Yesaya 38
38
Hesekiya kawee
1Weeya ŋenaŋ man kawee gyɔɔ Hesekiya keŋ na ɔ ta yem taŋ. Keŋte Amose bu Wurubuarɛ gbalare Yesaya gyuuwɔ ke yako e nyiaa, <<Degbeŋgyoo kpa, desina n wɔle see nawolo nyi nyaŋ ka yeŋ. N be gyae n ka koro ya.>> 2Keŋte Hesekiya besena ɔ sia tee deni te ɔ fanewɔ fa Degbeŋgyoo nyiaa, 3<<Ao Degbeŋgyoo, tɔɔse mena keŋ mɔɔ mo me konɔɔ pou ta n siaman anokoare man, na mena keŋ mɔɔ yɛɛ nombia kpaakpaa n siaman.>> Keŋte Hesekiya wiiwɔ nideli. 4Keŋte Degbeŋgyoo yako Yesaya nyiaa, 5<<Gyu ke yako Hesekiya nyiaa, <Nnɛ yaa Degbeŋgyoo n kya Dawide Wurubuarɛ ŋon ne yako, me te nyii n kefane te me naa n siasaraŋ. Maa mo kulutooneŋ kufu anoŋ (15) kpu n weeya man. 6Te maa lɛɛ ɛmɛɛ na donɔɔ dinaa kei lee Asiriya gyoo nyiŋmaa man. Maa gyee donɔɔ dinaa kei.
7<<Kei yɛna kagyene lee Degbeŋgyoo gyaŋ nyi waa yɛɛ kpene keŋ ɔ be yakosee nɛ. 8Maa yela weese wɔŋtaa ka bese gyu ke wɔle Ahase ɔgyeŋdɔɔ gbɛɛ keŋ man nae kekulu kufu.>>>Mena dɔɔ weese wɔŋtaa keŋ besewɔ kɔŋ wɔle nae kekulu kufu.
9Keŋ Yuda gyoo Hesekiya be ŋmarase lee ɔ kawee na ɔ kawee koro wɔle yaa.
10Me yakowɔ nyiaa, <<Me tobiiritɛɛ man na
maa moona yeŋ denaanɔɔ man,
na baa lɛo ma weeya akaŋ?>>
11Ma besewɔ yako nyiaa, <<Mɔɔ gyae maa naa Degbeŋgyoo gbagba,
baŋ be kyaa tɛɛle kei dɔɔ nɛ man bela ya,
mɔɔ gyae maa naa balaŋ bela,
yaa maa kyaana baŋ be kyaa tɛɛle kei dɔɔ nɛ ya.
12Ba te tekerii me deni lɔ,
ŋgba namensekɛɛlere kanyaŋ deni nɛ.
Ma te bɔ ma nyeedoŋ ŋgba loore nɛ,
te ɔ kara maŋ lee kanyaŋ loore daŋ keŋ man,
te n yela ma weeya kɔŋa ɔto wee dokoloŋ.
13Me nyiŋa konɔɔ daa kelii tɛɛ kabee kena,
mɔna ɔ yɛlɛɛ me ŋɔɔ pou ŋgba dinaate nɛ,
te n yela ma weeya kɔŋa ɔto wee dokoloŋ.
14Me wiiwɔ ŋgba akpelee yaa boo gyebu nɛ,
ma keketeewɔ ŋgba duwuluŋ nɛ,
me kɛɛ adido te me sia yɛɛwɔ fulaa,
Ao Degbeŋgyoo! Ma wose te kyaŋ maŋ, kɔŋ kaa lɛɛ maŋ.>>
15Mɔna woŋ te maa tale yako?
Ɔ te kolosi fa maŋ, te ŋon gbagba yɛɛna kei.
Maa yɔkɔse ma wose ma kekyaabii man pou,
nawolo nyi ma woo ne di waraŋsa.
16Ao Degbeŋgyoo, lee kɛŋa dɔɔ te balaŋ kyaa,
te ma woo mɔ ne nyiŋ nyeedoŋ lee ŋe man.
Nyaŋ yelela ma wose yɛɛ maŋ doŋ,
te n yelaa me kyaa nyeedoŋ man.
17Ampaŋ lee me deeli dɔɔ,
te me naa diyem nideli.
N kegyae man te n lɛɛ maŋ,
lee kewɔlɛɛ bɔɔ keŋ man,
n te fuŋ me dukum pou,
lɔ n wɔle.
18Nawolo nyi yebɔɔ be tale lese n yele ya,
yeŋ be tale kpee nɔɔneŋ lese n yele ya,
baŋ bɔɔ tisi gyoo yebɔɔ man,
be tale gyakaa nya anokoare kedi loo ya.
19Baŋ be kyaa, baŋ be kyaa, na lesena n yele,
ŋgba mena keŋ mɛɛ yɛɛ gyɛŋ nɛ,
lolala ne yako be bia,
lee nya anokoare kedi wose man.
20Degbeŋgyoo waa lɛɛ maŋ,
na dɛɛ mo adolɛɛse kegyɔ kpee nɔɔneŋ,
Degbeŋgyoo ɔsom deni dinaa keŋ man,
da kekyaabii man pou,
21Yesaya yakowɔ nyiaa, <<Ɛ gyɔ fiigi degbaŋ na ɛ ka mo buraa seere keŋ na waa nyiŋ kawee kekyɔ.>>
22Hesekiya bɔɔsewɔ nyiaa, <<Woŋ ne gyaela ke yɛɛ kagyene nyi maa gyu Degbeŋgyoo ɔsom deni dinaa keŋ man?>>
Currently Selected:
Yesaya 38: NTR
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics Literacy and Bible Translation
