Nɔɔneŋ 19
19
Wurubuarɛ gyoorobiiri wa abɔɔ keyɛɛ man.
1Adido na lese Degbeŋgyoo gyoorobiiri wola,
ŋɔma ne gyɔ ɔ nyiŋmaa man tomse dekpeŋkpeŋ.
2Wee ne yako ŋan ɔ be yɛɛ nɛ fa wee wɔle,
nelim mɔ ne yako ɔ nombia kagyeŋ fa nelim wɔle.
3Ta lee kekolosi man ya, ta lee nɔɔwoya man ya,
ŋolo te nyii ba woya mɔ ya.
4Mɔna ba woya liiwɔ tɛɛle pou dɔɔ,
be nɔɔwoya ke liiwɔ tɛɛle keŋ ɔto.
Wurubuarɛ te baŋ kefɛɛ fa weese adido.
5Kɛɛ lee ŋgba alowɔle baale ŋon ɔ na lee ɔ deni tɔɔmante man,
yaa ŋgba yeure kpaakpaate ŋon ɔ na mo kenyaŋee yeu nɛ.
6Kɛɛ bɛɛ lee adido
na ke ta mo ŋɔma man kelii ke dɛɛyalae yenaŋ,
kolo bɛɛ weese ka wose lee ka kelaŋe man ya.
7Degbeŋgyoo mmaraa liiwɔ nideli,
kɛɛ yele walaŋ woo ne kɔŋ ɔ gyaŋ,
Nyaŋ ke tale mo n wose lɔ Degbeŋgyoo kawolase dɔɔ,
kee yele diyiŋte sia ne kare.
8Degbeŋgyoo kawola doo kegbɛɛ dɔɔ,
kee yele walaŋ konɔɔ ne fɛɛ e,
Degbeŋgyoo mmaraase tenɛɛ,
ŋee yele walaŋ sia ne ŋmaŋee e.
9Degbeŋgyoo keyee yɛna kpaakpaate,
ke kyaa kekpaakekpaa.
Degbeŋgyoo kawolase doo ŋa dedoi man,
ŋe popou tenɛɛ.
10Ŋɛɛ lee koya kela kɔba yayam,
kela kɔba yayam kpaakpaate gba,
ŋe dana gyoŋ kela teebɔɔ,
kela teebɔɔ keŋ ne kyɔsee lee teebɔɔ defaŋalaŋ man.
11Ŋan ne fareena n tobaale,
ɔ di ŋe dɔɔ na, ke dana kom ketɔ nideli.
12Amɔte gyenena ŋon gbagba dukum keŋ ɔ be yɛɛ?
Mo me nombia kumɛɛ ŋan weesɛɛ nɛ kyɛɛ maŋ.
13Lese n tobaale lee nombiakumɛɛ ŋan ɔ ne naa na sia yɛɛ nɛ man,
ŋe naa di me dɔɔ ya,
kenaŋ na nombiikum be doo ma wose man ya,
na maa lee nombia kumɛɛ dinaana keyɛɛ man.
14Yela me nɔɔwoya na ŋan mɛɛ gyueŋ me konɔɔ man nɛ,
ka gyoo n sia,
Degbeŋgyoo, me Kpanaŋ na ma Nyeelɛɛre.
Currently Selected:
Nɔɔneŋ 19: NTR
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics Literacy and Bible Translation