Yesaya 14
14
1Wurubuarɛ waa wii Yakɔbe,
waa lese Iserae bela,
na waa yela baa baŋee lila baŋ gbagba be tɛɛle dɔɔ,
ŋɔɔla baa kaa kpuna wɔ,
na baŋ na Yakɔbe duluŋmantena ke yɛɛ nɔɔdokoloŋ.
2Tɛɛlese baa mo wɔ,
na baa mo wɔ kɔŋ baŋ gbagba ba dekyae man.
Te Iserae waa mo tɛɛlese ŋenaŋ bese be wui,
na baa besena wɔ yɛɛ be gbeŋa ala na baala Degbeŋgyoo tɛɛle keŋ man.
Baa yela baŋ nafɔ bɔɔ di Iserae dɔɔ nɛ, kaa doo be tɛɛ
na baa di baŋ bɔɔ ŋere wɔ do nɛ dɔɔ.
3Wee keŋ Degbeŋgyoo waa yela n ke fɛɛfo, lee n kaale na n weeleŋ na tom nedoŋ keŋ bɔɔ ŋere neŋ n be yɛɛ man nɛ, 4nyaŋ ka do Babilɔn gyoo ahiŋ nyiaa,
ŋon ɔ na ŋere balaŋ do nɛ ɔto yaa
te ɔ baŋ keŋ ɔto yaa!
5Degbeŋgyoo te tekerii akpanyanyaŋte dambila,
na gyooro gbutu keŋ,
6ɔ ba mo tuku balaŋ baŋ man,
keŋ be te tina yela ya,
baŋ beiŋ man te ba ŋere tɛɛlese do,
keŋ be gyakaa bɛɛ naase wɔ diyem.
7Tɛɛlese ŋan dɔɔ pou te fɛɛ te ŋe doo wosefɛɛreŋ man,
te be lɔɔ nɔɔneŋ.
8Kateenaa na sida daase ŋan kya Lebanɔn nɛ,
ne nyaŋee n dɔɔ te bɛɛ yako nyiaa,
<<Nɛnɛɛ keŋ bɔɔ yɔkɔse neŋ nɛ,
ŋolo be gyae waa kɔŋ kaa tuŋii daa lɔ ya.>>
9Woya dɛɛ ne desina ka wose,
waa gyaŋeena neŋ,
woya baŋ ta koro baa do neŋ nɔɔ,
baŋ pou bɔɔ yɛɛ siamantena tɛɛle dɔɔ nɛ,
te yele be ta koro lee be gyoorogbelɛɛ dɔɔ,
baŋ pou bɔɔ di gyoori tɛɛlese dɔɔ nɛ.
10Be popou baa kpa,
baa yako neŋ nyiaa,
<<Nyaŋ mɔ te yɔkɔse ŋgba daa nɛ,
n te yɛɛ ŋgba daa nɛ.>>
11Nyɔ obuo pou te tisi kaa gyoo yebɔɔ man,
kpuna n keferee kewii,
be ta mo feelɛɛ lɔ neŋ dofoŋoŋ,
te taala yɛna kanyaŋ keŋ be wuu neŋ.
12Sena yaa n yalawɔ lee adido mena,
nebo kyolobii, nebo nebo fuu tobaale.
Be te fuŋ neŋ lɔ tɛɛle man,
nyaŋ ŋon n be yɔkɔse tɛɛlese kaa laŋ nɛ!
13N yakowɔ n konɔɔ man nyiaa,
<<Maa gyeŋ gyu adido.
Maa gyina me gyoorogbeli
gbaa Wurubuarɛ kyolobiise.
Maa kyaa me gyoorogbeli dɔɔ, be dɛɛgyaŋee bula keŋ dɔɔ,
Safon bula fereŋkyeŋ keŋ adido adido.
14Maa gyeŋ gbaa gyu ŋɔma ŋan adido,
maa yɛɛ ma wose ŋgba Adidote ŋon nɛ>>
15Mɔna be te tisina neŋ kɔŋ woya dɛɛ,
yebɔɔ kyilimkyilim keŋ man.
16Baŋ be naa neŋ ne kɛɛ neŋ fee,
bɛɛ gyueŋ n nombia nyiaa,
<<Na balee ŋon ɔ be wosi tɛɛle,
te ɔ be yele gyoorobiise be wosi,
17baale ŋon ɔ ba besena tɛɛlese bese depampaa,
te ɔ be yɛlɛɛ ŋe donɔɔ dinaana,
te ɔ bɛɛ tina yoogbeŋa yela baa bese gyu be dɛɛse ya nɛ yaa yee?>>
18Tɛɛlese gyooneŋ pou doo be gyoorobiiri man,
ɔkamasɛ doo ɔ yebɔɔ man.
19Mɔna nyaŋ dɔɔ be te fuŋ neŋ leki,
ŋgba tombii keŋ bɔɔ kare leki nɛ.
be ta mo baŋ bɔɔ koe nɛ wuu neŋ,
kpuna baŋ bɔɔ mo yoosila koe nɛ,
baŋ bɔɔ tisi gyoo boya bɔɔ man,
te be yɛɛ ŋgba woya baŋ bɔɔ sakatee nɛ.
20Bɔɔ gyae baa wuu neŋ ŋgba n tebia gyooneŋ ya,
nawolo nyi n te wɔlɛɛ n tɛɛle,
te n koe n balaŋ.
Be naa baake loŋtoro man,
ŋolo yele korakora ya.
21Ɛ desina debo na ɛ ke kɛrɛɛ ɔ bia nyeeya,
lee dukum keŋ be naanaɔ be yɛɛ nɛ dɔɔ,
tekaboena nyi baa koro kaa di tɛɛle kei dɔɔ,
na be kaa kara donɔɔ dinaana tɛɛle keŋ dɔɔ ya.
22Degbeŋgyoo Dekpataakpere ta toro yako nyiaa,
<<Maa koro seŋ tia wɔ,
maa feefo Babilɔn yele na baŋ bɔɔ kaa nɛ,
na be bia na be duluŋmantena yela>>
Degbeŋgyoo torola yako.
23<<Maa besena e yɛɛ kpilimse dekyae
na depaa,
maa mo kewɔlɛɛ sembia gbee e leki.>>
Degbeŋgyoo Dekpataakpere ŋon torola yako.
24Degbeŋgyoo Dekpataakpere ŋon te kaŋ ntam nyiaa,
<<Ampaŋ, keŋ mɔɔ bakesee nɛ, gyae ke yɛɛ mena,
te keŋ mɔɔ bake ma nyeeman nɛ, ke gyae ke kɔŋ mena.
25Maa munu Asiriyatena lee me tɛɛle man,
me bula dɔɔ te maa sakatee wɔ.
Ɔ kaale gyae ka lee me balaŋ dɔɔ,
na baa lese ɔ kasolɔ lee ba agbaŋgbase dɔɔ.>>
26Kei yɛna keŋ mɔɔ bakesee fa tɛɛle kei pou,
kei yɛna baam keŋ mɔɔ tenee tɛɛlese pou dɔɔ.
27Nyi Degbeŋgyoo Dekpataakpere ŋon te bakesee na, amɔte ne gyaela waa tale tɔ gbɛɛ?
ɔ ta tenee ɔ baam, amɔte ne gyaela waa tale go ke?
Keyakosee keŋ ne tia Filisitena
28Keyakosee kei kɔŋawɔ kulutoo keŋ gyoo Ahase ba yem nɛ man.
29Ɛmɛɛ Filisitena, ɛ naa nyaŋee,
nyi gbutu keŋ bɛɛ mo tuku ŋon nɛ te tekeri ya,
Dom ŋonaŋ woŋ man te dom keŋkeŋteŋte waa lee,
waa kpala dom ŋon ɔ dana teekum te ɔ dana ɔsaa nɛ.
30Ayematena man diyemte waa nyiŋ weenɛɛ di,
te ŋon ɔ be dana kolo ya nɛ waa doo keŋ ɔ be yee ya.
Mɔna n balaŋ dɔɔ maa mo tanam munu wɔ,
te ke gyae ka koe n balaŋ baŋ be kyaa nɛ.
31Ao denaanɔɔ, lɔ nɔɔ! Ao donɔɔ dinaa, wii!
Ɛmɛɛ Filisitena pou, ɛ yela ɛ wɔe ke lɔ ŋon!
Ŋɔma nyɔɔse na lee bo ado yenaŋ,
te yoonɔɔte ŋolo be gyae waa wɔŋ ɔ wose lee wɔle ya.
32Woŋ nɔɔ yaa baa tira fa,
kpilara baŋ bɔɔ lee Filisi kɔŋ nɛ?
<<Degbeŋgyoo te yele Siyɔn te kyaa gbeli,
ke man te ɔ balaŋ baŋ bɔɔ naase wɔ diyem nɛ baa yeu kagyoo.>>
Currently Selected:
Yesaya 14: NTR
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics Literacy and Bible Translation
