerusalɛm taŋ nɛ, waa yako nyiaa, <<Maa wɔŋ Asiriya gyoo deŋele lee ɔ wose kegate na wa agaŋtaŋ sia dɔɔ. 13Nawolo nyi ɔ ne yako nyiaa,
<<<Maŋ gbagba me doŋ man te me yɛɛ kei,
me nyansa man, nawolo nyi mee nyii nombia man.
Ma lese tɛɛlese wuluse,
me kuu ba agyapadɛɛse,
ŋgba doŋte nɛ, me yɔkɔse be gyooneŋ.
14Mena keŋ bɛɛ do nyiŋmaa gyebu desaa man nɛ,
mena ke te ma doo me nyiŋmaa kuu tɛɛlese agyapadɛɛse,
mena keŋ balaŋ ne kuu gyebu wɔɔ ŋan ɔ be bɛɛ ŋa doo desaa man nɛ,
mena ke te me yilaa tɛɛlese ŋan pou.
Be man ŋolo te furufu
yaa waa wii ya.>>>
15Debeŋa ne gate ka wose kela ŋon ɔ dana ke ɔ ne kare nɛ,
yaa saa waa tale wola ɔ wose kela ŋon ɔ na mo ke yɛɛ tom nɛ?
Dambila gyae ke tale tuku ŋon ɔ telana ke nɛ,
yaa gbutu gyae ke tale gyina ŋon ɔ te yɛɛ daŋ ya nɛ adido?
16Mena dɔɔ Degbeŋgyoo, Degbeŋgyoo Dekpataakpere,
waa mo kaweekum kaa lɔ yoonɔɔtena gyanɛɛ baŋ dɔɔ.
Boalaŋ gyae ke kpa ɔ gyoorobiiri,
ŋgba boalaŋ degyapaa nɛ.
17Iserae keŋmaŋee gyae ka bese boalaŋ,
ba fereŋkyeŋte ŋon waa bese boalaŋ laakem,
waa mo wee dokoloŋ kpa na waa nyakee
ɔ kpalamse na kpaŋkpaŋkorolose.
18Mena keŋ kawee ne tale kaweete nideli nɛ,
mena ke te laaneŋ kyeo nyiŋan na tɛɛlese kpaakpaa nyiŋan,
gyae ke wɔlɛɛ kerekere.
19Te laaman daase akaŋ ŋan gyae ke yɛɛ kyomii nɛ,
keŋ nyi biikyaa waa tale ŋmarase ŋe yaanɔɔle do tɔne man.
Iseraetena akaŋ baŋ
20Mena wee kenaŋ nɛ, Iseraetena akaŋ
na Yakɔbe balaŋ baŋ be ta yem ya nɛ,
be gyae baa mo ba wose lɔ
ŋon ɔ be di be dɔɔ nɛ dɔɔ bela ya.
Mɔna baa mo ba wose pou lɔ Degbeŋgyoo
Iserae fereŋkyeŋte ŋon dɔɔ.
21Baŋ bɔɔ kaa nɛ baa bese kɔŋ, Yakɔbe balaŋ akaŋ baŋ
baa bese kɔŋ Wurubuarɛ Dekpataakpere ŋon gyaŋ. 22Doo nyi n balaŋ Iseraetena boe ŋgba ɛpo nɔɔman aŋasa koraŋ nɛ,
kyomii ne gyaela baa bese kɔŋ.
Ɔ te bakesee nyi waa wɔlɛɛ ke,
te ke doo kegbɛɛ dɔɔ.
23Degbeŋgyoo, Degbeŋgyoo Dekpaatakpere ŋon,
waa wɔlɛɛ wɔ lee tɛɛle keŋ pou dɔɔ ŋgba mena keŋ ɔ be bakesee nɛ.
24Mena dɔɔ keŋ Degbeŋgyoo, Degbeŋgyoo Dekpaatakpere ŋon ne yako yaa,
<<Me balaŋ baŋ be kyaa Siyɔn,
ɛ naa yee Asiriyatena baŋ,
bɛɛ mo dambila tuku ŋon
te bɛɛ gate akpokpose ɛ dɔɔ ŋgba mena keŋ Igyipitetena be yɛɛ ŋon nɛ ya
25Be gyae ke kyare ya me baŋ gyae ke fɛɛ ɛ dɔɔ,
na maa besena me baŋ beiŋ keŋ wɔlɛɛ wɔ.>>
26Degbeŋgyoo Dekpataakpere waa mo dambila tuku wɔ,
ŋgba mena keŋ ɔ be tuku Midianetena Orebo kpanaŋ keŋ gyaŋ nɛ.
na waa gyina ɔ gbutu loŋse dɔɔ,
ŋgba mena keŋ ɔ be yɛɛ Igyipite nɛ.
27Wee kenaŋ Degbeŋgyoo waa lese be kaale lee n degbaŋgbaŋ dɔɔ,
na be kasolɔ lee n wɔŋe dɔɔ,
baa wɔlɛɛ kasolɔ keŋ
lee keŋ n be doo nuŋ dɔɔ.
28Ba gyoo Ayate,
ba moowɔ Migeron,
be tinaa ba abɔɔ yela Mikimase.
29Be ka moowɔ bula gbɛɛ te be yakowɔ nyiaa,
<<dee doo Geba.>>
Ramatena sereewɔ,
Sɔɔl donɔɔ Gibeatena yekiiwɔ.
30Galim alebu, lɔ nɔɔ,
Layesa, tei,
Anatɔtetena, ɛ tiranɔɔ.
31Mademenatena ne yekii,
Gebimtena te yekii ka yo.
32Gyɛŋ wee kei baa kaa dɔɔ Nɔbe,
baa goo ba akɔtase tee,
Siyɔn bu alebu bula keŋ,
Yerusalɛm bulabii keŋ dɔɔ.
33Kɛɛ, Degbeŋgyoo, Degbeŋgyoo Dekpataakpere ŋon,
waa mo ɔ doŋ gyakoloŋ keŋ kɛrɛɛ daase tombia,
waa kɛrɛɛ ŋan ŋa korɛɛ nɛ,
na waa tisina ŋan ŋe dana dɔɔloŋ nɛ.
34Waa mo debeŋa tuŋii laaman daase ŋan,
Lebanɔn waa yala Dekpataakpere ŋon siaman.
Currently Selected:
Yesaya 10: NTR
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics Literacy and Bible Translation
