Kesikpɛkpɛ 16
16
Haga nɛ̀ Ishmael
1Otsinɔ, Sarai gɛenu Abram yɛedziniɛ agɛ mɔ̃ eyi nanà akɔɛ. Pɔ Egipte adzɛ axɔɛdɛ teli azã yɛahɔɛ gɛ beze kulu yɛasɛ Haga; 2kliso etseɖe Abram asɛ, "Apaleteɛ agɛkɔ mɛ beeyí mɛmɔ̃. Vɛ tɛ, ɔdɛwɔsɔ̃ nɛ̀ mɛ adzɛ axɔɛdɛ; ɔdɛtsyɛ ɛbamɔ̃ kishopo ɔganà yɛabha." Abram tsyɛ adɛmɛ atɔɖɔ kibuiɛ gɛ Sarai aɖɔ nabha.
3Klisoɔ nɛ Abram Kana tɛzazã nɛ kɛgɔ lɔfɔ mɛɛ, Sarai gɛenu yɛedziniɛ alɔkɔ yɛ Egipte adzɛ axɔɛdɛ gɛenu Haga akɔ yɛenyineɛ ɔsɛ tɛ edzì yɛedzinì. 4Awɔsɔ̃ nɛ̀ Haga, kɛlɛ emunù ɛya.
Gɛ amɔ̃ asɛ emunu ɛya ebekeɛ, akpà olugbù dzu nɛ̀ yɛapãlĩɛ. 5Kɛlɛ Sarai etseɖe Abram asɛ, "Wɔkɔ mɛ ɛtɔ bɔtɔ ɔlɛ. Ɛlɔkɔ mɛaxɔɛdɛ kpɛ wɔagbã mɛ, kɛlɛ otsiɛ gɛ etì asɛ emunù ɛya, akpà mɛ tɛɛlu kesi. Apaleteɛ yɛ ebebu bɔtsyɔa alɛ nɛ mɛ nɛ̀ wɔɛshi."
6Abram aɖɔ asɛ, "Wɔ ahɔɛ mɛ waxɔɛdɛ akpasɛ, bhɛtɛ kɛgɛ pɛ̃ kɔwɔ ɔdɛ ɔsɛ ɔbhɛtɛ nɛ yɛɛ." Kɛlɛ mɛ Sarai awɔà Haga yɛ ɔnyɔnyɔ̃ɔ; klisoɔ ebu tɛtsɛɖɛmɛ ashɛ nɛ yɛɔbhà.
7Apaleteɛ yɛaxɔɛdɛ adɛmɔ̃ Haga nɛ bulĩ tuli gɛ bude koeyi nɛ tisi mɛ nɛ oxuiɛ mɛ shu; kenu bulĩ tuli gɛili kidzoɔ gɛ vɛ Shur nɛwɔ̃a. 8Kɛlɛ aɖɔ asɛ, "Haga, Sarai yɛaxɔɛdɛ, fakɔ wɔode, kɛlɛ fakɔ wɔɔvɛ?" Ebuiliulũ asɛ, "Iibu tɛtsɛɖɛmɛ ɔshɛ nɛ mɛapãlĩ Sarai tɛhɔɛ mɛ."
9Kɛlɛ Apaleteɛ yɛaxɔɛdɛ etseɖe yɛasɛ, "Tsyina ɔvɛ wɔapãlĩɛ ɔkɔ tɛ odi zhyinì wɔ ishu esi akɔɛ." 10Kɛlɛ Apaleteɛ axɔɛdɛ aɖɔ aplɛnɔ asɛ, "Ɛbàkɔ wɔeyi mɔmɔ alɛ ekpè atɔɖɔ gɛ tɛkakalà mɛ tɛbazã balɛ ishu."
11Apaleteɛ yɛaxɔɛdɛ azaɖɔ aplɛnɔ asɛ:
Eyi alɛ wɔshu otsiɛ
kɛlɛ ɔbɔmɔ̃ eyianyɛ.
Tɛ ɔkɔ yɛinye ɔsɛ Ishmael,
ɔmɔsɛ Apaleteɛ elũ wɔ ɔwɔnyɔnɔ̃.
12Ebedzi anyɛ asɛ ayakpamɛ adiku ana;
yɛɔhɔɛ ɔbɔpá nɛ anɔ kanyiaka shu
kɛlɛ akanyia ka ɔyɛ tsyɛ ɔbɔpà nɛ yɛishu,
abazã nɛkpã nɛ kitití lɔlɔ mɛ
nɛ yɛadzya alɛ ishu."
13Yɛalɔkɔ kinye ɛlɛ akɔ Apaleteɛ gɛ aɖɔaɖɔ nɛ yɛɛ: "Wɔonu Owusoso Akaa gɛ ɔɔmɔ̃ mɛ," ɔmɔsɛ yɛaɖɔ asɛ, "Otsialɛ ɛmɔ agɛ yɛamɔ mɛ." 14Kliso pɛ bekulu bulĩ ozĩɛ ɔlɛ asɛ, Biɛɛ Laxai Rɔi; lɔkɔ lɛ ɛkɛlɛ, nɛ Kadɛsh nɛ̀ Bɛrɛɖ kishiɛɛ.
15Klisoɔ, Haga abamɔ eyianyɛ akɔ Abram, kɛlɛ Abram alɔkɔ kinye Ishmael akɔ eyianyɛ gɛ amɔ̃. 16Abram atɛŋã agɔ afɛtaasɛ nɛ̀ teehlo nɛ kibeɛ gɛ Haga amɔ́ Ishmael akɔɛ.
Currently Selected:
Kesikpɛkpɛ 16: NYB
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Languages, Literacy and Bible Translation GILLBT
