Kesikpɛkpɛ 11
11
Kititíuvũ Dzudzu nɛ Babel
1Nɛ kibe ɛlɛ, buluhũ tenikpo, nɛ̀ kaɖɔɖɔ tenikpo idi kalɛ azã kanɔmɛ anɛ nyɔ̃ɔ ahɔɛ. 2Gɛ baanɔ betu pɛ bavɛ kiwiɛ otukɔ ɛbeɛ, bedi ku kadadasi tieli abha nɛ Shina, kɛlɛ batsɛ nɛ ɛkɛlɛ.
3Betseɖe bagɔlɔ asɛ, "Nɔba tɛ bubhuĩ tisi tɛ bɔpɔɛ lɛ piapii." Kliso nɛ kɛglagbu inye mɛɛ, balɔkɔ aŋɔ anyana tisi bhubhui pɔpɔɛ plɛnɔ bagɔlɔ. 4Kɛlidemɛɛ betseɖe bagɔlɔ asɛ, "Nɔba tɛ bubhuĩ ɔma gbagbla kɔ bɔlɔ ishu, nɛ̀ kititiuvũ gɛ bɔɖama dɛtɔ̃ owusoso nɔ, tɛ bɔbhɛtɛ kinye kɔ bɔlɔ ishu tɛ bɔtɛ pɔ̃ɛ kanà nɛ kanɔnɔ mɛ."
5Pɔ Apaleteɛ ezhyi aba esi tɛ ebeɖi ɔma gbagbla nɛ̀ kititiuvũ ɖaɖama gɛ babhɔ. 6Apaleteɛ aɖɔ asɛ, "Onupɛ benu kidi tenikpo pɛ behu buluhũ tenikpo pɛ bakpɛ kibui lɛ niesiɛ, kɛlɛɛ kibui nana ma gɛ bapɛ asɛ abhɛtɛ pɛ batɛ bala. 7Kliso nɔkɔ bɔvɛ tɛ bufutsù balɛ buluhũɔ mɛ tɛ betilũ bagɔlɔ esi."
8Kliso Apaleteɛ apɔɛ balɛ mɛ akanà kpɛ kesiakpa petee abha, kɛlɛ bayɔlɔ ɔma gbagbla tɛbhɔbhɔ. 9Klisoɔ bakɔ ɛkɛlɛ nɛinye asɛ Babel- ɔmɔsɛ ɛkɛlɛ Apaleteɛ efutsù kanɔnɔ buluhũɔ mɛ. Odenɔ ɛkɛlɛ Apaleteɛ apɔɛ balɛmɛ akana kpɛ kanɔnɔ mɛ petee.
Denɔ Shem Ɔvɛnɔ Abram
10Shem yɛishui ebui naalɛ.
Agɔ taabha nɛ budekelĩ yiyí nɛideɛ, gɛ Shem aŋã agɔ akpã zɛzɛɛ̃, amɔ Afaxaɖ. 11Kɛlɛ gɛ amɔ́ Afaxaɖ bekeɛ, Shem azazã nɛkpã agɔ akpã teeti kɛlɛ amɔ beyianyɛ nɛ̀ beyiadzɛ̃ bhlatɔ.
12Gɛ afaxad azã nɛkpã agɔ afɛata nɛ̀ teetieɛ, amɔ́ Shɛla. 13Kɛlɛ gɛ amɔ́ Shɛla ebekeɛ, Afaxaɖ azazã nɛkpã agɔ akpã taalɛ̃ nɛ̀ taata kɛlɛ azamɔ́ beyianyɛ nɛ̀ beyiadzɛ bhlatɔ.
14Gɛ Shɛla aŋã agɔ afɛataa, amɔ́ Eba. 15Kɛlɛ gɛ amɔ́ Eba ebekeɛ, Shɛla azazã nɛkpã agɔ akpã taalɛ̃ nɛ̀ taata kɛlɛ azamɔ́ beyianyɛ nɛ̀ beyiadzɛ bhlatɔ.
16Gɛ Eba azã nɛ ɛkpã agɔ afɛtaata nɛ taalɛɛ̃, ebedzi aka kɔ Pɛlɛg. 17Kɛlɛ gɛ amɔ́ Pɛlɛg ebekeɛ, Eba azazã nɛkpã agɔ akpã taalɛ̃ nɛ̀ afɛatata kɛlɛ azamɔ́ beyianyɛ nɛ̀ beyiadzɛ bhlatɔ.
18Gɛ Pɛlɛg azã nɛkpã agɔ afɛata, amɔ́ Reu. 19Kɛlɛ gɛ amɔ́ Reu ebekeɛ, Peleg azazã nɛkpã agɔ akpã taabha nɛ̀ teezhyita kɛlɛ azamɔ́ beyianyɛ nɛ̀ beyiadzɛ bhlatɔ.
20Gɛ Reu azã nɛ ɛkpã agɔ afɛata nɛ̀ taabhaa, ebedzi aka akɔ Sɛɖug. 21Kɛlɛ gɛ amɔ́ Sɛɖug ebekeɛ, Reu azazã nɛkpã agɔ akpã taabha nɛ̀ tegegene kɛlɛ azamɔ́ beyianyɛ nɛ beyiadzɛ bhlatɔ.
22Gɛ Sɛɖug azã nɛkpã agɔ afɛata, amɔ́ Nahɔ. 23Kɛlɛ gɛ amɔ́ Nahɔ ebekeɛ, Reu azazã nɛkpã agɔ akpã taabha kɛlɛ azamɔ́ beyianyɛ nɛ̀ beyiadzɛ bhlatɔ.
24Gɛ Nahɔ azã nɛkpã agɔ afɛtaabha nɛ̀ teezhyitaa, amɔ́ Tɛɖa. 25Kɛlɛ gɛ amɔ́ Tɛɖa ebekeɛ, Nahɔ azazã nɛkpã agɔ kɛkpã zɛzɛ̃, kɛfɔ nɛ̀ teezhyita kɛlɛ azamɔ́ beyianyɛ nɛ̀ beyiadzɛ bhlatɔ.
26Gɛ Tɛɖa aŋã agɔ afɛtegegeneɛ, amɔ́ Abram, Nahɔ nɛ̀ Xaɖan.
27Tɛɖa yɛishu ebuiɛ naalɛ.
Tɛɖa amɔ́ Abram, Nahɔ nɛ̀ Xaɖan. Kɛlɛ Xaɖan amɔ́ Lɔt. 28Nɛ kibeɛ mɛ gɛ Xaran yɛaka Tɛɖa akalɛ nɛkpaã, Xaɖan etsí nɛ Ul nɛ Kaldeanɛ kesiakpa mɛ gɛ bamɔɛ nabha. 29Abram nɛ̀ Nahɔ bagbana adzɛ. Abram yeɛdzini yɛinyeɛ kɛlɛ idzì Sarai, kɛlɛ Nahɔ yeɛdzini yɛinyiɛ kɛlɛ idzì Milka gɛ yɛakaa yɛedzi Xaɖan, gɛedzì aka akɔ Milka nɛ Yiska. 30Otsinɔ bɔmɔ̃ gɛzã Sarai shu nɛ kibe ɛlɛ mɛ soɔ; agɛ mɔ eyi nanà.
31Tɛra alɔkɔ yɛeyianyɛ Abram, yɛeshui Lɔt gɛedzi Xaɖan yeyianyɛ, nɛ̀ yɛeyiɖidze Sarai, ɔplɛnɔ Abram yɛedziniɛ kɛlɛ balɛ petee betu odenɔ Ul nɛ Kaldea kesiakpa nabha pɛ bavɛ Kana. Pɔ gɛ beku Xaɖaniɛ, bebhuĩ kazã nɛ ɛkɛlɛ.
32Pɛlɛg azã nɛkpã agɔ akpã taabha nɛ̀ teeti, kɛlɛ etsí nɛ Xaɖan.
Currently Selected:
Kesikpɛkpɛ 11: NYB
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Languages, Literacy and Bible Translation GILLBT
