Yesaya 7
7
Imanuɛle kolo kalesewola
1Debaŋ keŋ Usiya bu Yotame bu Ahase ne di gyoori Yuda nɛ, Aram gyoo Resin na Remaliya bu Iserae gyoo Peka, gyuuwɔ ke yoo Yerusalɛm, mɔna ba te tale yoodi ke dɔɔ ya.
2Ba ke yako Dawide dekpaŋalaŋmantena nyiaa, Aram te gyu ke yɛɛ nɔɔ na Ɛferayim, ke wosi Ahase na ɔ balaŋ konɔɔse ŋgba mena keŋ feliŋ ne wosi daase laa man nɛ.
3Keŋte Degbeŋgyoo yako Yesaya nyiaa, <<Ɛmɛɛ na n bu Sɛare Yasube ɛ lee gyu ke gyaŋeena gyoo Ahase adoyenaŋ depaa keŋ ɔto, gbɛɛ keŋ ne gyu kanyaŋ faafore ŋon wɔɔ man nɛ. 4Yako e nyiaa, <Kɛɛ nideli, n wɔe dɛɛ fɛɛ neŋ, te naa yee ya. Naa yele Resin na Aram na Remaliya bu baŋ kum keŋ ke lɔ neŋ n wɔe ya, nawolo nyi be bala yɛɛ ŋgba daakpee keŋ be kpaa taŋ nɛ nyɔɔse. 5Aram na Ɛferayim na Remaliya bu te bake n nyee man nyi baa wɔlɛɛ nyiaa, 6<<Ɛ yela de kaa yoo Yuda, ɛ yela de kaa naase e diyem, na dɛɛ mo ke kpala fa da wose na dee yela Tabeele bu kedi gyoori botɔɔ.>> 7Mɔna nnɛ yaa Degbeŋgyoo Doŋte Pou Nyee ne yako,
<<Ka be gyae ke yɛɛ mena ya,
ka be gyae ke kɔŋ mena ya,
8nawolo nyi Aram nyee yɛna Damasekuse,
te Damasekɔse mɔ nyee yɛna Resin waageŋ.
Kulutooneŋ sɔŋotooro na anoŋ man nɛ,
baa wɔlɛɛ Ɛferayim korakora keŋ nyi balaŋ be gyae baa kyaa bela ya.
9Ɛferayim nyee yɛna Samariya,
te Samaria mɔ nyee yɛna Remaliya bu waageŋ.
nyi ɛ ta sem ɛ kelɛɛdi man keŋkeŋ ya na,
ɛ be gyae ɛ ka seŋ korakora ya.>>>
10Degbeŋgyoo besewɔ kolosina Ahase nyiaa, 11<<Bɔɔse Degbeŋgyoo n Wurubuarɛ na waa yɛɛ kolo wola neŋ, lee woya dɛɛ kyilimkyilim yaa lee adido adido.>>
12Mɔna Ahase yakowɔ nyiaa, <<Mɔɔ gyae maa bɔɔse ya, mɔɔ gyae maa kɛɛse Degbeŋgyoo kɛɛ ya.>>
13Keŋte Yesaya yakowɔ nyiaa, <Ɛmɛɛ Dawide dekpaŋalaŋmantena, nɛnɛɛ ɛ nyii maŋ, Diyem keŋ ɛ ne naase deniwalaŋ nɛ te kaboena ŋon yee? Ɛ ke naase me Wurubuarɛ mɔ diyem? 14Mena dɔɔ Degbeŋgyoo gbagba waa lese kolo wola ŋon. Alebu keteŋ waa kyaŋ fulu na waa lola bu baale, na baa bake e nyi Imanuɛle#7:14 Wurubuarɛ kpuɛna daa. 15Miliki na teebɔɔ te waa di, kelii debaŋ keŋ waa gyeŋ dukum na waa bɛɛ ke, na waa lese debam, 16pɛ waa gyeŋ dukum kebɛɛ na waa lese debam na gyooneŋ bala baŋ ɛ ne yee nɛ tɛɛlese gyae ke wɔlɛɛ. 17Degbeŋgyoo waa yela kayeyɛɛ ke yala ɛmɛɛ na n balaŋ na n kya dekpaŋalaŋmantena. Weeya ŋenaŋ te kɔŋata see pɛnpɛŋ ya lee debaŋ keŋ Ɛferayim be kpase lee Yuda man, waa mo Asiriya gyoo kɔŋ ɛ dɔɔ.>>
Degbeŋgyoo waa mo Asiriya gyoo yɛɛ tom
18Wee kenaŋ Degbeŋgyoo waa wola weele baake kyɔɔse lee Igyipite, na teebɔɔbiise lee Asiriya tɛɛle man. 19Baa kɔŋ kaa kyakee detaŋgyase na boya bɔɔneŋ na sɔɔse na wonembia dedii man. 20Mena wee kenaŋ nɛ Degbeŋgyoo waa bɔ ŋon ɔ ne tisi nyeeya nɛ paa lee Eferate boo keŋ wɔle, ŋon yɛna Asiriya gyoo na waa tisi ɛ nyeeya na ɛ nɔɔfatase na ɛ wose man wona pou. 21Wee kenaŋ walaŋ waa kɛɛle nunkyuebu, na namense bala bo. 22Keŋ baa nyiŋ miliki burum lee be man dɔɔ, baa nyiŋ miliki keŋ be kem nɛ di. Baŋ pou bɔɔ kaa tɛɛle keŋ man baa nyiŋ miliki keŋ be kem na teebɔɔ di. 23Mena wee kenaŋ nɛ, botɔɔse ŋan gerepose kakpoŋ (1,000) gyae ka lee koya kɔba wolombia kakpoŋ (1,000) nɛ, kpalamse na kpaŋkpaŋkorolose ne gyaela ke tu botɔɔ. 24Bakpaŋna baa mo baŋdaŋ na nyeela gyu botɔɔ, nawolo nyi kpaŋkpaŋkorolose na kpalamse te wuu tɛɛle keŋ dɔɔ. 25Bulasebia ŋan pou nafɔ bɔɔ fare ŋe dɔɔ na fare nɛ dɔɔ ŋolo be gyae waa gyu botɔɔ na kpaŋkpaŋkorolose na sɔɔse ŋan ka do e gyakoloŋ ya, ŋe gyae ka bese botɔɔse ŋan baa mo nunkyuese na namense gyu dedii.
Currently Selected:
Yesaya 7: NTR
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics Literacy and Bible Translation
