Yesaya 31
31
Baŋ bɛɛ mo ba wose lɔ Igyipite dɔɔ nɛ baa laako
1Baŋ bee gyu Igyipite ke gyae kekyɔ,
baŋ bɛɛ mo be loo gyakaa dɛɛkyɔŋse dɔɔ,
te bɛɛ mo ba wose lɔ be yookɔtase burum,
na be dɛɛkyɔŋ kyaara doŋ dɔɔ,
te bɔɔ na mo be sia gyakaa Iserae fereŋkyeŋte ŋon dɔɔ,
yaa baa kɛo Degbeŋgyoo gbɛɛ ya nɛ, baa laako.
2Mɔna ŋon mɔ yɛɛ siakaralate e keŋ waa tale mo nombiikum kɔŋ,
ɔ bɛɛ lee ɔ nombii wɔle ya,
waa seŋ tia akpanyanyaŋtena,
na baŋ bɛɛ sem nombiakumɛɛ yɛɛra wɔle nɛ.
3Mɔna Igyipitetena yɛɛ denibalaŋwɔ, ba te yɛɛ Wurubuarɛ e ya,
be dɛɛkyɔŋse yɛɛ wosenaane ke, te ba te yɛɛ feliŋ ya.
Akpaa Degbeŋgyoo da tenee ɔ baam nɛ,
baŋ bɛɛ kyɔ balaŋ nɛ baa kpaŋte,
baŋ mɔ balaŋ ne kyɔ wɔ nɛ baa yala,
be popou baa munu.
4Keŋ Degbeŋgyoo be yako maŋ yɛna nyiaa,
<<Mena keŋ dinaate,
dinaate de kyaŋ wonembu te ɔ ne muusu,
te be baake wonembia kɛɛlera burum,
kɔŋ koraŋ na be yeesa bɛɛ do e gyakoloŋ ya,
te ba agiŋgiŋ mɔ bɛɛ ŋmaase e ya nɛ,
mena te Degbeŋgyoo Dekpataakpere ŋon waa tisi kɔŋ,
na ɔ kaa yoo Siyɔn bula na ke bulasebia dɔɔ.
5Mena keŋ gyebuse ne furufu gyu kɔŋ nɛ, mena te Degbeŋgyoo Dekpataakpere ŋon,
waa gyee Yerusalɛm,
waa gyee ke na waa lɛɛ ke,
waa gbaa ke na waa lɛɛ ke.
6Oo Iseraetena, ɛ bese kɔŋ ŋon ɛ ba koro seŋ tia nideli nɛ gyaŋ. 7Nawolo nyi mena wee kenaŋ, ɛ man walaŋ kamasɛ waa fuŋ ɔ kɔba yayam na kɔba wolom bɛɛneŋ baŋ ɛ ba mo ɛ dukum nyiŋmaase yɛɛ nɛ leki.
8Asiriyatena baa yala yoosila keŋ ka te yɛɛ denibalaŋ wui ya nɛ nɔɔman,
yoosila keŋ ka te yɛɛ denibalaŋ wui ya nɛ gyae ke wɔlɛɛ wɔ.
Baa yeu lee yoosila nɔɔman,
baa ŋere be tewulɛɛ yela baa yɛɛ tom nedoŋ.
9Ba keyeu kagyoo gyae ka lee yala lee gyakoloŋ dɔɔ,
be yoonɔɔtena kegyiise de gyɔ sibii naa yoo keŋ na ba wose gyae ke seree wɔ,
Degbeŋgyoo ŋon ɔ boalaŋ doo Siyɔn,
te ɔ boalaŋ degyapaa doo Yerusalɛm nɛ,
torola yako.
Currently Selected:
Yesaya 31: NTR
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics Literacy and Bible Translation
