Yesaya 22
22
Keyakosee lee Yerusalɛm wose man
1Kei yɛna keyakosee keŋ ne tia Kalesewola Detaŋgya keŋ.
Nɛnɛɛ woŋ ne yɛɛna ŋon,
te ɛ balaŋ pou gyeŋawɔ kekyaa deni nyee dɔɔ,
2nyaŋ donɔɔ keŋ yeesa be wulu,
kekolosi na kenyaŋee donɔɔ dinaa?
Na yoosila te ba moowɔ koe n balaŋ ya,
te na yooman te ba yekeewɔ ya.
3N siamantena pou te yɛɛ nɔɔ yekii,
na baŋdaŋ te ba moowɔ di be dɔɔ ya,
Keŋ na ba keyeu gyu lemlem koraŋ nɛ,
be tuŋa wɔ te be kyaŋa wɔ,
4Mena dɔɔ me yakowɔ nyiaa, <<Ɛ lese ɛ sia lee me dɔɔ,
yela maa wii nideli,
Ɛ naa naase ɛ wose diyem nyi ɛ ke kyɔlɛɛ maŋ,
nyi be ta koe me balaŋ dɔɔ ya.>>
5Degbeŋgyoo, Degbeŋgyoo Dekpataakpere dana wee,
keŋ kekolosi na kewɔlɛɛ na donɔɔ kesiŋii gyae kekɔŋ,
kalesewola detaŋgya keŋ man.
Wee keŋ baa tekerii akyaŋse lɔ,
na be kewii kelii bulase dɔɔ.
6Elam baana baŋdaŋ na ke bɔɔlee,
kpuna baŋ be kyaa anebiliŋiŋse na dɛɛkyɔŋse dɔɔ bɛɛ kɔŋ,
te Kiri lese ɔ yoonyeele pampasaŋ debɔɔ.
7Anebiliŋiŋse te wulu ɛ detaŋgyase kpaakpaa nyiŋan man,
te dɛɛkyɔŋ kyaara seŋɛɛ donɔɔ dinaa keŋ anaanɔɔse man.
8Degbeŋgyoo ta lese keŋ ne gyee Yuda nɛ,
wee kenaŋ ɛ moo ɛ sia gyakaa
laa gyooro dekpaŋalaŋ keŋ yoo abɔɔ dɔɔ.
9Ɛ naawɔ nyi ba te yɛlɛɛ
Dawide donɔɔ dinaa keŋ akyaŋse burum,
te ɛ tɔɔ atayenaŋ
loŋse ŋan gbɛɛ.
10Ɛ kala Yerusalɛm denɛɛ ŋan,
te ɛ yɛlɛɛ akpaŋalaŋse nyi ɛ ka mo ŋa boya desina dekyaŋ keŋ.
11Ɛ baŋa loŋ dɛɛlɛedo akyaŋse ala ŋan nsana,
na depaa bene keŋ loŋ kaa gyoo ke man,
mɔna ɛ te kɛɛ ŋon ɔ be yɛɛ ke ya,
ɛ ta mo obuo fa ŋon ɔ be bake ke see lee beneŋ beneŋ keŋ ya.
12Degbeŋgyoo, Degbeŋgyoo Dekpataakpere ŋon,
baake ŋon wee kenaŋ
nyi yaa lɔ nɔɔ na ɛ ke wii,
nyi yaa gbee ɛ nyeenyɔɔse na ɛ ke wuu titerese.
13Mɔna kɛɛ, yɛɛ ŋon gyoŋ te ɛ nyaŋeewɔ,
ɛ kɛrɛɛ nunkyuese nyeeya, te ɛ koo namense,
ɛ tao naane te ɛ nyɔɔ waen!
Ɛ yakowɔ nyiaa,<<Ɛ yela dee di na dɛɛ nyɔɔ,
nawolo nyi kyoo kaageŋ na de ta yem!>>
14Mɔna Degbeŋgyoo Dekpataakpere ŋon, wɔɔna maŋ gela kei nyiaa, <<Bɔɔ gyae baa mo dukum kei kyɛɛ ŋon, kaboena ɛ ka mo yekee ya. Degbeŋgyoo Dekpataakpere ŋon torola yako.>>
15Kei yɛna keŋ Degbeŋgyoo, Degbeŋgyoo Dekpataakpere ŋon ne yako,
<<Gyu, ke yako ŋon ɔ ne kɛɛ abɔɔ dɔɔ,
Sɛbena ŋon ɔ ne kɛɛ gyooro dekpaŋalaŋ keŋ dɔɔ nɛ nyiaa,
16Woŋ yaa n ne yɛɛ kɛbo te amɔte faana neŋ gbɛɛ,
nyi nyaa lese n yebɔɔ kɛbo,
te n ne kara yebɔɔ botɔɔ keŋ korɛɛ,
te n ne kara n dɛɛfɛɛfoe kpanaŋ man?
17Kɛɛ, nyaŋ walaŋ doŋte,
Degbeŋgyoo ne gyae waa lɔ kyaŋ neŋ,
na waa fuŋ neŋ lɔ.
18Waa biliŋi neŋ ŋgba bɔɔlo nɛ,
na waa fuŋ neŋ kelɔ tɛɛle keŋ fɛlɛɛ nɛ dɔɔ,
botɔɔ te nyaŋ ka yeŋ,
botɔɔ te nya anebiliŋiŋse kpaakpaa nyiŋan, ŋan dɔɔ n ne yɛɛ agaŋtaŋ nɛ,
gyae ka bese desɛŋ kolo fa n gbeŋgyoo dekpaŋalaŋmantena.
19Maa lese neŋ lee n gbeli dɔɔ,
na maa tisina neŋ lee n daseŋae man.
20Mena wee kenaŋ maa baake me tobaale Eliyakim, ŋon ɔ kya yɛna Hilikiya nɛ.
21Maa mo n kegba wurikyim do e, na maa mo keŋ n na mo kpaŋ gyakaa wurikyim keŋ dɔɔ nɛ kpaŋ e, na maa mo n doŋ keŋ do e ɔ nyiŋmaa man. Waa yɛɛ Yerusalɛmtena na Yudatena be kya. 22Maa mo Dawide dekpaŋalaŋ safowaa do e ɔ nyiŋmaa man, keŋ ɔ toro na ŋolo be tale tɔ ya, te ɔ tɔɔ na ŋolo be tale toro ya. 23Maa gyɔ e ŋgba tuula nɛ do botɔɔ keŋ dana doŋ, waa bese gbeli, obuo gyae keta ɔ dɔɔ bo kɔŋ ɔ kya dekpaŋalaŋ. 24Ɔ loŋtona pou baa yɛɛ kasolɔ ɔ dɔɔ. Baa yɛɛ ŋgba nyefalɛɛ na osuŋse ŋan wuluŋɛɛ tuula dɔɔ nɛ.
25Degbeŋgyoo Dekpataakpere ŋon kpa nyiaa, <<Wee kenaŋ nɛ, tuula keŋ bɔɔ gyɔɔ do botɔɔ keŋ dana doŋ nɛ gyae ke gɛɛse na ke kulu, na kasolɔ keŋ wuluŋɛɛ ke dɔɔ nɛ ka lee yala.>> Degbeŋgyoo torola yako.
Currently Selected:
Yesaya 22: NTR
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics Literacy and Bible Translation
