Yesaya 3
3
Nombia kedi Yerusalɛm na Yuda dɔɔ
1Nɛnɛɛ kɛɛ, Debeŋgyoo
Degbeŋgyoo Dekpataakpere ŋon,
ne gyae waa lese kefa na kekyɔ pou,
weenɛɛ na loŋ kefa,
2baalebu na yoonɔɔte,
nombiadiiri na Wurubuarɛ gbalare,
gbalare na kegyia.
3yoonɔɔtena sɔŋola na kufu siamante, na obuo walaŋ,
na ŋon ɔ ne kolosido balaŋ na ŋon ɔ gyeŋ adao nyiŋmaa man tomse na ŋmeeseŋtena lee Yerusalɛm na Yuda.
4<<Maa mo tewulɛɛbia yɛɛ be kyaarabia,
na bia kaa di be dɔɔ.>
5Balaŋ baa ŋere dɔŋa do,
baale waa seŋ tia baale, na dɔɔ ka seŋ tia dɔɔ.
Tewulɛɛ baa seŋ tia kegyiise,
walaŋ yakaate waa seŋ tia obuo walaŋ.
6Baale waa lɔ kyaŋ ɔ naabu ŋolo,
be kya dekpaŋalaŋ man na waa yako nyiaa,
<<N dana baala kanyaŋ, nyaŋ yɛɛ de siamante,
na n keta de siaman wose kekyaŋ kei man.>>
7Mɔna wee kenaŋ waa bɛɛ nyiaa,
<<Mɔɔ tale kyɔ ŋon ya,
Mɔɔ dana weenɛɛ yaa abɔɔ anadoŋ me dɛɛ ya,
mena dɔɔ ɛ naa mo maŋ yɛɛ balaŋ baŋ siamante ya.>
8Yerusalɛm ne kpaŋte,
Yuda ne yale,
be nɔɔwoya na ba ayɛɛsa ne tia Degbeŋgyoo,
ba te yɛɛ deŋeledoŋ ɔ gyoorobiiri keŋ siaman.
9Be siagbɛɛ ne di adansɛɛ tia wɔ,
bɛɛ lese be dukum debɔɔ ŋgba Sodomtena nɛ,
bɔɔ na weese ke ya.
Baa laako.
nawolo nyi be ta mo nombiikum lɔ ba wose dɔɔ.
10Yako baŋ ba tenɛɛ nɛ nyi gyae ke de fa wɔ,
nawolo nyi baa di gyoŋ lee ba ayɛɛsa man.
11Akpanyanyaŋtena baa laako,
nombiikum gyae ke yala wɔ,
Baa tɔ wɔ kom,
lee keŋ bɔɔ yɛɛ nɛ dɔɔ.
12Tewulɛɛ ta ŋere me balaŋ do,
ala ne diina be dɔɔ.
Me balaŋ, ɛ siamantena te yele ɛ ta yo gbɛɛ,
bee yele ɛ ne kpase lee detɛe keŋ man.
13Degbeŋgyoo te kyaa ɔ dekyae man nombia dedii man,
ɔ ta koro waa di balaŋ baŋ nombia.
14Degbeŋgyoo te kɔŋ ɔ kaa di nombia,
tia ɔ balaŋ baŋ kegyiise na siamantena baŋ nyiaa,
<<Ɛmɛɛ wɔlɛɛna ma gerepo wɔɔ keŋ,
te ɛ kuu ayematena yooman abɔɔ wulu yaa akpaŋalaŋse,
15Woŋ doŋ yaa ɛ dana te ɛ ne wuritii me balaŋ,
te ɛ na mo ayematena sia tiu tɛɛle?>>
Degbeŋgyoo kolosila, Degbeŋgyoo Dekpataakpere ŋon.
16Degbeŋgyoo kpa,
<<Siyɔn ala ne gate ba wose,
bɛɛ tɛɛ tenee be wɔŋese,
te bɛɛ mo be sia gyae baala,
be dɔŋ bee wosi ba mokɔɔse,
na ba doona man kegyaŋase ne wii kyakaakyakaa.
17Mena dɔɔ Degbeŋgyoo waa yela gyamɛɛ kaa gyɔ Siyɔn ala nyeeya man,
Degbeŋgyoo waa yela ba nyeeya ke gbee kolikoli.>>
18Mena wee kenaŋ nɛ Degbeŋgyoo waa lɛo be nawɔɔ man agbaraagbaraase na abuterese na wɔŋe man kegyaŋase, 19na asomdɛɛse na nyiŋmaa man kegyaŋase na kanyaŋbii keŋ bɛɛ mo wuu tɔ sia, 20na ala kotɔtɔɔ na kaboŋboŋ man kegyaŋase na wɔŋe man kanyaŋbii na lafenta porontiase na pɔɔlase,
21na kɔɔla keŋ yele gyakaa ke dɔɔ na memɔɔ man kɔɔla,
22na kegba wurikyim kpaakpaa nyiŋan na kanyaŋse na abɔsɔɔse, 23na diikuse na kegba keŋ bɔɔ mo ŋmeleŋ kpaakpaa loo na ala gyooro kotɔtɔɔ na baŋfela dɔɔ kanyaŋ.
24Wɔŋ gyae kaa seŋ ofoŋ nawɔɔ man,
ŋmeleŋ gyae kaa seŋ keŋ ɔ na mo kpaŋ gyakaa wurikyim keŋ dɔɔ nɛ nawɔɔ man,
nyee kegbee gyae kaa seŋ nyeenyɔɔse burum nawɔɔ man,
titere gyae kaa seŋ kanyaŋ kpaakpaa nawɔɔ man,
desɛŋ gyae kaa seŋ ba kyeo nawɔɔ man.
25N baala baa yala yoosila nɔɔman,
n yoonɔɔtena baa yala yoo man.
26Siyɔn anaanɔɔse gyae ka toroŋ na kedi waraŋsa,
ke gyae ke doo yakaa na waa kyaa tɛɛle man.
Currently Selected:
Yesaya 3: NTR
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics Literacy and Bible Translation
