Kesikpɛkpɛ 13
13
Abram nɛ̀ Lɔt Bebu Ɔtɔ Nɛ Bagɔlɔ Shu
1Kliso Abram alɔ nɛ Egipte nɛ Nɛgɛv ɔbha nɛ̀ yɛedzini nɛ̀ kɛkanyiaka gɛlɛ yɛahɔɛ, kɛlɛ Lɔt tsyɛ atɔnɔ yɛ. 2Abram edzi ehoeyielete kibelɛ nɛ bagãlulu nɛ sikãfufu nɛ sikãdzadzã mɛ.
3Odenɔ Nɛgɛveɛ, akana vɛ ɔkɔ tenikpo vɛnɔ ɔkɔ bhlatɔ ɔdɛ ɔkpɛnɔ gɛ ediku Bɛtɛl, nɛ ɔkɔtoli gɛɔzã Bɛtɛl nɛ̀ Ai kishiɛ, nɛ ɛkɛlɛ gɛ yɛ kɛpɔtɛ kagba azã abafala nɔ 4nɛ ɛkɛlɛɛ gɛ abhɔ yɛ bɔdɔ̃pɔpɔɛ osubha gɛeputɔ. Ɛkɛlɛ Abram akpɛ ketakpuesi akɔ Apaleteɛ.
5Otsinɔ baagã nɛ̀ kɛpɔtɛ bɔgba zã Lɔt tsyɛ ahɔɛ, gɛ azagã afla nɛ̀ Abram. 6Pɔ kesiakpa nabha gɛ bazã aplɛnɔ bagɔlɔ nɛ̀ balɛ baagã egikpe kɔ balɛ taabha agaã kplumuɔ gɛ azã balɛ ahɔɛ kliso batika la gã nɛ̀ bagɔlɔ. 7Kɛlɛ ebela ebeku Abram yɛ baagã agbagbana ɛleteɛ nɛ̀ Lɔt yayɛ nɛishi. Kananɛ nɛ̀ Perizaianɛ bazã kesiakpa nabha kibe ɛlɛ.
8Kliso Abram etseɖe Lɔt asɛ, "Kɔ bɔyɔlɔ ebela galɛ bɔlɛishiɛ nɛ̀ bɔlɔ baagã gbagbana elete nɛishi ɔmɔsɛ bunu baadzya. 9Sɛ kesiakpa petee alɛ wotugba? Kɔ bubu ɔtɔ nɛ baagɔlɔ shu. Ɔvɛ keŋaã mɛ ɛbavɛ kɛblɛkpɛ nɔ mɛ; ɔvɛ kɛblɛkpɛ nɔ mɛ, ebavɛ kɛŋaã mɛ."
10Lɔt ebu bamɛ ewunɔ kabha kɛlɛ amɔ Zoa ɔmã, kɛlɛ amɔ̃ asɛ bulĩ yuku Yɔɖan kadadasi kesiakpa petee mɛ piapii, asɛ Apaleteɛ bɔkã alo kesiakpa nɛ Egipte. (Kibe ɛlɛ ba fala flogo pɛ bezĩ Sodom nɛ̀ Gomoɖa.) 11Kliso Lɔt ayɛkɛ Yɔɖan kɛdadaasiɛ petee gɛibu bamɛ vɛ kiwiɛ otukɔɛ be akɔ yɛeishu. Klisoɔ baadzya taabha bebu ɔtɔ nɛ bagɔlɔ shu. 12Abram azã Kana kesiakpa nabha, kɛlɛ Lɔt tsyɛ azã kadadasiɛ ɛma gbagbla mɛ kɛlɛ edzu yɛ bɔgba nɛ Soɖom ɔbha. 13Otsi Soɖom anɛ balɛ kɛtakpu mɛ gagãlĩ kɛlɛ ebuikpa ete baza bhɛtɛ nɛ Apaleteɛ ishu.
14Apaleteɛ aɖɔ etseɖe Abram nɛ Lɔt yɛ tɛshɛshɛ kideɛ asɛ, "Bu wɔ bamɛ owunɔ kabha tɛ oɖi bɔpiabha nɛ̀ bɔpialɛ, kiwiɛ otukɔ nɛ̀ kiwiɛ odɔkɔ odenɔ ɛkɛlɛ gɛ ɔlɛ. 15Kesiakpa petee gɛ ɔɔmɔ, ɛba lɔkɔ kɔ wɔ nɛ wɔ kihui nɔ tihɔɔ. 16Ɛba bhɛtɛ wɔ kihui nɔ asɛ kesiakpa osubhududu kliso onupɛ anɔ teli aba la osubududu nɔ akla, kɛlɛ babala wɔ kihui nɔ akla. 17Gavɛ, gã fala nɛ kesiakpa mɛ odenɔ adaã mɛ ɔvɛnɔ kesiɛ tɛ odenɔ kɛwaã ɔvɛnɔ kɛwã, gɛ ɛbalɔkɔ kɔ wɔ."
18Abram àkpa yɛ kagba kɛlɛ avɛ adɛzã beesi gbagbla gɛazã Mamrɛ ɔbha nɛ Xɛbron, ɛkɛlɛ yɛabhɔ bɔdɔ̃pɔpɔɛ osubha kɔ Apaleteɛ.
Currently Selected:
Kesikpɛkpɛ 13: NYB
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Languages, Literacy and Bible Translation GILLBT
