Yesaya 19
19
Keyakosee tia Igyipite
1Keyakosee tia Igyipite,
Kɛɛ, Degbeŋgyoo dɔŋ debuŋta ɔsaate man,
ɔ ne kɔŋ Igyipite.
Igyipite bɛɛneŋ ne seree ɔ sia man,
te Igyipitetena woo te yeu lee gyakoloŋ dɔɔ.
2<<Maa mo yoo do Igyipite na Igyipite nsana,
walaŋ na ɔ naabu baa yoo,
walaŋ na ɔ dɔɔ baa yoo,
donɔɔ dinaa na donɔɔ dinaa baa yoo,
gyooridedii na gyooridedii baa yoo.
3Igyipitetena wose gyae ka yeŋ wɔ,
maa yela ba kebake ke yɛɛ yakaa,
baa gyu bɛɛneŋ na woya gyaŋ,
baa gyu gbale na baa baake woya.
4Maa mo Igyipitetena baŋ do,
gbeŋgyoo tɔɔman ŋaŋte ŋolo nyiŋmaa man,
na gyoo nyeeman doŋte ŋolo ke di be dɔɔ.>>
Degbeŋgyoo Dekpataakpere ŋon torola yako.
5Naele boo loŋse gyae ka yo,
na booneŋ ka yo wolo.
6Boŋobiise gyae ka lee wɔŋ,
Igyipite boŋobiise gyae ke gyɔ aguŋ na ka yo.
ɔkpaŋ saboe na ŋalese gyae ka boto,
7ŋalese ŋaale mɔ seŋɛɛ Naele nɔɔnɔɔ,
na boo keŋ nɔɔman,
wɔɔse ŋan bɔɔ fare Naele nɔɔnɔɔ,
gyae ka wolo, feliŋ gyae ke gyɔ ŋa na ŋa ke ŋaalaa.
8Kpebia kyaŋara baa keketee na baa toroŋ,
baŋ bɛɛ lɔ darawaa Naele man,
na baŋ bɛɛ lɔ asawuse,
wose gyae ke kyaŋ wɔ nideli.
9Baŋ bɛɛ mo dukurufa loo abɔɔ wose gyae ke tekerii wɔ,
baŋ bɛɛ mo akaralɛɛ loo abɔɔ loo gyae ka yeŋ wɔ.
10Desɛŋ gyae ke kyaŋ kanyaŋ loora,
baŋ bɛɛ yɛɛ tomse te bɛɛ tɔ wɔ kom nɛ baa nyiŋ konɔɔ kawee.
11Soan kyaarabia yɛɛ ayiŋtenawɔ,
Faaro nombia wolara ne kolosi diyiŋ nombia bo.
Sena te nyaŋ ke tale yako Faaro nyi,
<<Me yɛɛ siakaralatena baŋ man ŋolo e,
gyaŋgba gyooneŋ baŋ duuluŋ man bu>>?
12Nɛnɛɛ nde n siakaralatena baŋ?
Yela baa lese keŋ,
Degbeŋgyoo Dekpataakpere ŋon,
be bake tia Igyipite nɛ wola neŋ
13Soan kyaarabia te kaa bese ayiŋtena,
be ta beo Memefise siamantena,
ɔ balaŋ baŋ be yɛɛ kebɔtala man boya,
ta yooso Igyipite.
14Degbeŋgyoo ta mo,
sia kebiri feliŋ do be man,
bee yele Igyipite ne kpaŋte lee ŋan pou ɔ ne yɛɛ nɛ man,
ŋgba mena keŋ soloŋ nyɔɔre ne kpaŋte ɔ tɔɔla man nɛ.
15Kolo be doo keŋ Igyipite waa tale yɛɛ ya,
nyee yaa gyuŋ, ɔkɛɛ faareŋ yaa moro.
16Wee kenaŋ Igyipitetena baa yɛɛ ŋgba ala nɛ. Gyakoloŋ gyae ka gyoo wɔ lee Degbeŋgyoo Dekpataakpere ŋon nyiŋmaa keŋ ɔ be gyina be dɔɔ nɛ dɔɔ. 17Yuda tɛɛle gyae ke yela gyakoloŋ ka gyoo Igyipitetena, walaŋ kamasɛ ŋon be baake Yuda yele ɔ gyaŋ na gyakoloŋ gyae ka gyoo e. Lee kpene keŋ Degbeŋgyoo Dekpataakpere ne bake tia wɔ nɛ dɔɔ.
18Wee kenaŋ Igyipite donɔɔ dinaana anoŋ baa kolosi Kaana dei, na baa kaŋ ntam fa Degbeŋgyoo Dekpataakpere. Baa baake donɔɔ kenaŋ daale nyi, Weese donɔɔ dinaa.
19Wee kenaŋ baa baŋ kedeesaboe Igyipite tɛɛle nsana nsana fa Degbeŋgyoo, na ketɔɔse boe ke wulu man fa Degbeŋgyoo. 20Ke gyae ke yɛɛ kagyene na adansɛɛ fa Degbeŋgyoo Dekpataakpere Igyipite tɛɛle man. Nyi be kɔlara da ŋere wɔ do te be wii baake Degbeŋgyoo na, waa lese nyeelɛɛre na gyeere fa wɔ na waa lɛɛ wɔ. 21Degbeŋgyoo waa lese ɔ wose wola Igyipitetena, na baa lɛɛ Degbeŋgyoo di wee kenaŋ na baa mo kedeesase na weenɛɛ kedeesase som. Baa kaŋ ntam fa Degbeŋgyoo na baa di ke dɔɔ. 22Degbeŋgyoo waa mo kaweekum lɔ Igyipite dɔɔ. Waa mo lɔ be dɔɔ na waa kyɔ wɔ. Baa bese kɔŋ Degbeŋgyoo gyaŋ na waa nyii be kasola na waa kyɔ wɔ be ka weese.
23Wee kenaŋ gbɛɛ dinaa gyae ke doo lee Igyipite gyu Asiriya. Asiriyatena baa gyu Igyipite na Igyipitetena mɔ ke gyu Asiriya. Igyipitetena na Asiriyatena baa som debodokoloŋ. 24Wee kenaŋ Iserae ne gyaela ke yɛɛ donɔɔ dinaa atoorote gyakaa Igyipite na Asiriya dɔɔ. Be dɔɔ te Degbeŋgyoo waa ta hiraa tɛɛle kei pou. 25Degbeŋgyoo Dekpataakpere waa hiraa wɔ yako nyiaa, <<Me te hiraa ŋon me balaŋ Igyipite, me nyiŋmaa man tom Asiriya na me dedii Iserae.>>
Currently Selected:
Yesaya 19: NTR
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics Literacy and Bible Translation
