Nɔɔneŋ 18
18
Dawide keyoodi nɔɔneŋ
1Ao Degbeŋgyoo, me doŋ, mɛɛ gyae neŋ,
2Degbeŋgyoo yɛna me kpanaŋ, na ma dekagya, na me lɛɛre,
me Wurubuarɛ yɛna me kpanaŋ ŋon mee yeu kagyoo,
ŋon yɛna me yoo nyeele pampasaŋ, na ma nyeekelɛɛ doŋ, na ŋon ɔ ne gyee maŋ.
3Me baake Degbeŋgyoo ŋon kaboena nyi baa lese ɔ yele nɛ,
te ɔ lɛɛ maŋ lee me kɔlara nyiŋmaa man.
4Yeŋ ŋmeeseŋ milii maŋ,
kewɔlɛɛ wuuwɔ waale maŋ.
5Woyadɛɛ ŋmeeseŋ milii maŋ kilisi,
yeŋ kɔtase kyaŋa maŋ.
6Ma wose kekyaŋ man nɛ, me baake Degbeŋgyoo,
me wiiwɔ fa me Wurubuarɛ nyi waa kyɔ maŋ.
Ɔ nyii ma woya wɔ ɔsom deni dinaa keŋ man,
me kewii ke liiwɔ ɔ deŋela man.
7Tɛɛle sereewɔ te ke wosiwɔ,
bulase mokɔɔ kaseese wosiwɔ,
ŋe sereewɔ nawolo nyi ɔ ta gyeŋ baŋ.
8Nyɔɔse leewɔ ɔ memɔɔse man,
boalaŋ anekpaaŋ leewɔ ɔ nɔɔman,
boalaŋ na nyewalaŋ leewɔ ke man.
9Ɔ kpase adido man, te ɔ tisiwɔ kɔŋ tɛɛle man,
debuŋta tuum doo ɔ nawɔɔtɛɛ.
10Ɔ kyaawɔ kerubise dɔɔ te ɔ furufuwɔ,
ɔ kyaawɔ feliŋ beŋkelɛɛ dɔɔ.
11Ɔ moo detiŋtɛɛ wuu ɔ wose,
ɔga kebiri ŋɔma tuum kilisi ɔ wose.
12Ŋɔma na akpeleŋkpeleŋbia na ɔga keŋmaale te kilisi e,
nyewalaŋ ŋɛɛ na lee ŋɔma man.
13Degbeŋgyoo faewɔ lee adido,
Adidote ŋon woya faewɔ.
14Ɔ tɔɔ ɔ baŋdaŋ yaasee kɔlara baŋ,
ɔga keŋmaale dinaa yelaa kekolosi gyoo wɔ.
15Ɛpo man ateta lee debɔɔ,
tɛɛle mokɔɔ kasee mɔ lee debɔɔ,
lee Degbeŋgyoo n kekalana,
na weesɛɛ ŋan n ba lee foofoo nɛ dɔɔ.
16Ɔ tenee ɔ nyiŋmaa lee adido kaa kyaŋ maŋ,
ɔ wɔŋa maŋ lee loŋse ŋan ŋe dana siiliŋ nɛ man.
17Ɔ lɛo maŋ lee me kɔlara doŋ nyibaŋ gyaŋ,
na me kɔlara baŋ be doŋ kela maŋ beiŋ nɛ nyiŋmaa man.
18Ma wose kekyaŋ maŋ te be kaa wuu me dɔɔ,
mɔna Degbeŋgyoo kyɔɔ maŋ.
19Ɔ lese maŋ ka see botɔɔ keŋ ma wose gyae ke fɛɛ maŋ,
ɔ lɛo maŋ nawolo nyi me nombia na gyoo ɔ sia.
20Degbeŋgyoo yɛɛ deeli fa maŋ lee me katenee dɔɔ,
ɔ tɔɔ maŋ kom lee keŋ me nyiŋmaase yɛɛ fereŋkyeŋ dɔɔ.
21Nawolo nyi me tɛɛwɔ Degbeŋgyoo gbɛɛneŋ man.
Me ta lee Wurubuarɛ wɔle yɛɛ dukum ya.
22Wɔ mmaraase pou doo me siaman,
me ta lee ɔ kawolase ŋan wɔle ya.
23Nombiikum be doo me man ɔ siaman ya,
me wɔŋa ma wose lee dukum man.
24Degbeŋgyoo tɔɔ maŋ kom lee me katenee dɔɔ,
lee keŋ me nyiŋmaase yɛɛ fereŋkyeŋ ɔ siaman dɔɔ.
25N ne di anokoare fa baŋ bee di anokoare nɛ,
n ne yɛɛ deeli fa baŋ be dei nɛ.
26N yɛɛ fereŋkyeŋ fa baŋ be yɛɛ fereŋkyeŋ nɛ,
mɔna n ne ŋmanyaŋ akpanyanyaŋtena.
27N ne lɛɛ baŋ bɛɛ yɔkɔse ba wose,
mɔna n ne yɔkɔse baŋ bɛɛ gate ba wose nɛ.
28Degbeŋgyoo, yela me kanea ke kyaŋee,
me Wurubuarɛ, besena ma detiŋtɛɛ yɛɛ keŋmaŋee.
29Nyaŋ ke kyɔ maŋ na maa di me kɔlara pou dɔɔ,
me Wurubuarɛ waa do maŋ doŋ, na maa toŋ gbaa me kɔlara.
30Wurubuarɛ dɔɔ, ɔ liiwɔ nideli,
Degbeŋgyoo nombii yɛɛ anokoare,
ɔ yɛɛ yoo nyeele pampasaŋ, fa baŋ bee yeu kaa gyoo e nɛ.
31Amɔte yɛna Wurubuarɛ lee Degbeŋgyoo wɔle,
amɔte yɛna kpanaŋ kela de Wurubuarɛ?
32Wurubuarɛ na doona maŋ doŋ,
ɔ ne yele ma keta man ne gyu nideli.
33Ɔ ne yele me nawɔɔ na betee ŋgba ŋaa nɛ keŋ bɛɛ kpaŋte ya,
ɔ ne yele mɛɛ sem botɔɔse ŋan korɛɛ nɛ.
34Ɔ na wola me nyiŋmaase yoo,
me nyiŋmaase ne tale goo kɔbere baŋdaŋ.
35N moo n nyeekelɛɛ kekyɔ keŋ yɛɛ me yoo nyeele pampasaŋ,
n dunoluŋ nyiŋmaa ne gyee maŋ,
n kekyɔ yelaa me yɛɛ doŋ.
36N fɛlɛɛ gbɛɛ nyi maa ta,
na ma doona be kpaŋte ya.
37Me gegi me kɔlara te ma ke kyaŋa wɔ,
me ta bese me wɔle ya kaboena ma koe wɔ.
38Me yɛlɛɛ wɔ keŋ ba te tale koro ya,
be yalawɔ me nawɔɔtɛɛ.
39Nyaŋ doona maŋ doŋ fa yoo,
n yɔkɔse me kɔlara me siaman.
40Nyaŋ yelela me kɔlara besewɔ be wɔle yekii,
te me munu baŋ bɛɛ kɔla maŋ nɛ.
41Be wiiwɔ nyi baa kyɔ wɔ, mɔna ŋolo te lɛɛ wɔ ya,
be baake Degbeŋgyoo, mɔna ɔ te kpa wɔ ya.
42Me naŋa wɔ ŋgba akuŋkuŋ te feliŋ gyɔɔwɔ nɛ,
me sakatee wɔ ŋgba abɔntere man depate nɛ.
43N te lɛɛ maŋ lee baŋ bee yoo maŋ nɛ nyiŋmaa man,
n moo maŋ yɛɛ tɛɛlese nyee.
Balaŋ baŋ mɔɔ gyeŋ wɔ ya nɛ, na som maŋ nɛnɛɛ.
44Ŋɔɔla ne yɔkɔse ba wose fa maŋ,
ba betaa nyii me nombia pɛ, na bɛɛ yɔkɔse ba wose fa maŋ.
45Be popou wose ta yeŋ wɔ,
bɛɛ mo wose keseree lee ba ayoese man kɔŋ.
46Degbeŋgyoo kyaa, yele kalese yɛɛ me kpanaŋ ŋon wui,
Ɛ gyina Wurubuarɛ ma nyeelɛɛre ŋon adido.
47Ŋon yɛna Wurubuarɛ ŋon ɔ ne yoo fa maŋ,
ɔ ne yɔkɔse tɛɛlese do me tɛɛ,
48ŋon lɛɛna maŋ lee me kɔlara nyiŋmaa man,
n gyinaa maŋ adido kela me kɔlara,
n lɛɛ maŋ lee balaŋ akaraŋkaraŋ nyiŋmaa man.
49Degbeŋgyoo, mena dɔɔ maa lese n yele tɛɛlese man,
maa kpee nɔɔneŋ lese n yele.
50Ŋon faana ɔ gyoo keyoodi dinaa,
ɔ lese ɔ kegyae keŋ taŋ ɔto ya nɛ wola ŋon ɔ be tiu e nuŋ nɛ,
fa Dawide na ɔ duuluŋ man balaŋ kekpaakekpaa.
Currently Selected:
Nɔɔneŋ 18: NTR
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics Literacy and Bible Translation