Yesaya 8
8
Yesaya na ɔ bia yɛna kolo kawola
1Degbeŋgyoo yako maŋ nyiaa, <<Mo tɔne dinaa na n ka mo pɛne ŋmarase ke dɔɔ nyiaa, yoo abɔɔ kuure, yɛɛ ɔsaa, abɔɔ ŋmaare barase. 2Mena dɔɔ me baake sae Uriya, na Yebɛrɛkeya bu Sakariya nyi be kaa di adansɛɛ fa maŋ.>>
3Keŋte daana Wurubuarɛ gbalare alo ŋon doowɔ, te ɔ kyaŋa fulu te ɔ lola bu baale. Te Degbeŋgyoo yako maŋ nyiaa, <<Do e yele nyi Yooman abɔɔ kuure, yɛɛ ɔsaa, abɔɔ ŋmaare, barase. 4Nawolo nyi pɛ bu ŋon waa gyeŋ <Taata> yaa <Nna> kebaake nɛ, Asiriya gyoo waa kaa kuu Damasekuse agyapadɛɛse na Samariya yooman abɔɔ pou mo laŋ.
5Degbeŋgyoo besewɔ kolosina maŋ nyiaa,
6<<Keŋ balaŋ kɛwɔ be bɛɛ,
Siloa loŋ keŋ kɛɛ lam dɛɛdɛɛ,
te bɛɛ nyaŋee lee Resin
na Remaliya bu dɔɔ nɛ,
7kɛɛ, Degbeŋgyoo waa mo
Asiriya gyoo na ɔ yoonɔɔtena kaa wuu be dɔɔ.
baa wuu wɔ ŋgba Eferatese boo wuula nɛ.
Ke gyae ke waale
gbaa ke diŋgyiŋ, 8na ka ke waale kelii Yuda, yere gbaa ke
mo kelii ke wɔŋe man,
te ke beŋkelɛɛ gyae ke fɛlɛɛ wuu ɛ tɛɛle ɔto,
Ao! Imanuɛle.>>>
9Ɛmɛɛ tɛɛlese, ɛ mo yoo yeesa gyaŋee, mɔna gyakoloŋ gyae ka gyoo ŋon,
Ɛmɛɛ baŋ pou ɛ kyaana lem nɛ, ɛ tei.
Ɛ desina ɛ wose fa yoo, mɔna gyakoloŋ gyae ka gyoo ŋon!
Ɛ desina ɛ wose fa yoo, mɔna gyakoloŋ gyae ka gyoo ŋon!
10Ɛ bake kolo ɛ nyeeman, mɔna be gyae ke de ya,
Ɛ yako nombia sɛɛ dɔŋa, mɔna gyae ke yɛɛ yakaa,
nawolo nyi Wurubuarɛ kpuɛna daa. (Imanuɛle)
11Degbeŋgyoo ka mo ɔ nyiŋmaa doŋte gyakaa me dɔɔ nɛ, ɔ faree maŋ nideli nyi me naa sila balaŋ kɛɔ dinɔɔ ya.
12<<Ɛ naa lɛɛ nyeeman kebake
kamasɛ keŋ balaŋ kɛɔ ne baake nyi nyeeman kebake nɛ do ya,
Ɛ naa yee keŋ bee yee nɛ ya,
te ɛ naa yele ke ka do ŋon gyakoloŋ ya.
13Degbeŋgyoo Dekpataakpere ŋon te kaboena nyi yaa kɛɛ nyi ɔ yɛɛ fereŋkyeŋ,
ŋon te kaboena nyi yaa yee,
ŋon te kaboena nyi ɛ wɔe dɛɛ lɔ ŋon.
14Waa yɛɛ dekyae fereŋkyeŋ,
fa Iserae na Yuda,
boe keŋ ne yele balaŋ ne gyɔ nae,
na kpanaŋ keŋ ne yele balaŋ ne yale.
Waa yɛɛ kɔta na dekpakalaa fa
Yerusalɛmtena.
15Be man burum baa gyɔ be nae,
baa yala tekerii,
baa nyɔɔ wɔ kɔtase na baa kyaŋ wɔ.>>
16Bake kefaree adansɛɛ kei,
tɔ Wurubuarɛ nombii kawola kei nɔɔ me kaseela man.
17Maa daa Degbeŋgyoo,
ŋon ɔ ba mo ɔ sia weese Yakɔbe duuluŋmantena nɛ.
Maa mo ma wose lɔ ɔ dɔɔ.
18Kɛɛ, daa na bia baŋ Degbeŋgyoo be fa maŋ nɛ yaa. Daa yɛna kagyene, na keŋ seŋɛɛ fa Iserae lee Degbeŋgyoo Dekpataakpere ŋon ɔ kyaa Siyɔn bula dɔɔ nɛ gyaŋ.
Detiŋtɛɛ ta bese keŋmaŋee
19Nyi ŋolo de yako ŋon nyi yaa gyu gbalara na ŋmeeseŋtena baŋ bee kolosi adadawoya man te bɛɛ lɔkɔtee nɛ gyaŋ ke bɔɔse na, tekaboena nyi yaa gyu Wurubuarɛ gyaŋ ke bɔɔse yee? Weera dɔɔ te ɛ ne gyu woya gyaŋ ke gbala baŋ be kyaana be sia nɛ nyeeman? 20Ɛ tei Wurubuarɛ kawola na ɔ kefaree adansɛɛ keŋ. Nyi ŋolo te kolosi ŋgba mena keŋ nombii kei doo ya nɛ, kenaŋ na tɛɛ be gyae kena ɔtenate ya. 21Baa mo wosekekyaŋ na tanam kila tɛɛle keŋ dɔɔ. Tanam da yee wɔ na baa gyeŋ baŋ nideli, na baa kɛɛ adido na baa falaa be gyoo na be Wurubuarɛ. 22Baa gɔŋase kɛɛ tɛɛle, mɔna baa naa kayeyɛɛ na detiŋtɛɛ na kayeyɛɛ keŋ taŋ keyako ya, na baa gegi wɔ ka do detiŋtɛɛ tuum man.
Currently Selected:
Yesaya 8: NTR
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics Literacy and Bible Translation
