Yesaya 11
11
Tombii keŋ ba lee Yese man nɛ
1Tombii daale gyae ka potee lee Yese daŋ duguŋ man,
tombii lee ɔ lila man gyae ka se bia.
2Degbeŋgyoo feliŋ keŋ gyae ke gyakaa ɔ dɔɔ.
nyansa na nombia man kenyii feliŋ,
kekolosido na doŋ feliŋ,
nombia kagyeŋ na Degbeŋgyoo keyee feliŋ.
3te Degbeŋgyoo keyee gyae ke yɛɛ e gyoŋ,
Ɔ be gyae waa bu fɔɔ lee keŋ ɔ ba mo ɔ sia naa,
yaa waa kulu nae lee keŋ ɔ be nyiina ɔ deŋele nɛ ya,
4mɔna waa mo katenee di ayematena nombia,
nombia kedi na kegbɛɛ dɔɔ te waa mo di nombia fa tɛɛle keŋ dɔɔ ayematena.
Ɔ nɔɔman dambila te waa mo tuku tɛɛle,
Ɔ nɔɔman feliŋ te waa mo koe akpanyanyaŋtena.
5Katenee gyae ke yɛɛ ɔ bɛlɛte,
na kelɛɛdi ke yɛɛ ɔ teŋa man kanyaŋ.
6Gbougbou na nambu baa kyaa debodokoloŋ,
laamante na asoose baa doo,
nunkyue bia na dinaate bia baa di debodokoloŋ,
te biikyaa ne gyaela baa ta be siaman.
7nunkyue waa di bomna mokɔɔte,
be bia baa doo debodokoloŋ,
dinaate waa tao ŋalese ŋgba nunkyue nɛ.
8Bia buruburu baa yoi benaana wurale dedoi man,
biikyaa waa mo ɔ nyiŋmaa do dom keŋkeŋteŋte bɔɔ man.
9Bɔɔ gyae baa yɛɛ dukum yaa wɔlɛɛ
me bulase fereŋkyeŋ ŋan pou dɔɔ ya,
nawolo nyi Degbeŋgyoo kagyeŋ gyae ke wulu tɛɛle keŋ dɔɔ,
ŋgba mena keŋ loŋ be wuu ɛpo nɛ.
10Wee kenaŋ na Yese lili keŋ gyae ke yɛɛ felage fa balaŋ baŋ, tɛɛlese ŋan gyae kaa gyaŋee ɔ gyaŋ, te gyoorobiiri gyae ke doo ɔ dɛɛkyae fɛɛfo man. 11Wee kenaŋ te Degbeŋgyoo waa gate ɔ nyiŋmaa bolate lɛɛ ɔ balaŋ baŋ bɔɔ kaa nɛ lee Asiriya na Igyipite detaŋgya yenaŋ na Igyipite na Kuse na Elam na Babilɔn na Hamate na Meditereniya man tɛɛlese man kɔŋ ɔ gyaŋ.
12Waa gate felage adido fa tɛɛlese ŋan,
na waa yilaa Iseraetena yoogbeŋa,
waa yilaa Yudatena baŋ bɔɔ yaasee,
gyu tɛɛle yenaase anaara ŋan man nɛ kɔŋ.
13Ɛferayim nuŋkurili keŋ gyae ke ŋaalaa,
na baa munu Yuda kɔlara,
Eferayim be gyae waa yoo Yuda nuŋkurili,
yaa Yuda ke yɛɛ Eferayim akpanyanyaŋ ya.
14Baa tisi bileŋ gyu Filisitena gyaŋ kelii weese dɛɛyalae yenaŋ,
na baa yoo kyaŋ balaŋ baŋ kelii weese dɛɛlee yenaŋ.
Baa ŋere Edom na Moabe do
na Amonitena mɔ kaa doo be tɛɛ.
15Degbeŋgyoo waa yela
Igyipite ɛpo ka yo,
te Eferate boo dɔɔ waa mo,
feliŋ keŋ ke laŋɛɛ nɛ feefu ke dɔɔ.
Waa kpase ke yɛɛ boŋobiise nyetooro,
na ɔkamasɛ ke tale ta tɛɛle dowolo dɔɔ toŋ.
16Botɔɔ gyae ke yɛɛ gbɛɛ dinaa fa ɔ balaŋ akaŋ baŋ,
bɔɔ lee Asiriya nɛ,
ŋgba mena keŋ be doo fa Iseraetena,
debaŋ keŋ bɔɔ lee Igyipite nɛ.
Currently Selected:
Yesaya 11: NTR
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics Literacy and Bible Translation
