Yesaya 32
32
Katenee Gyooridedii keŋ
1Kɛɛ, gyoo ŋolo waa di gyoori katenee man,
na ɔ kyaarabia kedi nombia kegbɛɛ dɔɔ.
2Ɔkamasɛ waa yɛɛ ŋgba dayoe nɛ lee feliŋ man,
na keyeu kagyoo lee feliŋkum man,
ŋgba depampaa boŋobiise man loŋse,
na tɛɛle dowolosa man kpanaŋ dinaa wuluŋ nɛ.
3Kenaŋ na baŋ be sia ne naa nɛ sia be gyae ke wuu bela ya,
te baŋ ba deŋela ne nyii nɛ baa tei.
4Baŋ bɛɛ barase yɛɛ abɔɔ nɛ baa gyoo ŋe man pɛ baa yɛɛ,
te baŋ bee wuku nɛ laakemse gyae ke kolosi nideli na ke doo ke gbɛɛ dɔɔ.
5Bɔɔ teka baake diyiŋte nyi gyoorobu,
yaa baa baake ohuhoo nyi kyaarabu ya.
6Nawolo nyi ayiŋtena ne kolosi diyiŋ nombia,
te bɛɛ gyueŋ nombiakumɛɛ.
Bɛɛ yɛɛ ŋan te yɛɛ Degbeŋgyoo kawola ya,
te bee kolosi akɛrɛɛ nombia lee Degbeŋgyoo wose man,
bɛɛ bɛɛse baŋ tanam na ko wɔ nɛ weenɛɛ,
te bɔɔ ne fa ŋon loŋboaneŋ na ko e nɛ loŋ ya.
7Behuhoona na mo akpanyanyaŋ gbɛɛneŋ,
bɛɛ bake nombiakumɛɛ
nyi baa mo akɛrɛɛ wɔlɛɛ diyemte,
na baŋ bɔɔ dana kolo ya, akpaa be nombia doona ke gbɛɛ koraŋ na.
8Mɔna gyoorobu ne yɛɛ nombia ŋan kaboena,
te nombia ŋan kaboena keyɛɛ dɔɔ te ba seŋɛɛ.
Yerusalɛm ala
9Ɛmɛɛ ala baŋ ɛ wose be fɛɛ ŋon,
ɛ koro na ɛ ke tei maŋ.
ɛmɛɛ bia alebia baŋ ɛ be nyiŋ ɛ wose,
ɛ nyii keŋ maa yako.
10Kɛbo kulutoo na weeya kyomii nɛ,
ɛmɛɛ baŋ ɛ be nyiŋ ɛ wose nɛ ɛ ke seree,
gerepo bia be gyae ka se ya,
te ɛ be gyae ɛ ke nyiŋ daasebia kɔ ya.
11Ɛmɛɛ ala baŋ ɛ wose be fɛɛ ŋon, ɛ seree,
ɛmɛɛ bia alebia baŋ ɛ be nyiŋ ɛ wose, ɛ yeyɛɛ,
ɛ kpee ya abɔɔ kpaakpaa ŋan see,
na ɛ ka mo kakyeŋgbelaase kaa.
12Ɛ yeyɛɛ lee tɛɛle kpaakpaa keŋ dɔɔ,
fa woŋse ŋan na see nideli nɛ dɔɔ,
13na me balaŋ tɛɛle keŋ,
tɛɛle keŋ kpalamse na kpaŋkpaŋkorolose be tuu ke man nɛ,
ayi, ɛ di waraŋsa fa akpaŋalaŋ ŋan ne nyaŋee,
na donɔɔ dinaa kei keŋ kee di gyoŋ nɛ.
14Baa bɛɛ degyee keŋ,
yeesa donɔɔ dinaa keŋ gyae ke doo yakaa,
donɔɔ dinaa keŋ bɔɔ gyee ke, na kegyee dekagya keŋ gyae ke doo yakaa kekpaakekpaa,
afurumse baa yoi botɔɔ, na ke ka bese wonembia dedii,
15kelii debaŋ keŋ waa mo ɔ feliŋ lee adido kaa do de man,
na depampaa ka bese tɛɛle kpaakpaa,
na tɛɛle kpaakpaa ke yɛɛ ŋgba laa nɛ.
16Degbeŋgyoo nombia kedi kegbɛɛ dɔɔ gyae ke doo depampaa keŋ man,
ɔ katenee kyaa tɛɛle kpaakpaa keŋ man.
17Katenee kenaŋ bia gyae ke yɛɛ wosefɛɛreŋ,
keŋ gyae ka lee ke man yɛna kekyaa yididi na wose kamo lɔ kekpaakekpaa.
18Me balaŋ baa kyaa wosefɛɛreŋ akyaese man,
wose kefɛɛ akpaŋalaŋse man,
na wɔe kefɛɛ akyaese man.
19Doo nyi akpeleŋkpeleŋbia gyae ke wɔlɛɛ laa keŋ,
te gyae ke tala donɔɔ dinaa keŋ kerekere nɛ,
20ɛmɛɛ baŋ ɛ ke duu abɔɔ booneŋ nɔɔman,
na ɛ ke yela ɛ nunkyuese na afurumse ke kila dii nɛ,
ɛmɛɛna nyeebam.
Currently Selected:
Yesaya 32: NTR
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics Literacy and Bible Translation
