Yesaya 60
60
Siyɔn gyoorobiiri
1<<Koro na n ke ŋalakee, nawolo nyi n keŋmaŋee te kɔŋ,
te Degbeŋgyoo gyoorobiiri ta lee n dɔɔ.
2Kɛɛ, detiŋtɛɛ te wuu tɛɛle keŋ
te detiŋtɛɛ tuum te wuu balaŋ,
mɔna Degbeŋgyoo waa lee n dɔɔ,
na baa naa ɔ gyoorobiiri n dɔɔ.
3Tɛɛlese baa kɔŋ n keŋmaŋee keŋ man,
na gyooneŋ kekɔŋ n tɛɛkena keŋalakee keŋ gyaŋ.
4<<Gyina n sia na n ke kɛɛ kilisi,
be popou te yilaa te be kɔŋawɔ n gyaŋ.
N bia tewulɛɛ ta lee lemlem kɔŋ,
baa doona n bia alebia maama bɛɛ kɔŋ.
5Botɔɔ te n ke kɛɛ na ke yɛɛ neŋ gyoŋ.
kenyaŋee gyae ke wulu n konɔɔ.
baa mo wosekenyiŋ keŋ gyakaa ɛpose dɔɔ nɛ kɔna neŋ,
tɛɛlese wose kenyiŋ gyae ke kɔŋ n gyaŋ.
6Kurumɔɔse akpeŋ akpeŋ baa lɛɛ n tɛɛle dɔɔ,
kpuna Midiane na Efa kurumɔɔsebia.
Te Sebatena pou mɔ baa kɔŋ,
na ba seelena kɔba yayam na oliifi,
na bɛɛ lese Degbeŋgyoo yele.
7Baa yilaa Kedare wonembia pou kɔna neŋ,
Nebayote namense baala baa som neŋ,
Baa lɛɛ wɔ ŋgba kedeesa nɛ ma kedeesaboe dɔɔ,
te maa do me gyoorobiiri ɔsom deni keŋ obuo.
8<<Bomɔ ne furufulaa laŋ ŋgba ŋɔma,
ŋgba awuluŋna ne gyuulaa ba asaase man nɛ?
9Ampaŋ, me siaman te tɛɛlese ŋan loŋ be kilisi ŋa nɛ ne kɛɛ,
te Taresisi pantuuse ŋan dɔŋ siaman#60:9 Kebudiira agbele dinaana
be ta mo n bia baŋ be kyaanaŋ lem nɛ bɛɛ kɔŋ,
kpuna be kɔba wolom na kɔba yayam,
be kaa do Degbeŋgyoo n Wurubuarɛ
Iseraetena fereŋkyeŋte ŋon gyoorobiiri,
nawolo nyi ŋon faana neŋ wose kenyiŋ.
10<<Ŋɔɔla baa desina nya akyaŋse ŋan baŋ,
na be gyooneŋ kaa som neŋ.
Doo nyi me tuku ŋon me baŋ man,
mɔna me deeli keyɛɛ dɔɔ maa wii ŋon.
11Baa toro nya anaanɔɔse debaŋ kamasɛ,
bɔɔ gyae baa tɔ ŋa weese teŋteŋ yaa nelim ya,
na balaŋ kenyiŋ mo tɛɛlese agyapadɛɛse kɔna neŋ,
na be gyooneŋ ke lɔ baameŋse gaŋtee be siaman.
12Nawolo nyi baa wɔlɛɛ tɛɛle yaa gyoorobiiri keŋ be gyae ke ka som neŋ ya nɛ.
Baa yɛlɛɛ ke pou.
13<<Lebanɔn gyoorobiiri gyae ke kɔŋ n gyaŋ,
baa yilaa daase kpaakpaa nyiŋan,
kaa do mɔ ɔsom deni fereŋkyeŋ keŋ obuo,
na maa do me nae dɛɛsee gyoorobiiri.
14Baŋ bɔɔ ŋere neŋ do nɛ bia baa kɔŋ kaa buŋ neŋ,
baŋ pou bɔɔ naase neŋ diyem nɛ baa kɔŋ kaa buŋ n naawɔ tɛɛ,
na baa baake neŋ nyi Degbeŋgyoo donɔɔ dinaa,
Iserae fereŋkyeŋte ŋon Siyɔn.
15<<Doo nyi be bɛɛ neŋ te be kɔla neŋ,
te ŋolo na ŋolo ta mo n man laŋ ya nɛ,
maa yɛɛ neŋ obuo walaŋ kekpaakekpaa,
na kenyaŋee fa kalola kegyakaarese pou.
16N ke nyɔɔ tɛɛlese miliki,
na n ke ŋmase gyooneŋ ade.
Botɔɔ te n ka gyeŋ nyi maŋ, Degbeŋgyoo, maŋ yɛna n nyeelɛɛre.
17Maa mo kɔba yayam see kɔbere nae man fa neŋ,
na kɔba wolom ka seŋ nyeele nae man.
Maa mo kɔbere see daŋ nae man,
na nyeele ka seŋ boya nawɔɔ man.
Maa yela wosefɛɛreŋ ke yɛɛ n siamante,
na katenee ke di n dɔɔ.
18Bɔɔ gyae baa tekaa nyii yoo yeesa n tɛɛle dɔɔ,
yaa abɔɔ kewɔlɛɛ yaa abɔɔ ketekerii n wulu man ya,
mɔna n ke baake nya akyaŋse nyi nyeekelɛɛ,
na nya anaanɔɔse nyi yele kalese.
19Weese be gyae ke tekaa yɛɛ n ke ŋmaŋee weese teŋteŋ ya,
yaa gyaalaŋ ke ŋalakee n dɔɔ ya,
nawolo nyi Degbeŋgyoo waa yɛɛ n keŋmaŋee kekpaakekpaa,
na n Wurubuarɛ waa yɛɛ n gyoorobiiri.
20N weese be gyae ka teka gyoo ya,
te n gyaalaŋ be gyae ka tekaa yeŋ ya,
Degbeŋgyoo waa yɛɛ n keŋmaŋee kekpaakekpaa,
te n waraŋsa weeya gyae kekɔŋ ɔto.
21Botɔɔ te n balaŋ pou baa tenee,
na tɛɛle keŋ ke yɛɛ be wui kekpaakekpaa.
Baŋ yɛna daŋbii keŋ mɔɔ duu nɛ,
me nyiŋmaa man tom
na baa lese me gyoorobiiri wola.
22Ŋon ɔ yɛɛ peperee ɛ man nɛ waa bese kakpoŋ,
te biikyaa waa bese tɛɛle dekpaatakpere.
Maŋ yɛna Degbeŋgyoo,
maa yɛɛ ke bileŋ ka debaŋ man.>>
Currently Selected:
Yesaya 60: NTR
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics Literacy and Bible Translation
