Yesaya 30
30
Tɛɛle keŋ ke dana deŋele doŋ nɛ dɛɛ laako
1Degbeŋgyoo kpa,
<<Baŋ bɛɛ koro seŋ tia balaŋ,
te bɛɛ bake kebake keŋ ta lee me gyaŋ ya,
bɛɛ yɛɛ nɔɔdokoloŋ keŋ me feliŋ be kpuɛna wɔ ya,
te bɛɛ mo dukum kpuna dukum nɛ baa laako,
2bee tisi gyu Igyipite,
keŋ bɔɔ ne bɔɔse maŋ ya,
bee gyu Faaro gyaŋ ke gyae kegyee,
bee yeu kagyoo Igyipite wuluŋtɛɛ.
3Mɔna Faaro kegyee keŋ gyae ka mo desɛŋ kɔna ŋon,
Igyipite wuluŋtɛɛ gyae ke yela ɛ sia ka yeŋ.
4Doo nyi be dana kyaarabia Soan,
te be kpilara te kaa lii Hanese koraŋ nɛ,
5desɛŋ gyae ke kyaŋ be man walaŋ kamasɛ,
lee balaŋ baŋ bɔɔ dana tɔnɔɔ fa wɔ ya,
te bɔɔ na mo kekyɔ na gbɛɛ kenyiŋ kɔna wɔ ya,
mɔna desɛŋ na siakayeŋ kaageŋ.>>
6Keyakosee tia ata yenaŋ depampaa keŋ wonembia.
Ba moowɔ kaale na wosekekyaŋ tɛɛle,
keŋ dinaate baala na dinaate ala kyaa,
te gyakpatase na doma baŋ bee furufu kyaa nɛ man.
Ba moo ba wosekenyiŋ gyakaa afurumse maamase dɔɔ,
ba agyapadɛɛse gyakaa kurumɔɔse kebuse dɔɔ,
bee gyu tɛɛle keŋ bɔɔ nyiŋ tɔnɔɔ daale yɛ nɛ man.
7Mɔna Igyipite kekyɔ be doo daale man ya,
mena dɔɔ mɛɛ baake e nyi,
Rahabe ohuhoo dekpataakpere ŋon.
8Nɛnɛɛ gyu ke ŋmarase ke gyakaa boe papatalaa dɔɔ fa wɔ,
na n ke ŋmarase ke do tɔne man,
na ke yɛɛ adansɛɛ kekpaakekpaa,
fa weeya akaŋ ŋan ne kɔŋ nɛ.
9Nawolo nyi be yɛɛ deŋele doŋtenawɔ, bia akɛrɛɛtena,
bia baŋ bɔɔ ne gyae nyi baa tei Degbeŋgyoo nombia kawola ya.
10Bɛɛ yako baŋ bɛɛ naa nɛ nyi,
<<Ɛ na naa bela ya.>>
na ba te yako Wurubuarɛ gbalara baŋ nyi,
<<Ɛ naa tekaa naa anokoare nombia yako daa bela ya,
ɛ yako nombia ŋan dana daa gyoŋ,
na ɛ ke yako daa akɛrɛɛ gbale nombia.
11Ɛ lee gbɛɛ kei dɔɔ,
ɛ lee detɛe kei man,
ɛ na mo Iserae fereŋkyeŋte ŋon,
nombia kaa tɔ daa deŋele bela ya.>>
12Mena dɔɔ Iserae fereŋkyeŋte ŋon kpa,
<<Keŋ ɛ be bɛɛ nombii kei,
te ɛ ba mo ɛ wose lɔ balaŋ kaŋeredo,
na akɛrɛɛ kedi dɔɔ,
13dukum kei gyae ke doo fa ŋon,
ŋgba dekyaŋ dakorosa keŋ ke dana kebɛɛlase te ne gyae ke yala nɛ,
ka keyala gyae ke kɔŋ debokenaŋ man karatetee dokoloŋ.
14Ke gyae ke yɛlɛɛ bogobogo ŋgba saabu,
keŋ be yɛlɛɛ keŋ kolo te kaa ya,
keŋ bɔɔ nyiŋ ke yaalebii koraŋ,
na baa mo lese boalaŋ kosɔ man,
yaa baa mo kyee loŋ detiribuŋ man gba ya.>>
15Nnɛ yaa Degbeŋgyoo Doŋ Pou Nyee, Iserae fereŋkyeŋte ŋon ne yako,
<<Ɛ kekyɛɛkee lee ɛ gbɛɛneŋ kumɛɛ man, na ɛ wose keyɔkɔse man te ɛ ke nyiŋ nyeekelɛɛ,
ɛ kekyaa yididi na ɛ loo ka mo gyakaa man te ɛ ke nyiŋ doŋ,
mɔna ɛ bɛɛ ŋe popou bo.
16Te ɛ yakowɔ nyi, <Koa, dɛɛ kyaa dɛɛkyɔŋse dɔɔ yeu.>
Mena dɔɔ ɛ ke yeu ampaŋ ampaŋ,
Ɛ yakowɔ nyi, <Dɛɛ kyaa dɛɛkyɔŋse baŋ be dana ɔsaa nɛ dɔɔ,
Mena dɔɔ baŋ bee gegi ŋon nɛ baa yɛɛ ɔsaa kela ŋon,
17Balaŋ kakpoŋ baa yeu,
lee walaŋ dokoloŋ keŋmaase man,
nyi balaŋ banoŋ de ŋmaase ŋon na,
ɛ popou ɛ ke yeu
kelii debaŋ keŋ ɛ ke ka,
felage daŋ keŋ seŋɛɛ bula nyee dɔɔ,
ŋgba felage keŋ gyakaa bulabii dɔɔ nɛ.>>
18Mɔna Degbeŋgyoo ne gyae nyi waa boele ŋon,
mena dɔɔ waa koro nyi waa wii ɛ waraŋase.
Nawolo nyi Degbeŋgyoo yɛɛ nombia kedi ke gbɛɛ dɔɔ Wurubuarɛ e.
Baŋ pou bɛɛ kɛɛ ɔ gbɛɛ nɛ, baŋna nyeebam.
19Ɛmɛɛ Siyɔntena baŋ ɛ kyaa Yerusalɛm, ɛ be gyae ɛ ke wii bela ya. Nyi ɛ wii baake e nyi waa kyɔ ŋon na waa boele ŋon. Nyi ɔ nyii pɛ, waa kpa ŋon. 20Doo nyi Degbeŋgyoo ne fa ŋon wosekekyaŋ weenɛɛ, na kayeyɛɛ loŋ koraŋ nɛ, ɛ wolara be gyae baa tekaa mo ba wose weese bela ya, mɔna ɛmɛɛ gbagba ɛ ka mo ɛ sia naa wɔ. 21Nyi akpaa ɛ besena demena yaa dunoluŋ dɔɔ nɛ, ɛ deŋela gyae ke nyii woya ɛ wɔle nyiaa, <<Kei yɛna gbɛɛ keŋ, ɛ ta ke dɔɔ.>> 22Botɔɔ te ɛ ke waalaa ɛ bɛɛneŋ baŋ bɔɔ mo kɔba wolom gyilaa ŋa, na ŋe dinɔɔse ŋan bɔɔ mo kɔba yayam gyilaa ŋa nɛ. Ɛ ke fuŋii ŋa leki ŋgba abɔɔ ŋan ŋa wose dana ayimɛɛ nɛ, na ɛ ke yako ŋa nyiaa, <<Ɛ lee de gyaŋ!>>
23Waa yela ɔga ke ŋɛɛ woli ya abɔɔ ŋan ɛ be duu wɔɔse man nɛ, te weenɛɛ ŋan gyae ka lee tɛɛle keŋ man kɔŋ gyae ke de te ŋe gyae ka bo. Mena wee kenaŋ nɛ, ɛ nunkyuese baa dii botɔɔse ŋan fɛlɛɛ nɛ. 24Nunkyue baala na afurumse baŋ bɛɛ yɛɛ tom nɛ, baa di weenɛɛ kpaakpaa ŋan bɔɔ mo fɔɔke na sɔɔfe saale ŋa nɛ. 25Wee keŋ baa koe balaŋ burum nɛ, dekagyase ŋan gyae ke yɛlɛɛ loŋse gyae ke puu lee bula kamasɛ keŋ korɛɛ na bulabii kamasɛ keŋ korɛɛ nɛ man. 26Nyi akpaa Degbeŋgyoo de bake ɔ balaŋ gyamɛɛ te ɔ kyɔ wɔ be gyamɛɛ ŋan ɔ ba doo wɔ nɛ, gyaalaŋ waa ŋalakee ŋgba weese nɛ, te weese kegyɔ gyae ke ŋalakee batabo nyetooro ŋgba weeya nyetooro keŋalakee nɛ.
27Kɛɛ, Degbeŋgyoo Yele keŋ ta lee lemlem ne kɔŋ,
na baŋ keŋ kɛɛ kpaa na dubuŋta nyɔɔse tuum keŋ
baŋ te wulu ɔ nɔɔ,
te ɔ laakem yɛɛ boalaŋ keŋ kɛɛ kpaa abɔɔ.
28Ɔ weesɛɛ yɛɛ ŋgba kakpela keŋ kɛɛ gyɔɔ nedoŋ
gyeŋ kelii wɔŋe man,
Ɔ na mo kewɔlɛɛ saano kyekyɛɛ tɛɛlese,
ɔ na mo dokɔŋ do balaŋ baŋ nɔɔse man,
na ka mo wɔ kpase gbɛɛ.
29Ɛ ke kpee nɔɔneŋ ŋgba
nelim keŋ ɛ be di siŋkiti fereŋkyeŋ keŋ nɛ,
ɛ konɔɔse gyae ke nyaŋee,
ŋgba mena keŋ baŋ bɛɛ wola kefereese na gyem gyu,
Degbeŋgyoo bula dɔɔ,
gyu Iserae kpanaŋ keŋ gyaŋ.
30Degbeŋgyoo waa yela balaŋ kenyii ɔ gyoorobiiri woya,
na ke yela baa naa ɔ nyiŋmaa ke tisina,
na baŋ doŋ na boalaŋ keŋ ne nyakee abɔɔ,
na ɔga dinaa na ɔga kefae na akpeleŋkpeleŋbia,
31Degbeŋgyoo woya gyae ka do Asiriya gyakoloŋ,
waa mo ɔ dambila gyɔ wɔ lɔ.
32Debaŋ kamasɛ keŋ Degbeŋgyoo da mo
deŋele kewɔŋ okpokpo gyɔ wɔ na,
gyae ke yɛɛ ŋgba akyakaase na akayase kegyɔ nɛ,
ŋgba mena keŋ ɔ be fuŋ ɔ nyiŋmaa dokɔta yooman nɛ.
33Be te wulaa desina dekpalaŋ see,
be desina ke see fa gyoo.
Be wula boalaŋ bɔɔ keŋ gyoo tɔɔman te ke fɛlɛɛ,
te boalaŋ na daase burum doo ke man.
Degbeŋgyoo weesɛɛ keŋ,
yɛɛ ŋgba kpatakpela anekpaaŋ nɛ,
gyae ke kpa ke.
Currently Selected:
Yesaya 30: NTR
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics Literacy and Bible Translation
